أبين زين.. وأقول على المستخبى واللى مش معروف.. أضرب فى ودعى .. وتمللى بادعى.. والمستخبى باقوله ع المكشوف قول لى إيه الحكاية.. آخرتها إيه يارئيس.. هى البلد ناقصة أمن وجيش كبير وبوليس.. الشعب محتاج حوار مع حكم واعى حريص.. مش حظر تجوال.. طوارئ.. كل حبة نِهِيصْ.. والناس تبات بعد ثورة مفلسة تفليس.. مش بعد طول النضال الشعب يبقى حبيس.. الرمل قال والودع فيه سر مخفى عويص.. هى البلد ناقصة غُلْب وبهدلة وتكديس.. الناس خلاص مخنوقين ومحتاجين تنفيس.. فقول لنا لحد امتى نعيش كده محابيس.. واللا حترجع بقى لزمان فى عيشة فطيس.. هو إحنا بعد النضال حنعيش فى حلم كبيس.. فتَّح عينك ناس عالمنا بتراقبنا حثيث.. واحنا ما بنخافش بعد الثورة من متاريس.. فخلِّى بالك بقى بحر الوقيعة غويص.. مش بالطوارئ وتجوال يتمنع حَنْهِيصْ.. الشعب محتاج ترابط بين عمر وموريس.. ورئيس يوحَّد ما بين الكل فى التأسيس.. وأنا قلت ميت مرة وكلامى يا خلق نفيس.. إن كنتوا إخوان فخلَّوا للإخوة ونيس.. ووحدوا الصف دايما وافتحوا المتاريس.. وبكره حارجع وأشوف مين ع البلد دى حريص.