في عصره لمدة 30 سنة ظل مبارك مستعمرنا وحاكمنا وذللنا ومستعبدنا وقهرنا وسرقنا هوه وزوجته وأولاده، علاء وجمال ومعاهم طبعا الحاشية بتاعتهم من المسئولين الحرامية اللي مرميين دلوقتي «زي الكلاب في السجن» اللي إن شاء الله مش حيخرجوا منه إلا علي التربة وذلك لمشاركتهم في حبس شعب مصر في سجن كبير لمدة 30 سنة وانكسر هذا السجن علي إيد أعظم ثورة في تاريخ مصر والعالم وهي ثورة 25 يناير. سيادة الرئيس السابق حسني مبارك أنا من حوالي ثلاث سنين قلت لك أنا وصاحبي المسطول «إنك مبارك علي أسرتك ونحسن علي شعبك»، والحمد لله راح نحسك في يوم حبسك.. هل تعلم يا سيادة الرئيس السابق أن البورصة ارتفعت بعد حبسك وفيه استثمارات بالمليارات جايه مصر في الأيام اللي جايه.. يعني أنت فعلا كنت نحس وفقر علي شعبك ومبارك علي أسرتك فقط «اللي دخلت كلها السجن»؟ هل تعلم سيادة الرئيس السابق ان المصري رجعت له كرامته في جميع أنحاء العالم بعد ثورة 25 يناير اللي خلصتك بعد 30 سنة كنت عامل علينا فيهم راجل وأنت قاعد علي كرسيك في خدمة أمريكا وإسرائيل زي الخدامة الفلبينية؟ هل تعلم سيادة الرئيس السابق إنك جالك مرض الزهايمر وهو المرض الذي قدمه بعبقرية الزعيم عادل إمام في فيلمه الأخير زهايمر؟ سيادة الرئيس السابق أنت جالك زهايمر لأنك طالع في خطابك تشحت وتقول أنا فقير وماعنديش أي فلوس والكلام ده «ما يقُلش معايا واللي معي المساطيل أصحابي» وكلامك مالوش تفسير سوي إنك جالك زهايمر فنسيت فين فلوسك وقصورك اللي بمليارات الدولارات وأنت ناسيهم وفيه تفسير تاني قاله صاحبي المسطول ان الرئيس السابق مبارك ادحدر بيه الزمن وبيضرب بانجو زي اللي بيضربه صاحبه وحبيبه معمر القذ افي، ربنا ياخدهم همه الاتنين بدون أي رحمة عليهم لأنهم لا يستاهلوها لأنهم لم يرحموا شعبهم وسرقوه ونهبوه وعذبوه وقتلوه. يا مبارك أنت وزعيم المجانين في العالم معمر القذافي إلي جهنم داخلين أنتم الاتنين.. آمين يارب العالمين.
