تحدثت الفنانة نبيلة عبيد عن إيجابيات وسلبيات العام الماضي 2022، وكشفت أمنيتها في العام الجديد 2023، بجانب الحديث عن علاقتاتها ب أصدقائها في الوسط الفني. وقالت نبيلة عبيد، في تصريحات تلفزيونية، عن سلبيات عام 2022: كورونا قعدتني سنتين ونص في البيت، مش عايزة أجيب سيرتها وكنت خايفة أشوف الناس. وتابعت أنها كانت دائمًا تتواصل مع أصدقائها بالوسط الفني، الذين أُصيبوا بفيروس كورونا، يوميًّا للاطمئنان على صحتهم، قائلة: أنا مسبتش حد جاله كورونا ومكلمتوش، ويوميًا كنت بتصل أطمن وأشوف إيه الأخبار لغاية ما يتحسنوا ويبقوا في أحسن حال، وده طبع عندي بحب أطمن على الناس اللي تعبانة.
إيجابيات عام 2022 بالنسبة لنبيلة عبيد أما عن إيجابيات عام 2022، فقالت: الحاجات الحلوة إننا كنا قادرين نحافظ على نفسنا وعلى الناس اللي حوالينا وبنكلمهم، طبعًا فيه ناس كتير راحت مننا ولكن بنقول لنفسنا معلش فيه أيام كتير جاية حلوة، وبنحاول نصبر نفسنا بالمكالمات لأننا اتفاجئنا بصدمة كورونا. كما علقت الفنانة نبيلة عبيد، على تكريم مجلة فوج، قائلة: جالي تكريم فوج ده أنا سعيدة بيه جدًا لأني تفاجأت بيه وقلت خلاص أسافر أغير جو، وكنت مبسوطة بالتكريم والحفلة والاستقبال والناس اللي بقالي كتير مشوفتهمش. وعن أمنية نبيلة عبيد، في العام الجديد 2023، فقالت: يا رب تكون سنة سعيدة وجديدة وكلها راحة بال وربنا يحقق كل اللي بتتمنوه.
علاقة نبيلة عبيد بنادية الجندي وأكدت الفنانة نبيلة عبيد، في تصريحاتها أن مشهد القبلة والعناق بينها وبين الفنانة نادية الجندي، أثناء تكريمهما في مهرجان القاهرة للدرما، كان حقيقيًّا ولم يكن بغرض الاستعراض، قائلة: الناس ممكن تفتكر إن ده استعراض عملناه يوم التكريم، ولكن لأ أنا بكلمها ولسه كنت بعلمها عشان رأس السنة، ولسه هكلمها تاني مش هسيبها. وعن تسامحها مع الأشخاص، قالت نبيلة عبيد، إنها أخذت هذه الصفة من والدتها الراحلة، موضحة: أنا اتربيت على ده كانت أمي الله يرحمها كلامها كده مع صديقاتها، وأنا بقى عندي ده داخليًّا مش عايزة حد يزعل مني ولا يفهم حاجة وحشة، ببدأ أنا المكالمة والمبادرة، وحتى لو شفت حد بقالي فترة كبيرة مشوفتوش بسلم عليها وببقى مشتاقة ليها وبتكلم معاها، والموضوع ده مريح أوي.
علاقة نبيلة عبيد بوالدتها كما أعربت نبيلة عبيد، عن اشتياقها الكبير لوالدتها قائلة: أنا طول الوقت مفتقدة أمي ومفيش حاجة بتعوضني عنها ولا إخواتي ولا أولادهم، ولكن هنعمل إيه ده أمر ربنا ومش هنقدر نعمل حاجة. وأشارت نبيلة عبيد، أنها توقفت عن إقامة حفل لعيد ميلادها بعد وفاة والدتها، موضحة: أنا توقفت إني أعمل عيد ميلادي لما ماما توفت واستبدلته ب حفل سحور، ولكن قعدت شوية أعمله في البيت وكانت دلال عبد العزيز الله يرحمها أول واحدة بتخبط على الباب، وتجيبلي تورتة حلوة، وكان مجموعة كدة بتجيلي في البيت، أنا السنة اللي فاتت معملتهوش ولكن السنة دي بيلحوا عليا علشان أعمله.
خطة نبيلة عبيد لعام 2023 وعن خططها المستقبيلة في العام الحالي 2023، فقالت نبيلة عبيد: الخطط اللي عندي للسنة الجديدة إن يكون في عمل حلو أنا أرضى عنه، لأني عاملة أكتر من 90 فيلم وكل فيلم أحلى من التاني، وكفاية الشرف اللي أنا بنوله لما واحدة تقولي لو فيلم اتعرض ليكي 50 مرة هتفرج عليه. وأضافت: ولو اتعرض عليا حاجة كويسة هعملها، ولو حاجة أنا غير راضية عنها يبقى لأ، علشان خلفيتي عند الناس تكون حلوة ويفتكروا ليا الحاجة الحلوة ويفتكروا كل حاجة أنا عملتها حلوة. أما عن العمل الفني الذي تفضله وتعجب ب أدائها خلاله، فعلقت نبيلة عبيد قائلة: هكون مع الناس لأن الناس بتحب الراقصة والسياسي أوي، وأنا عندي أفلام تانية بحبها أوي، ولكن حاسة إن الناس بتحبه أوي وأنا بحب رأيهم أوي علشان كده أنا معاهم.
