معظم المشاكل لها حلول.. نحن نفكر معًا لإيجادها.. ممكن نخطئ وممكن نصيب المهم أننا نحاول.. والأهم ألا نيأس مهما تكاثرت همومنا. ونذكر بعضنا البعض دومًا بالمثل الشعبى الجميل: تبات نار تصبح رماد .
بكره أبويا وأخويا!
اللى هأقوله يمكن يبان فيه تفاهة لكن واجعنى ومأثر فيّا لدرجه كبيرة هتستغربى لو قلت لك إنى بدأت أكره أبويا وأخويا..؟ أيوة التفرقة فى المعاملة بين الولد والبنات شيء مدمر نفسيتى أنا وأخواتى البنات، أخونا من أم تانية، أمه لما توفيت، أبونا اتجوز أمنا وخلفونا أنا و3 أخواتى كلنا بنات، مع الوقت أما كبرنا فهمنا يعنى أيه أبونا بيفضل أخونا علينا رغم أن أمى احتضنته وربته من وهو بيبى ومكنش يعرف أنها مش مامته إلا لما كبر، المشكلة كل يوم تكبر جوا نفسى خصوصا أما بابا يدى أخويا الآلاف أدامى وأنا وأخواتى أما نطلب حاجة يبقى بالقطارة ورغم إن أخويا اتجوز لكنه غير مستقل ماديا ده غير إن مرتبه أصلا كبير لكنه معتمد ع بابا ف حياته، يجيب عربية ويغيرها مرة واتنين وتلاتة وأنا وأخواتى لما طلبنا عربية مشتركة لنا ولا حياة لمن تنادى، بجد بدأت أكرههم ولما الإحساس ده بدأ يكبر جوايا قلت أحكيلك وتنصحينى أعمل إيه؟! الحل المقترح: أبوكى شايف اللى أنت مش شايفاه !
بداية التفرقة بين الإخوات طبعا مرفوضة شكلا وموضوعا بس خلينا نفكر سوا ليه أبوكى ممكن يكون بيعمل كده.. يمكن علشان أخوكى يتيم الأم.. هو صحيح بياخد عربية وفلوس بس معندوش أم ودى مفيش أى حاجة فى الدنيا تعوضها.. ومهما كنت شايفة إن أخوكى وضعه حلو أكيد فيه حتة من الصورة إنتى مش شايفاها، حتة اليتم وتأثيرها عليه.. يمكن باباكى شايف إنه هو ده العدل، أنه كده بيعوض ابنه اليتيم عن فقد أمه بالفلوس، دا مش معناه إن تصرفه دا صح، لا خالص، أنا بحاول أفكر هو بيعمل كده ليه، ودائما أما بنحط نفسنا مكان اللى قدامنا زعلنا منهم بيقل. جايز بيعوضه عن اللى فات.. بس هو مش عارف إنه بتصرفه دا بيكره الإخوات فى بعض أما يفرق فى المعاملة.. ومش بس فى الفلوس.. حتى فى الدلع، الكلمة الحلوة، فى التشجيع، وحتى فى العقاب، يعنى كله يتعاقب بنفس الطريقة وأى تفاصيل ممكن تبان صغيرة بس بتفرق أوى بين الأخوات.. حتى شق التمرة! زى ما قال سيدنا النبى.. ويمكن فيه حاجة إنتى ما تعرفيهاش! مش يمكن دى فلوس ميراث أخوكى من مامته؟! مش يمكن سبب المستوى اللى باباكى فيه دا من ورا فلوس زوجته الأولى؟ يمكن بيدى لابنه من فلوس مامته؟ ومستحرم يديكم من فلوسها؟ دى فرضية تانية لازم تحطيها فى عين الاعتبار.. بعدين وإيه دور مامتك فى الموضوع دا؟هى موافقة على التفرقة؟! اتكلموا معاها هى الصورة عندها أوضح. يمكن عندها زاوية أنتو مش شايفينها؟ وبعدين جربتوا تتكلموا مع أبوكم؟ بهدوء كدة يمكن تشرحوا له مشاعركم.. وأخيرا خدى بالك إن المشكلة كمان جواكى لأنك بتقارني! حاولى تشيلى من دماغك علاقة أبوكى بأخوكيً وقربي من باباكي… وحاولى تقربى من أخوكى وحبيه وحنى عليه.. طبعا دا محتاج قلب كبير وتسامح كتير.. بس الحب دائما بيكسب. والقرار قرارك.
