انتقد المطرب مصطفى كامل، نقيب الموسيقيين السابق، قرار النقابة باستحداث شعبة جديدة لمُغني المهرجانات تحمل اسم "الأداء الفني". وقال كامل، خلال حواره مع الإعلامية بسمة وهبة، مقدمة برنامج "كل يوم"، عبر شاشة "on e": "أي حد لو غنى بابا فين بابا هنا ده أداء فني، وأمي لما بتقف في المطبخ وتقول هل رأى الحب سكارى تاخد كارنيه؟". وأضاف: "قلت إن كل من هو صوته جيد ومقبول يعني بيغني، معظم جيلنا نجوم سوبر ستار وأعضاء عاملين داخل النقابة ورقاصات معاها كارنيه عامل في النقابة، وناس مش بتشتغل الشغلانة ومعاها الكارنيه". وتابع: "المهرجانات نوع من المزيكا، ومن حق الولاد يغنوا زي شعبان عبدالرحيم، وكل من يصلح للغناء والأداء لازم ياخد كارنيه ولكن في حدود الآداب العامة". وأردف: "هاني شاكر صاحبي من 25 سنة، لكنه أخد قرار ورجع فيه، وكانت من ضمن مناشداتي إننا نهتم بأي صوت كويس زي شعبان عبدالرحيم وسعد الصغير، ونهتم بحسن الأداء، كنت أتمنى إن القرار يكون لجنة من خارج النقابة عشان يختبروا مغني المهرجانات، عشان كان في مطربين بيقولوا إنهم بيطلبوا يروحوا أفراح ببلاش لناس من النقابة". وواصل: "الكلام ده اتقالي شخصيًا واتقالي على الفلوس اللي اتطلبت منهم، وكلمني مطرب عمل شوشرة على باب النقابة، وقالي على إن في 2 طلبوا منه 300 و400 ألف جنيه، ولما كنت النقيب كان عندي فرح مع مطرب، وقالي على عضو مجلس لازم أجيب له موبايلات شهريًا، والمطرب ده حي يرزق".