"محمد العزابى" .. ممثل شاب استطاع أن يخطو بثبات نحو النجومية من خلال دور "سيف باشا" وهو ضابط امن الدولة فى مسلسل "الهروب" مع النجم كريم عبد العزيز , واستطاع أن يغزو قلوب المشاهدين بموهبته التى لم يختلف عليها اثنان , وكان لنا معه هذا الحوار.. فى البداية عايزين نعرف ازاى شايف ردود أفعال الناس حول دورك فى المسلسل؟ - فى الحقيقة أنا ماتوقعتش ردود أفعال الناس خاصة ان دورى فى المسلسل لم يزد عن تسع حلقات لكنى الحمد لله قدرت ادخل قلوب الناس لدرجة انهم بقوا يتعاملوا معايا وينادونى فى الشارع بإسم "سيف باشا" على الرغم من مشاركتى فى مسلسل "مجنون ليلى" مسبقا فى دور بطولة مع الفنانة ليلى علوى لكن بردو ردود الأفعال لم تكن زى ما حصل معايا فى الدور ده. مين رشحك للدور؟ وإيه أكتر حاجة شدتك ليه؟ المخرج محمد على هو اللى رشحنى للدور خاصة بعد مشاركتى معه فى "مجنون ليلى" من قبل , وفى البداية لما كلمنى قاللى ان عنده دورين فى المسلسل .. الأول ضابط مباحث عادى والثانى ضابط أمن دولة , فقاللى أقرا الدورين كويس وشوف انت حابب تعمل مين فيهم , والحقيقة انا اتشديت للدور التاتى أكتر رغم ان مشاهده كانت أقل لكنى دايما أهتم بالكيف وليس الكم. هل مشاركتك مع نجم بحجم "كريم عبد العزيز" كان ليه مذاق مختلف؟ وهل استفادت منه؟ الحقيقة انا مكنش ليا مشاهد مع كريم عبد العزيز لكن اتقابلنا كتير فى البلاتوه وكان دايما بيكلمنى ويرحب بيا وبالتأكيد استفادت منه كتير من خلال متابعتى لأدائه أثناء التصوير, وهو بسم الله ما شاء الله شاطر جدا ومتواضع لدرجة لا تتخيلها. وهل شايف ان المسلسل أخد خقه بالنسبة لحجم المشاهدة والدعاية اللازمة وللا شايف انه اتظلم وسط هذا الكم الهائل من الأعمال الدرامية السنة دى؟ ماقدرش أتكلم عن الدعاية, والمسلسل فى ناس كتير تابعته لكن المشكلة دايما فى موضوع المسلسلات الحصرية, وانا شايف انها مش بتساعد المسلسل انه يحقق نسب مشاهدات زى المتوقع خاصة لأن المشاهد عندنا "كسول" بطبعه و عادة بيفضل يتابع أكتر من مسلسل من خلال قناة واحدة , ويمكن ده بيأثر أحيانا على بعض الأعمال , ولكن بوجه عام أنا شايف ان المسلسل حقق النجاح اللى كنت متوقعه. إيه رأيك فى أراء بعض النقاد اللى قالوا ان بلال فضل كان حابب يوثق ثورة 25 يناير فى المسلسل من وجهة نظره الشخصية كمؤلف فقط وليس من وجهة نظر محايدة أو موضوعية كموثق؟ ماعتقدش .. انا شايف ان بلال حاول يقول ان كل مكان فيه الحلو وفيه الوحش وكذلك جهاز أمن الدولة زى ما فهي ناس مش كويسة أكيد كان فيه ناس شرفاء , وكذلك حب يوضح فى مشاهد كتير ان الشعب كان فيه المؤيد للثورة والمعارض فى نفس الوقت , وكريم فى المسلسل مكنش ليه دعوة بالثورة , وكل الحكاية انه كان عايز ياخد حق أخوه. كلمنا عن بداياتك فى مجال التمثيل. بدايتى فى التمثيل كانت من خلال فيلم "بالألوان الطبيعية" مع يسرا اللوزى وكريم قاسم والمخرج أسامة فوزى اللى طلب حد يعمل دور داعية إسلامى غير متزمت أثناء دراستى التمثيل عند الأستاذ محمد عبد الهادى وتم ترشيحى للدور , وبعدها عملت مسلسل "مجنون ليلى" مع ليلى علوى وخالد ابو النجا ورانيا يوسف والمخرج محمد على اللى كلمنى وقاللى انا عندى دور مناسب ليك قبل التصوير ب 3 أيام فقط , كلمنى السبت واتقابلنا الأحد وصورنا الثلاثاء , والحمد لله قدرت أقوم بالدور بالشكل المطلوب , واتعرض المسلسل فى رمضان وبعديه الفيلم فى العيد. وهل اتعرض عليك أعمال بعدها؟ جتلى عروض كتير السنة اللى فاتت قبل ما تقوم الثورة , وبعدين مريت بظروف عائلية منعتنى انى أركز فى الشغل فى الوقت ده لحد ما المخرج محمد على كلمنى السنة دى عشان مسلسل "الهروب". وهل اتعرض عليك أعمال أخرى غير الهروب؟ اتعرض عليا انى أجسد شخصية "جمال مبارك" فى مسلسل "زى الورد" لكن الدور ماعجبنيش خاصة ان عندى مبدأ فى المجال ده وهو انى يا أعمل حاجة تكبرنى وتعلينى يا ماعملش وده مالقيتوش فى الورق اللى اتقدملى. عملت 3 أفلام قصيرة هم "حلاوة روح" و "عمر الخيام" و "حدوتة ثورية" .. احكيلنا عنهم وقوللنا ايه رأيك فى النوعية دى من الأفلام؟ الحقيقة أنا شايف ان الأفلام القصيرة كان بمثابة المخرج للطاقة اللى عندى فى الفترة اللى مكنتش بشتغل فيها بالإضافة انها ساعدتنى كتير انى أنمى موهبتى وعلمتنى ازاى أتعامل مع الكاميرا, وكذلك تعبيرات الوجوه وهكذا.. والحمد لله الأفلام حققت نجاح كبير والدليل على ذلك حصول فيلم "حدوتة ثورية" على جائزة أحسن فيلم فى مهرجان اليونيسيف الدولي. هل شايف ان الأفلام القصيرة مش واخدة حقها فى مصر؟ بالتأكيد .. البلد فيها أفكار ومواهب كتيرة جدا لكن للأسف مابتعترفش بالمواهب دى فى كل المجالات مش فى التمثيل فقط. ماذا عن أعمالك القادمة؟ فى الحقيقة انا اتقدملى اليومين دول أكتر من عرض منهم واحد سينما وعرضين تليفزيون لكنى ماستقرتش على عمل بعينه حتى الأن خاصة أننى أكره فكرة الإنتشار وبالتالى لازم أركز كويس جدا فى العروض اللى اتقدمتلى حتى الأن وأهتم بالكيف وليس الكم. فى النهاية .. بتحلم توصل لإيه فى مجال التمثيل؟ مش حلمى إنى أكون البطل الأوحد لكنى حابب الشمولية وأكيد كلنا شوفنا مسلسل "طرف تالت" وقد ايه البطولة الجماعية قدرت تحقق النجاح اللى شوفناه فى المسلسل , لكن من أكتر الشخصيات اللى نفسى أقدمها شخصية "خالد ابن الوليد" رغم اننا فى مصر مش شاطرين أوى فى انتاج النوعية دى من المسلسلات.