كشف الفنان أحمد أمين، عن سبب توقف تقديم برنامج "البلاتوه"، عبر صفحته على موقع التواصل الاجتماعى "تويتر". وقال أحمد أمين: "برنامج البلاتوه وقف.. والحلقات المعروضة حاليا حلقات معادة.. وداخلين على سنة كاملة تقريبا ما عملناش حلقات جديدة.. توقف البرنامج كان بسبب قرار من قناة النهار تعرضهم لبعض المشاكل المالية والتفاصيل أنا مش عارفها.. للأسف ده ترتب عليه حاجات كتير. وأضاف "أمين" قائلا: "اعتذرت عن كل الشغل اللي كان ممكن اعمله عشان عايز اتفرغ للبرنامج وكانت القناة بتوعدنا كتير اننا راجعين لكن كلها كانت وعود وبس والله يعينهم على التحديات اللي هما فيها.. فبقيت قاعد في البيت مكبوت عندي حاجات عايز اقولها ومش عارف.. ولاني متعاقد مع القناة ماليش حق اني اشتغل في قناة تانية. وأشار قائلا: "القناة بدأت تنزل اعلانات على المحتوى القديم بطريقة مسيئة جدا للمحتوى.. وطبعا انا اعترضت كذا مرة ومفيش فايدة.. فابتدت توصلني تعليقات سلبية من ناس ليها كل الحق تزعل لأن أنا شخصيا منزعج وبقيت ما بحبش اشوف صفحة البرنامج ولا فيديوهات البلاتوه طبعا مع كل الاحترام للإعلان نفسه والمعلن لكن انك تقطع عمل فني وتحشر فيه اعلان بالشكل ده.. عيب. وأوضح أمين قائلا : كل يوم ناس كتير بتسألني البلاتوه فين.. وأنا ما كنتش عايز ارد احتراما للقناة اللي كانت سبب في ظهور أول برنامج تلفزيوني ليا.. بس أنا كنت ساكت طول الفترة اللي فاتت عشان فيه ناس من فريق العمل ليهم مستحقات مالية ولسه لغاية النهارده ماخدوش فلوسهم (وانا منهم) فكنت اتمنى اننا نرجع نشتغل لكن يبدو ان مافيش فايدة.. أنا ممكن اتحمل كل المشاكل السابقة إلا ان الناس تبدأ تزعل من محتوى أنا تعبت فيه عشان يسعدهم ويرضيهم.. ادعو لي اعرف ارجع اقدم اللي كنت بحبه زي ما كنت.. واشكركم على صبركم علينا.. وبعتذر عن كل إساءة أو تأخير ياريت القرار كان في ايدي.. لكن ما باليد حيلة.. وربنا يكتب لنا رزقنا في فرصة حلوة جديدة اعرف اعمل لكم حاجة تسعدكم".
