نهضة.. نهضة.. نهضة.. زغرطى يا اللى مانتيش غرمانة، ده لو النهضة بالشكل ده كان زمان العالم انقرض من زمان، ده من ساعة ما قالولنا مشروع النهضة واحنا عمالين نموت فى حادثة ورا الثانية، ولا الجنيه المصرى جاله هبوط حاد فى الدورة الدموية، أما بقى الاقتصاد فبنقوله مش لوحدك فى الهم والله، بس حد يقوللى والنبى طائر النهضة جنس ملته إيه بالظبط؟ لا يتوقف الشباب يوميًّا عن التعليق حول مشروع النهضة، والذى اتخذت منه جماعة الإخوان سلمًا للوصول إلى كرسى الحكم كما يرى الشباب، ليسأل الشباب: "إحنا بنطمن بس لتكون النهضة اتحسدت بس ولا جالها شلل فى رجليها ولا حاجة، وطائر النهضة تكون جاتله رصاصة عشوائية قضت على حياته"، لتزيد تعليقات الشباب الساخرة، خاصة بعد إضافة إدارة الفيسبوك "إيموشن" طائر النهضة كما وصفه شباب "فيس بوك"، "فيتو كافيه" رصدت تعليقات الشباب على موقع التواصل الاجتماعى فيس بوك... أدهم حسين: الدكتور أشرف العربى، وزير التخطيط والتعاون الدولى، بيقول: 8 جنيهات تكفى المواطن فى اليوم، طب حد يرد عليه!!. مروة عاطف: يا أسامة، كان نفسنا نجيب بنوتة ونسميها "نهضة" بس مفيش نصيب. أحمد خالد: نصيحة للجنيه المصرى، لو حسيت بهبوط اضرب مخلل. فاطمة إمام: طريق النهضة، ارجعي يا مصر دى يافطة بس، مافيش طريق أساسًا. منار أدهم: النهضة بعتلها جواب، النهضة ولا سألت فيا، يا مرسى إيه الأسباب؟ يا شاطر ما ترد عليه. محمد عمر: خيرت الشاطر سيقود عجلة الإنتاج، وسيأخذ مرسى أمامه ليلعب بالجرس. على رجب: هشام قنديل: الفترة المقبلة ستشهد استقرارًا يؤدى لتحسن الجنيه! فعلًا ده أنا حتى سامع إنه بدأ ينزل من على السرير ويروح الحمام لوحده. إيمان أحمد: الناس نهضتها السبت والأحد، وإحنا نهضتنا ما وردتش على حد. وليد مصطفى: سرقة العربيات زادت قوى فى مصر لدرجة إن الواحد بقى يخاف يصحى الصبح يلاقى مصر بقى اسمها جمهورية مصر بس، بدون العربية. محمد ياسر: الشتيمة بعد الثورة: جاتك نهضة تاخدك يا أخى. رامز فواز: المعاكسة فى زمن الإخوان: أكيد مامى نهضه عشان تجيب الاستقرار ده كله. هانى فؤاد: وزير المالية اسمه شحاتة، أظن الرسالة وصلت.
