تتنافس البرامج التليفزيونية كل أسبوع على استضافة أشهر نجوم ونجمات الفن، للحديث عن أمور شخصية وفنية، تضمن الخروج بتصريحات جريئة، تحقق أعلى نسب مشاهدة.. وفي السطور التالية، يستعرض "مصراوي"، أبرز 7 تصريحات لأهل الفن في البرامج الفنية خلال الأسبوع الماضي: محمد صبحي صحيح، أنه لم يقل هذا التصريح في برنامج تليفزيوني، إلا أن البرامج التليفزيونية تناولته وأعادت الحديث عنه، هو الفنان محمد صبحي، الذي ذكر ضمن تعليقه على من يهاجمون مصر من الخارج، خلال تواجده في ندوة تحمل عنوان "مستقبلنا في عيون شبابنا"، احتفالًا بذكرى تحرير سيناء، ونظمتها كلية الإعلام بجامعة السويس، أنه طرد الفنان هشام عبدالله الذي يعمل حاليًا مذيعًا في قناة الشرق، وكشف عن السبب الذي دفعه لذلك، قائلًا "طردت فنان من المسرح لأنه بيشرب مخدرات وخمرة في المسرح، هتستعجبوا الممثل هشام عبدالله البغبغان، كان جاي يتمرن ولقيته بيشرت مخدرات وخمرة فطردته بره المسرح". إلهام شاهين أثار تعليق الصحفية الكويتية فجر السعيد، على مظهر الفنانة الكبيرة نجلاء فتحي، ونصيحتها لها بعدم الظهور في هذا السن أو إجراء عمليات تجميل، حتى يظل الجمهور محتفظًا بصورتها الجميلة في ذهنه، أثار أزمة كبيرة، وخرج عدد كبير من الفنانين لمهاجمة فجر، وفي مقدمتهم الفنانة إلهام شاهين. وبعثت إلهام أثناء استضافتها في برنامج "العاشرة مساء" على قناة دريم، تقديم الإعلامي وائل الإبراشي، برسالة تهديد لفجر، وقالت "فنانين مصر خط أحمر متقربش منهم، ما قولتيه مش انتقاد، لما تقوليلي انك عجزتي وكبرتي ده مش انتقاد، انتقديني في فن في رأي، متشوفيش صوري متابعنيش إنتي مالك إنتي دخلك إيه". وتابعت "إنتي طول النهار عايزة تعملي عمليات تجميل إنتي حرة في نفسك، إحنا مبسوطين بشكلنا كدا ونكبر عادي لأنه مش حاجة عيب، إحنا نعرف نرد عليكي كويس، مصر مش سهلة ولا الفنانين سهلين، واحذرينا، بهددها مش هنقبل إهانة لأي حد". سلوى خطاب واستضافت سمر يسري في برنامج "أنا وأنا" على قناة ON E، الفنانة سلوى خطاب، والتي تحدثت عن حياتها الفنية والشخصية، وقالت "خدت دكتوراة في الحب وقعدت فيه كام سنة، مش هتمر عليا قصة حب قوية كده، والحمد لله انتهت بالزواج اخدت اللقب وخلاص، لو مكنتش خدت اللقب كنت زعلت، لقب مُطلقة لطيف الواحد يتباهى بيه مش أحسن من إني أبقى عانس مرسيه يا أسامة –زوجها السابق- انك اتجوزتني وادتني اللقب". أمير عيد وفي برنامج "معكم" الذي تقدمه الإعلامية منى الشاذلي على قناة CBC، كشف أمير عيد مطرب فرقة "كايروكي"، حقيقة تعاطيه للمخدرات، وقال "لا مش بتعاطى حاجة خالص، سبب فقدان الوزن إني كنت بتعب على طول (برجع)، رحت لدكتور صاحبي في نفس التوقيت ده قلت اخس وبدأت آكل أكل صحي، وقرفت من الأكل شوية بقيت مش بحب الأكل أوي، بقى عندي مشكلة مع الأكل، مكوناته نضيف مش نضيف، لغاية دلوقتي مش حاسس إني حابب الأكل". وتابع "أنا تخين مكنش الوضع عجبني لما خسيت لقيت الوضع أحسن، وكل لما أشوف الأكل أحس إني هتخن تاني، مراتي خدتني لدكتور خواجة قالي اني كويس بس محتاج أتناول الأكل اللي بحبه وعملت كدا وبكميات كويسة رجعت اتخن تاني حوالي 10 كيلو، كنت حوالي 115 كيلو ونزلت بقيت 66 كيلو والآن اصبحت 73 كيلو". محمود سعد في برنامجه "باب الخلق"، المعروض على قناة النهار، نفى الإعلامي محمود سعد، ما تم تداوله على أحد المواقع الالكترونية، بشأن رفضه فكرة تواجد الفنانة فيفي عبده على قناة النهار من خلال برنامج ستقدمه في رمضان، وقال "بَتشتم زي ما انتم عايزين مفيش مشاكل خالص، أنا فاكر مرة أحمد زكي نزله خبر زي كدا خد المسدس بتاعه وراح الجرنان كسره. يشتموني أنا يقولوا أي حاجة لكن إن أنا زعلان إن الست فيفي عبده صاحبتنا واختنا هتعمل برنامج في النهار، عيب ميصحش انا اصلا مش بشتغل في رمضان من سبع سنين من بعد 2011 مشتغلناش ". محمود العسيلي في فقرة قصيرة على برنامج "أون سكرين"، عبر قناة ON E، كشف المطرب محمود العسيلي عن السبب الذي يدفعه لتصوير كليباته خارج مصر، وقال "سبب تصوير الأغاني خارج مصر، موضوع معقد جدا، بنصور عشان بعض الدول أرخص بكتير من مصر وأسهل، في صمر الموضوع بياخد إجراءات كتير وتصاريح وبيروقراطية ومشاكل في الشارع وانتي بتصوري، وأجور الناس في مصر أغلى بكتير من أوروبا". نادين كشفت الفنانة نادين في برنامج "السفيرة عزيزة" المعروض على قناة DMC، عن سبب ابتعادها عن الساحة الفنية، وقالت "لما ظهرت كنت لسه في الجامعة، اشتغلت 3 سنين، وأنا من وقت للتاني بقعد مع نفسي وأرتب أولوياتي، وكنت عايزة أكون أسرة تاخد كل اهتمامي محتاجة أوقف المشروع، لكن عمري ما توقفت عن الشغل، الشغل النمطي المرتبط بمواعيد حاجة والارتباط بالفن حاجة تانية". وتابعت "مكنتش لسه قابلت جوزي، والقرار كأنه كان علامة، فكرة بتجيلك بتستسلمي ليها العلامات دي ليها معنى، توقفت وفي نفس السنة قابلت زوجي وكونت أسرة لطيفة عندي 3 أولاد أعمارهم 13 و10 و8 سنين".
