تم فى الفترة الأخيرة تداول مقطع فيديو لبنت مصرية يتم سحلها و تجريدها من ملابسها خلال الأحداث الأخيرة لشارع القصر العينى...و طبعا بطبيعة شعبنا المصرى اللطيف ظهرت كمية تعليقات و تبريرات غريبة للضرب و السحل و الأهانة دى ومنها : 1. الصورة دى فوتوشوب 2. و هى ليه لابسة العباية من غير هدوم تحتيها !! 3. ازاى اهلها سايبنها تنزل التحرير اصلا ؟ 4. دى متأجرة من 6 ابريل و ايران و قطر و اسرائيل و امريكا و....إلخ لتشويه صورة الجيش عزيزى المواطن الظريف اللطيف صاحب التحليلات العميقة و النظرات الأيدلوجية الثاقبة لأى موقف بيحصل ياريت تسمع وجهة نظرى بعيدا عن أى شئ وعلى فكرة العيب مش عليكم اعزائى مواطنى حزب الكنبة..ابسليوتلى.. العيب على الأعلام اللطيف اللى استطاع و بجدارة انه يحول حياتنا لمسلسل اللهو الخفى الذى يقوم ببطولته دائما الطرف الثالث الذى يعبث بشئون امننا و سلامتنا ...و الدولة بسلامتها بجهاز مخابرتها و بأمن الدولة-عفوا- و بالأمن الوطنى و بجهاز الداخلية و بالجيش و بالمجلس العسكرى مش عارفيين يعثروا عليه "الطرف التالت"لحد دلوقتي !! اعزائى الثورجية دعونا نرضى بهذا الأمر الواقع و تلك النظرات التحليلية الرهيبة.. فأولئك المواطنون ليس لهم ذنب على الأطلاق..تخيل معى مثلا : كائن يجلس على "الكنبة" 24 ساعة.. يحمل فى يديه "ريموتا" ملفوفا فى كيس بلاستيك اصيل كعادة كل أهالينا...يتنقل بين برامج التوك شو المختلفة و يستقى منها كل معلوماته...تخيل معى عندما تفتح قناة فضائية تجد صاحبها يتحدث اليك بلهجة ريفية بسيطة تجعلك تستسلم له بكل حواسك و تغفو فى حلم عميق ..و لكنك سرعان ما تستيقظ من ذلك الحلم على تحليلاته للأمور و نظرته الجوهرية لما يحدث ...و إليك عزيزى القارئ تحليله لمقطع الفيديو إياه.. : صورتك المتفبركة اثبتت انك لابسة على اللحم...لابسالى على اللحم ليه ياختى..و لابسالى ملابس داخلية لونها لبنى اللى عرفت بعدين انها مش ملابس داخلية ده مايوه بكينى..هوا الفيلم الى عملوا خالد يوسف بتاع "حين ميسرة" بيتنفذ طبيعى فى شارع مجلس الوزراء و لا ايه؟؟؟ هوا احنا هنشتغل بعض و لا ايه ده احنا دافنينوا سوا ؟؟ ده احنا عندنا الست فى البلد بتلبس كلسون و فوقه بنطلون و فوقه جلابية اما الناس الى بتلبس الحاجات دى على العرى يا اما حاجتين..يا اما شاربين كاسين مسخننين جتتهم يا أما ضاربين برشامتين.. بالطبع..اتأسف لك عزيزى القارئ على ما قرأته من اسلوب ركيك يتحدث به اعلامى مشهور.. ومن الفاظ نابية جرحت مشاعرك..بس تخيل لما يكون عندك فى بلدك قناة اعلامية فيها انسان زى ده بيتحدث باسلوب زى ده و بطريقة زى دى و بيخاطب بيها ابناء بلدك...فهمتوا ليه يا اعزائى الثورجية اننا لازم نعذر مواطنى حزب الكنبة ؟؟ سيدى الأعلامى...سيدى المواطن... تعالى اعرضلك وجهة نظرى..يمكن يكون الفرج على ايدى ولاحاجة.. 1. لاحظ معايا الفيديو هتلاقى فى الأول العسكرى بيسحبها من البادى الأسود الى تحت العباية..لأنه لو كان بيسحبها من الطرحة كان زمانها اتشالت فى ايده مش محتاجة ذكاء ! 2. بعدين لما تم سحلها هتلاقى اتنين من العساكر ماسكين بأطراف البادى الأسود لدرجة انه غطى وشها تماما...و بعدين اتقطع نصين فى ايديهم ده اول رد على من اتهمها انها كانت لابسة على اللحم..مع الأعتذار لكل البنات و السيدات لأنك مش من حقك تحكم عليا البس ايه تحت العباية و ملبسش ايه..شئ ميخصكش !! ثانيا : لكل من بيقولوا ازاى اهلها سابوها تنزل التحرير اصلا.. زمان ايام الرسول –عليه الصلاة و السلام- كانت الستات بتنزل تحارب معاهم فى المعارك بالسيوف و الفروسية زيهم زى الرجالة بالظبط ! ايام العدوان الثلاثى على بورسعيد كان فى فرقة كاملة من البنات اتطوعت فى الجيش المصرى و حاربت ضد العدوان..تخيل !! اصل المرأة طول عمرها كده..المرأة طول عمرها هى هدى شعراوى و هى صفية زغلول و هى و هى وهى....إلخ ...و انا واحدة من الناس لولا اهلى.. كان زمانى مطلعتش من التحرير اصلا..فتخيل معايا بقى لو هى اختك مثلا و نزلت من وراك التحرير عشان تتظاهر بطريقة سلمية و حصلها الى حصل ده...هل ده كان هيبقى نفس موقفك ؟؟ و كلمة أخيرة بقى لأختى اللى اتعرت فى التحرير...صدقينى انتى متعرتيش..انتى عريتى رجال مصر كلها...كشفتى اصحاب الدقون الى كانوا من كام شهر بيتهافتوا لأنقاذ "اختى كاميليا" و دلوقتى ولا حد فيهم اتحرك جواه ذرة نخوة و حاول ياخد موقف...متخافيش حقك هيرجعلك...و لو مجاش فانا بنصح كل رجالة مصر من موقعى هنا انها تحلق شنباتها و اخيرا لكل من رمى البنت دى بالألفاظ و اتعدى عليها و هوا ميعرفش عنها حاجة اصلا..لن اجد ابلغ من كلمات ربى لتكون لك خير رد "الَّذِينَ يَرْمُونَ الْمُحْصَنَاتِ ثُمَّ لَمْ يَأْتُوا بِأَرْبَعَةِ شُهَدَاءَ فَاجْلِدُوهُمْ ثَمَانِينَ جَلْدَةً وَلَا تَقْبَلُوا لَهُمْ شَهَادَة أَبَدًا وَأُولَئِكَ هُمُ الْفَاسِقُونَ"