البنت المصرية فى عيون العالم كله تعنى العزة والأصالة والأخلاق، والنظرة ليها بتكون نظرة احترام وتقدير، وخصوصا لما نزلت التحرير، وشاركت زيها زى الراجل فى نجاح الثورة، لكن بيؤلمنى جدا لما ألاقى ست أو بنت مصرية بتتكلم فى عرض بنات التحرير، وشايفه إنهم يستاهلوا اللى بيجرالهم من سحل وضرب وتشويه للسمعة، ونفس الأسئله المستفزة بسمعها كل يوم زى هو إيه اللى نزلها؟ مايتلموا و يقعدوا فى البيت، إيه اللى خلاهم يقفوا قدام الجيش؟ الست المحترمه تعمل حسابها تلبس كويس قبل ما تنزل علشان لما تضرب و لا تتسحل ما تتعراش، ما كفايه إنها تبعت دواء و أكل وشرب مع الرجاله وخلاص.. أنا عن نفسى بشوف الأم أو البنت اللى بتنزل التحرير دى ست عظيمة، لأنى أم، ولما حطيت نفسى مكان أمهات التحرير وبناتهن، لقيت نفسى مكنتش هوافق زيهم إن بنتى تنزل التحرير، على الرغم من أن الهدف سامى وأنا مقتنعه بيه، لكنى مش قادرة اتغلب على الإنسانه الجبانه اللى جوايا، وأعتقد إن السيدات والبنات اللى بيخوضوا فى أعراض بنات وسيدات التحرير الأحرار، هما نفسهم مقيدين بالجبن بردوا، وعارفين إنهم لو قدروا يكسروا حاجز الخوف ده هيعملوا زيهم ويمكن أكتر منهم، لكنهم بيفضلوا إنهم يتفرجوا على قناة فتافيت وموجة كوميدى والمسلسلات التركيه على أى حاجه تانيه.. كلمة أخيرة ليهم أنتم أحرار بس اتقوا الله فى حرائر مصر، ولاترموا المحصنات بالباطل لأنهم أشراف، وعلمونا إزاى نبقى مجتمع حر، فيا رب نكون نصهم فى يوم من الأيام، ونربى ولادنا على «عيش ..حريه..عداله اجتماعية». مروة صلاح