حوار "1" : - ( أ ب ت ث ش ض ط ) - لا لا استني انت لخبطتي خالص يا حبيبتي تعالي نقول تاني من الاول - يوووووووووووه ما انا قولت خلاص يا ماما - ايوه بس قولتي غلط انت نسيتي ولا ايه؟ - طيب ساعديني - يالا نقول سوا ( أ ب ت ث ج ح خ د ذ ر ز .... ) شطوره افتكرتي؟ قولي لوحدك مره بقا - يوووووه تعبت بقا - انت لحقتي يا بنتي؟ - هي الاجازة امتى بقا يا ماما؟ - اجازة ايه بس ده احنا لسه تاني يوم مدرسه! حوار "2" : - المدارس بدأت والعجن والزحمة بدئوا اهم - يالا هناخد الطريق في عشر ساعات يا صباح الخصومات - هي الدنيا نقصه واقفه ( يخرج رأسه من نافذة السيارة صارخا في سيده تعبر الطريق مع اطفالها ) حوار " 3 " : - المدارس دي نعمه البيت هدووووء - اه والله يا بنتي انا عايزه اشوف مدرسة بتفضل شغالة للساعة 6 المغرب يادوب الاولاد يروحوا على النوم - نظام ونوم بدري و راحة دماغ الاجازة طولت اوي اوي وطلعوا عيني - انا ولادي نسيوا اسمهم اصلا المدرسين هيبدئوا معاهم من تحت الصفر - الله يكون في عونهم بقا حوار " 4 " : - رجعنا لوجع الدماغ تاني - هنعمل ايه بس يا ميس مها ربنا يكون في عونا - انا بروح البيت اخد شريط مسكن من الصداع - انا العيال عندي نسيوا المدرسه وراجعين يعيطوا زي اول يوم دراسة خالص - هنعمل ايه في المناهج هنلحق نخلص اذاي والعيال بتعيط واخدت على القعده في البيت؟ - هنجري بيهم هنعمل ايه يعني - طيب ما هو بصراحة كده كتير على استيعابهم - هنعملهم ايه يعني ما احنا لازم نخلص المنهج ومتأخرين جدا حوار " 5 " : - عملت ايه في الاجازة؟ - دي كانت اجازه رخمه اتحبست في البيت طبعا هو انت خرجت؟ - هنخرج اذاي يعني دي مكنتش اجازه دي كانت سجن - حتى التلفزيون بابا وماما مكنوش بيغيروا النشرة والبرامج اللي الناس بتزعق وتتخانق فيها - قضيتها نت زيي يعني - هو فيه غيره يا أصاحبي حوار " 6 " : - الاولاد مش فاهمين حاجه والمدرسين بيجروا في المنهج جامد شكلهم محتاجين دروس - دروس في كام ماده؟ - شكلهم هيحتاجوا دروس في كل المواد - يا نهار مش فايت وانا اكفي عليهم دروس في كل المواد منين - نبقى نمشيها مجموعات في المدرسه مع كام درس وربنا يعدي الترم ده على خير حوار " 7 " : - خدي بالك من نفسك يا قلب ماما - حاضر يا ماما - اغسلي ايديكي قبل الاكل ولو فيه حد عيان اوي في الفصل من اصحابك متلزقيش فيه وقولي لمدرستك - حاضر يا ماما - متنسيش تستخدمي معقم الايدين الي في شنطتك ضروري اوعي تنسي - حاضر يا ماما - لو سمعتي صوت فرقعه جامده انزلي تحت الديسك بتاعك وخليكي في مكانك متجريش على السلالم مع اصحابك الي بيجروا ومتخافيش - هما بيفرقعوا في مصر ليه يا ماما؟ - ( اعجز عن الإجابة ) - هي المظاهرات وحشه و اشرار ؟ - ( اعجز عن الإجابة مرة ثانية ) - ماما ؟ - المهم انت اسمعي كلامي وخدي بالك من نفسك ومتخافيش ابدا ان شاء الله كل حاجه هتبقا تمام .. اتفقنا؟؟ - اتفقنا تذهب الى مدرستها و انا منخلعة القلب خلفها , متضرعة الى الله ان يحفظها هي وكل اطفالنا بحفظه وبعينه التي لا تغفل ولا تنام .
