يا صاحبي ياللي معرفتوش ولا شفتوش ولكن صورته محفورة في نن العين وفي الجدران أنا غلطان وآسف يا صديق إني منيش قادر أكفكف م الدموع كسوة تحوش البرد عن جسمك وتستر عورة الدنيا اللي ناكرانا وآه يانا ومليون آهة ع الغلبان وع البردان وعاللي ع العيال شقيان عشان لقمة تسد الجوع أنا موجوع وإيه هيفيد وجع قلبي؟! مادام الحال مهوش معدول ومين سائل ؟! .. ومين مسئول ؟! ومين مجني ؟! .. ومين جاني ؟! ومين اللي عليه الحق للتاني ؟! يا بهنس قول لعمرو صلاح محدش في الحياة مرتاح مادام الفقر له صاحب وغسِّل وشَّك الشاحب من الأحزان وصلِّي شكر للمولى على نعمة فراق الخلق والدنيا مادام فيها الضمير غايب وغلبانها ملوش نايب سوى نومة رصيف محدوف في ركن العالم الجاحد يهون العمر لو فيه البشر قاسيين ولا حاسين بأوجاعنا وتنزل ع الحياة اللعنة