قالت الطالبة مريهان فيصل عبدالحميد حرحش، بمدرسة البحر المتوسط والحاصلة على المركز الثانى، مكرر شعبة أدبى، على مستوى الجمهورية، ل«الوطن»: «أنا كنت حاسة إنى حكون من الأوائل بس ما كنتش عايزة أحط أمل كبير علشان لو ما طلعتش ما زعلش وأفضل حزينة، بس الحمد لله ربنا ما ضيعش تعبى، أنا على طول كنت بطلع الأولى على المدرسة». وأضافت: «أول ما ماما سمعت الخبر بكت، وقالت الحمد لله تعبك ما رحش هدر، كلنا فرحانين فى البيت ومش قادرين نستوعب، أنا مصدقتش غير لما شفت بعينى صورتى نازلة على النت وأنا الثانية مكرر، وكمان مكتب الوزير كلم أخويا فى البيت على التليفون الأرضى وبلغه علشان إحنا مكناش فى البيت». وتابعت حديثها قائلة: «أنا فى مدرسة حكومى والحمد لله كنت من أوائل الثانوية العامة، علشان الناس تتأكد أن مش كل الأوائل يكونوا من المدارس الخاصة، بالعكس المدارس الحكومية فى طلاب شاطرين». وأشارت «مريهان» إلى أنها ستلتحق بكلية الحقوق إنجليزى جامعة الإسكندرية، وذلك لتكون مثل والدها الذى يعتبر المثل الأعلى لها، قائلة: «أنا حدخل حقوق إنجليزى علشان أنا بحب القوانين والعدل ونفسى أحقق حاجة فى المجال ده وأكون زى والدى لأنه قاضى، أنا نفسى أدرس القوانين وأتعين معيدة فى الكلية وأعلم الطلاب الحق والعدل».واستطردت حديثها قائلة: «أنا عايزة أوجه رسالة للبلد، لازم التعليم يتقدم ويكون فى اهتمام أكبر بالعملية التعليمية وبالمدارس الحكومية لأنها بتخرج طلاب متوفقين وأوائل وكمان بيكونوا فى عباقرة، ولازم كمان يكون فى اعتماد على المدرسة لأن فى طلاب شاطرين بسبب مش بيكونوا من الأوائل علشان مش قادرين يأخذوا دروس فى كل المواد». وقالت: «رسالة لطلاب الثانوية العامة لا تخافوا من المذاكرة وخلى عندكم هدف، علشان تحققوا حلمكم».