قررت رابطة التراس ديفلز اطلاق حملة توعية للشارع المصرى لعدم عودة بطولة الدورى قبل القصاص لشهداء مذبحة بورسعيد . وجاءت الحملة كما اوضحت الرابطة على صفحتها على الفيس بوك" تحت عنوان " لسه برضة مصمم تلعب .. لسه الدم جوا الملعب " .
ونشرت الرابطة البيان كما يلى عبر صفحتها "
"اولتراس ديفيلز تبدا من الغد حملة توعية لعدم لعب بطولة الدوري لكل عضو فى جروب اولتراس ديفيلز ولكل اهلاوى ولكل المهتمين بقضية الشهداء انزل من بكرة وعى الناس عرفهم بنعمل كده لييه ... عرفهم مش عايزين دورى لييه ... عرفهم حقيقة الاعلام الفاسد بداية حملة التوعية ف بيتك : عرف اهلك ووصلهم الفكرة *انزل ف منطقتك وكلم جيرانك وصحابك *انزل ف مدرستك او جامعتك وكلم صحابك *وانت ف المواصلات حاول تتكلم مع الناس كل واحد هيقتنع بيك فهو مكسب وانتصار جديد لحق الشهداء لو التعتيم والنفاق الاعلامى مشوه صورتك فانت هتبقى صوتنا للشعب نص البيان اللى هنقوم بتوزيعه ع الناس كما يلى : بعيدا عن التعتيم والنفاق الاعلامى المتواصل 1
1-لو بتسال ليه مش عاوزين الدورى يرجع ؟ طيب هو ليه اتلغى من الاساس وليه ماستكملش بعدها بفترة ... ليه وقف عشان مات 74 انسان غدر وحقهم لسه مجاش
2-طيب ليه وافقتوا على اللعب ف بطولة افريقيا ؟ *المسابقة مش تحت رعاية الاتحاد المصري اللي كان سبب في الجريمة *لوائح الاتحاد الافريقى هتمنع الاهلى من المشاركة لمدة 5 سنين قادمة *الاتحاد الافريقى لو حصلت المجزرة دى ف مسابقته كان هيتخذ عقوبات بحجم المجزرة بدون اى تواطئ
3-هى الداخلية رجعت قوتها وبقيت قادرة على تامين مباريات الدورى ؟ الداخلية لو قادرة على التامين مكانتش هتصرف حوالى 11 مليون جنيه لتامين مباراة واحدة ... ولا كانت هتجيب الالاف الجنود من الامن المركزى للتامين
4-ضميرك هيستحمل حدوث مذبحة جديدة فى اى مباراة ف الدورى ؟
5- هو فى اى استاد طبق توصيات لجان التحقيق (اسوار او مداخل او مدرجات او كاميرات ف المدرجات)؟
6-اتحاد كرة متواطئ ...اللجنة المؤقتة متغيرتش ...النادى المصرى متعاقبش ... كل المتورطين ف اتحاد الكورة والنادى المصرى لسه ف مناصبهم اذن مبدأ الثواب والعقاب مش موجود ... تقدر تدينى ضمان لعودة الدورى وعدم تكرار نفس المجزرة مرة تانية
7-كل اللى بيطالبوا بعودة النشاط بياخدوا ملايين وعايشين حياة احسن منى ومنك ... بالنسبة للاعيبة الدورى الدرجة الاولى الى الرابعة قلنا قبل كده مفيش اى مانع من استكمال مسابقاتهم
8-مستكتر ان الدورى يتأجل او يوقف عشان ابشع جريمة ف الانسانية ... خلاص فجأة الكورة بقيت اهم من الدم وبقيت مصدر رزق المصريين
9-مسالتش نفسك ليه اصحاب السبوبة و الاعلاميين الفاسدين هيموتوا على رجوع الدورى ؟
10- مفكرتش تحط نفسك مكان ام الشهيد وهى بتشوف الدورى بيتلعب وحق ابنها لسه مجاش
11- للعلم الدورى اتوقف قبل كده موسم 1990 عشان التجهيز لكاس العالم والناس رزقها متقطعش ...واتوقف قبل كده 3 شهور عشان ماتش افريقى مهم وبرضه الرزق متقطعش !!!