"أحمد عز صديق عائلة وأسرة، يعني بيقعد في بيت أبويا وأمي أكتر مني، كمان هو ممثل ذكي جدا ونشيط وطموح، وأنا نفس القطعية، معندناش مشاكل في حاجة " هكذا تحدث السقا عن عز والذي يشاركه بطوله أحدث أفلامه "المصلحة". السقا قال أن فيلم " المصلحة " من إخراج ساندرا نشأت وتشارك في بطولته حنان ترك وزينة وصلاح عبد الله وعمرو يوسف وأحمد السعدني وجاري اختيار باقي فريق العمل، على أن يبدأ في التصوير يوم 20 يناير المقبل بإذن الله .. السقا في نفس الوقت قال فى تصريح خاص لبوابة الشباب أنه تلقى عروضاً في الفترة الماضية لعدد من الأدوار في السينما العالمية، مضيفا "مش هقولك لأ مرضتش علشان أنا تعاليت والكلام الفاضي ده، خلينا نتكلم بصراحة، كل الحكاية إني راجل قيمتي هنا، هبهدل نفسي هناك ليه؟ وعلشان محدش يفهم إني بتكلم وبلقح كلام على الزملاء علشان أنا مابعملش كده، أنا اللي اتعرض عليه مايناسبنيش، يناسب غيري لكن مايناسبنيش، أطلع أقول كلمتين ؟ طيب ما أنا حلو في بلدي وجميل ". السقا اعترض على فكرة الظهور في مجرد مشهد لادعاء العالمية ..وقال موجها كلامه لمن يطلبون مشاركته في أفلامهم " لما تعوزوني علشان أبقى ممثل للشرق الأوسط أو للعرب في فيلم من أفلامكم كممثل وليس "أطلع أقول الله أكبر وأتف على الأرض والحاجات دي" هاجي أمثل وهشرفكم وممكن أبقى أحسن واحد كمان ، بس أروح أبهدل نفسي..لأ أنا آسف. وأضاف السقا " أنا نفسي لغاية لما أموت ابقى أحسن ممثل في الدنيا، ومش شرط أبقى أحسن ممثل في الدنيا ، بس أنا طموحي أبقى أحسن ممثل في الدنيا بشرف ونزاهة ونبل، الكمال لله، بس طول ما في نفس همشي للأفضل". وعن مستقبل السينما مع الظروف الصعبة التي تمر بها الآن قال أنه سيكون كذاباً لو قال هو شايف إيه هو مستقبل السينما، ولكنه يرى انه في الفترة القادمة ستزيد أفلام "الإنتاج المتواضع" والتقنية ستسهل أشياء كثيرة، أيضا سيحدث تطور في الجرافيك، مضيفا "مكن تصور فيلماً كاملاً في غرفة مثل هذه، أرجو أننا نستخدم هذه التقنيات لما يفيد الدراما، مش علشان نسهل، التكنولوجيا اللي هتحصل دي إما هتودينا في داهية أو هنستخدمها بشكل كويس ومفيد ".
