يا عم دي عيال خرعة ودماغها فاضية وملهمش هدف. * إزاى ..؟ دي عيال في منتهى الرجولة، وبعدين مين اللي قال ملهمش هدف، أولاً في المرحلة دي من السن بيكون الشاب مليان طاقة وحماس وكمان عايز يظهر، وثانيًا العيال دي مرتبين ومنظمين وليهم قائد وكلهم بيحترموه وشكلهم حلو وبيعملوا بهجة في المدرجات. - لو كل شيء مرتب ومنظم بقى راجل، كنا جبنا قوالب طوب ورصناها ورتبناها وكتبنا عليه يافطة بتقول (رجالة). * يا أخي لازم تعذرهم، العيال دي اتولدت لقت نفسها قدام عائلة مبارك وصفوت الشريف وحبيب العادلي وأحمد عز وغيرهم، يعني اتولدوا على إيد الظلم نفسه، ومن الطبيعي إنهم يحاولوا تفريغ الطاقة اللي جواهم. - حلو أوي.. يعني الطنطيط والظيطة والشماريخ اللي بيعملوها في كل المباريات والمناسبات تفريغ طاقة..؟ طيب ما يلعبوا رياضة، يقرأوا كتاب، يجمعوا نفسهم وينظفوا الأحياء بتاعتهم، يحفظوا العيال قرآن، يعلموا الأميين. * يا ابني البلد لسه على قديمه هيلعبوا رياضة فين..؟ من كتر النوادي، ده إحنا بنمشي في الشوارع بالعافية، وكمان أسعار الكتب غالية نار، حتى المكتبات اللي ممكن يستعيروا منها الكتب مش موجودة، والإنترنت أحد مصادر المعرفة أو التسلية بطيء جداً ولازم تدفع عشان السرعة تزيد، اصبر شوية وكله هيتظبط. - طب يرضيك إن فيه ناس منهم راحت رابعة وهتفوا ضد الجيش..؟ * ما أنا قلت لك إن العيال دي عندها طاقة وحماس وكبت وحاسين بالظلم ومش واخدين حقهم وكمان عايزين يثبتوا وجودهم ويلفتوا الأنظار، أو ربما فاهمين غلط، أو يمكن مدفوعين من حد، عموماً دي مرحلة وهتعدي. - يا عم وانا في سنهم كنت من البيت للمدرسة ومن المدرسة للبيت، وبعد ما اتخرجت كنت... * حاسب حاسب.. انت مثلاً متخرج بقالك أربع سنين، عملت إيه من ساعتها. - بدوّر على شغل، ولما بتعب بقعد على القهوة، هعمل إيه يعني..؟ * يعني الحال من بعضه.. انت قاعد على كرسي في القهوة، وهما قاعدين على كرسي في الاستاد..!! - ماهو إحنا لو في بلد بتهتم بثروتها البشرية ما كانش يبقى ده حالنا، ده البلد فيها طاقة شبابية تكسّر الدنيا..!! * ما هي المشكلة إن البلد إيديها مش طايلة، ولسه طالعة من ثورتين، مطلوب منها إيه يعني تقطّع نفسها؟ - برضه لازم العيال دي تبطّل الهبل اللي بيعملوه ده ويعملوا حاجة مفيدة وكفاية طبل ورقص وزمر وهتافات واشتباكات.. فاكر ضحايا مباراة بورسعيد؟، عرفت إن المحكمة قبلت النقض. * مالناش دعوة بالقضاء.. القضاء بيحكم بالورق والقانون والأدلة، وبعدين خليك متفائل، الثورة قضت على الظلم وبقينا نشوف رؤساء بتتحاكم، يبقى سهل أوي إنهم يحاكموا مدير أمن أو محافظ أو أي متسبب. - مين قال إن الظلم زال؟ الظلم زال من فوق الورق بس، إنما على أرض الواقع الظلم لسه معشش في مباني الحكومة وفي عقول المسؤولين.. تقدر تقولي العيال دي مصيرها إيه بعد ما تتخرج. * يا أخي البلد دي مش هيبنيها غير اللي انت بتقول عليهم عيال دول، العيل ده هو الراجل بتاع بكره، وطاقة أي بلد بتتقاس بحجم شبابها، المستقبل يعني. - آآآه بتتكلم عن شباب مفروض يبنوا البلد وفي نفس الوقت البلد بيحكمها الأجداد، عاجبك جدو الببلاوي..؟ قوم قوم حاسب ع المشاريب، قوم لحسن انت فقعتهالي.... المرارة ياض.
