8 أشهر، يحرص أحمد عبدالمجيد على شحن عداده الكهربائى الذكى، لمنزله الإيجار منذ أن سكنه بمنطقة التجمع الخامس، حتى يتفادى فصل التيار الكهربائى عن البيت بأكمله بسبب انتهاء الشحن بالنظام الجديد، ورغم ذلك وقع على «أحمد» الخبر كالصاعقة «فاتورة كهرباء ب6921.50 جنيه.. أمال اللى كنت باشحنه ده كان إيه؟». يتعامل بنظام شحن العداد.. و«برضه جاتله فاتورة» سؤال لم يجد له «أحمد» الموظف البسيط، إجابة، فسعادته من وجود العداد الذكى الجديد لم تكتمل، جاءته صدمة فاتورة مارس «يعنى أنا التزمت فى شحن كارت عداد البيت من قبل ما يفصل عليا، لأن نظام العداد الجديد من غير فواتير، والمفروض كل واحد يروح يشحن بنفسه من شركة الكهرباء، ودى أكتر حاجة كانت مريحانى، عشان أنا باقعد فى شقق إيجار كتير وكل مشكلتى كانت تبقى مع الفواتير العالية». «أحمد» أشار إلى أنه رفض الدفع للمحصل، ولجأ لصاحب العقار الذى استأجر منه المنزل، لإيجاد حل للأزمة التى طالته بسبب فاتورة الكهرباء: «الفاتورة جت باسم صاحب البيت، ورفض الدفع لأن كل الشقق فى العمارة عدادات جديدة، والمفروض كل شقة بتدفع استهلاكها، ومالناش أى علاقة بالفواتير، ومش عارف الحل إيه؟، لأن الفاتورة جت برقم شقتى، وكل اللى عرفت آخده الكعب من المحصل عشان أشوف حل بدل الدفع». الموقف برمته، برره حجازى مصطفى، مسئول عن تلقى شكاوى فواتير الاستهلاك بشركة كهرباء شمال القاهرة الجديدة «الخطأ وارد، وفى مشاكل بنستقبلها من المواطنين عن مبالغ عالية، وبتبقى أحياناً غلطة إللى بيحسب الفاتورة بزيادة أو حذف صفر وبنعدلها»، مطالباً بتقديم شكوى رسمية ومكتوبة للإبلاغ عن مشكلة فاتورة «أحمد».