استعاد المخرج محمد سامي ذكريات بداياته الفنية مع الفنان تامر حسني، ونشر صورة تجمعهما وتحدث عن مسلسل "آدم" الذي جمعهما. وشارك سامي جمهوره ومتابعي حسابه الرسمي على "إنستجرام"، بتعليق على الصورة، كتب فيه: "ولا تنسوا الفضل بينكم، وأنا قاعد امبارح في التصوير افتكرت الرحلة والشقا والتعب من أول عمل لحد العمل اللي بصوره دلوقتي، وافتكرت صعوبة الحصول على فرصة عشان الواحد يثبت نفسه ويحقق أحلامه، فطبعًا افتكرت أخويا وصاحبي الجدع الطيب الخلوق اللي دعمني من أول لحظة وكان سبب في اللي انا فيه دلوقتي، تامر قدم لي كل الدعم والحب والإمكانيات اللي خلتني أثبت نفسي وبالذات في وقت كان صعب الشباب ياخد في الدراما فرصة بحجم مسلسل آدم". واستكمل: "فاكر ان الكل كان رافض اني اخد الفرصة دي ومستكبرينها عليا إلا هو وقف في ضهري كأنه بيحارب لأخوه وبصلي مرة والظروف ضدي وكنت حاسس وأنا بحضر انهم هيجيبوا حد غيري وقالي ده مسلسلك وهتعمله وهتنجح وهتنجحنا معاك، حتى طريقته المتواضعة وهو بيقولي مسلسلك كأني عامل تسع مسلسلات قبله تحسس الواحد بنفسه وأهميته، أشهد أمام الله انك طول عمرك متواضع ومؤدب وتطلب الحاجة باحترام، ومع الكرو محترم عشان كده كلنا روحنا فيك، بحبك يا صاحبي وتستاهل كل حاجة حلوة يا أجمل قلب، ويا رب يرزق كل الناس باللي يساعدهم على تحقيق أحلامهم زي ما رزقني بتامر حسني". ويواصل المخرج محمد سامي تصوير مسلسله الجديد "إش إش" بطولة الفنانة مي عمر والمقرر عرضه بموسم دراما رمضان 2025، وتجسد مي عمر شخصية راقصة درجة ثالثة من محافظة الإسكندرية، ويشاركها البطولة كلا من ماجد المصري، هالة صدقي، إدوارد، إنتصار، دينا، تأليف وإخراج محمد سامي. وكانت أخر مشاركات محمد سامي الإخراجية ببرنامج "بيت السعد" تقديم عمرو سعد وأحمد سعد ويعرض على قناة "Mbc مصر" ويستضيفان خلاله عدد من أبرز النجوم ويتخلل البرنامج العديد من الفقرات الفنية والكوميدية. اقرأ أيضا: مؤلف "فهد البطل" لأحمد العوضي يكشف عن فرصة للموهوبين للمشاركة في المسلسل
