طبعا مش محتاج أضحكك أنت أصلا مش قادر تبطل ضحك عارف. أيوه مش قادر تبطل ضحك من كتر الغيظ ....متبقاش مصرى لو معملتش كده .... ليك حق مش عارف أقولك أيه الصراحة.....فكهانية وسمكرية وميكانيكية ومعلمين وربات بيوت وتوليفة غريبة كله عمال يجرى يسحب أستمارة الترشح لرئاسة الجمهورية....لكن خلينى أغيظك زيادة وأسألك لحد أمتى هيضحكوا علينا .....بمنتهى البراءة والتفاؤل أنتخبتم الإخوان والسلفيين فى إنتخابات مجلسى الشعب والشورى والنتيجة أيه فى جلسات مجلس الشعب كأنك بتشوف أفلام تسجيلية لفصول أولى إبتدائى فى المدرسة بيتخانقوا على مين اللى يتكلم الأول ومين اللى يتكلم أكتر ومناخير فلان وودان علان ...الله هو أحنا أنتخبنا الناس دى عشان كده....عارف هتقول أيه ...أنتخبتهم علشان التغيير وقولت يمكن بتوع الدين نصعب عليهم ويتقوا ربنا فينا بعد ما كل التيارات خدتنا غسيل ومكواه قبل كده .....مجلس الشورى بقى بيفكرنى بتريقتى زمان من حوالى سنتين كده لو الحكم فى مصر بقى إسلامى لما كنت بقول لزملائى خلاص بعد كده هنيجى إجتماع التحرير بالجلباب وبالسواك والبنات بالإسدال أو الحجاب والنقاب ورئيس التحرير لازم يبقى محرم.....أفتكرت ده لما شوفت تصريح الراجل الجديد بتاع مجلس الشورى هو ياربى ولا قواد نافع ولا رجل دين نافع ماقولنا قبل كده ألغوا مجلس الشورى ده شوفوا بيكلفنا كام كل سنة هو أحنا ناقصين خساير.......لو سألتنى طب نعمل أيه فى الإنتخابات الرئاسية هأقولك أنا بالنسبة لى مش هأنتخب ولا عمرو موسى ولا أحمد شفيق ولا أبو الفتوح ولا أبو إسماعيل ولاحمدين صباحى ولا عمر سليمان - لو أترشح- ولا ممدوح قطب ولا منصور حسن ولا أيمن نور ولا حتى أبو العز الحريرى مع أنى يسارى لكن خلينى أعترفلك إن اليسارين فى مصر شوهوا صورة اليسار .....أتنين جعجعاين أوى فى مصر اليسارين والناصرين دول شوهوا صورة اليسار ودول شوهوا صورة عبد الناصر ...أما الحاج أيمن نور بقى فهو بتاع أمريكا وش ومحدش والنبى يناهدنى سبب تطليقه لجميلة إسماعيل أنهم أختلفوا على النسبة اللى بيأخدوها من أمريكا هى قالت له نصيبك خلصته عليك وأنت مسجون وهو زعل وعلى رأى المثل" مبروم على مبروم مايلفش" وطبعا بثينة كامل لا ولا ليه " ده هتعرفه فى العدد الأول من جريدة الشرق الأوسط اليوم اللى بتشرف أنى أكون رئيس تحريرها موضوع عنها وبالمستندات واللى هيبقى موجود عند باعة الصحف يوم الأحد 18 مارس" أحترت معايا وبتسأل هأنتخب مين .... بص ياسيدى أنا الموجودين دلوقتى مش هأنتخب حد ولو المرشح اللى أنا عايزه مظهرش مش هأنتخب حد ....تقول بقى سلبى مش عارف أيه.....أنا عندى إستعداد أبقى سلبى ... بس معنديش أى إستعداد أشارك فى مهزلة مصطفى محمد [email protected]
