السلام عليكم ورحمة الله ، مشكلتي أني واحدة من ضمن ستات كتيرة جداً عندهم نفس المشكلة وهية سوء العلاقة الحميمة بيني وبين زوجي اللي معندهوش أي فكرة عن مشاعر الست ولا عشرتها ، أنا حاليا مطلقة بعد ما عشت اسود أيام حياتي .. اخدت أولادي ورجعت أعيش تاني في بيت أهلي .. خلاصة المشكلة هي طريقة تعامل جوزي معايا سواء تعاملات عادية أو تعاملاته أثناء علاقتنا الخاصة .. بصراحة أنا قبل ما أتجوز كنت مبسوطة أني هفتح بيت وأبقى أم وأبقى حبيبة وكان في خيالي صور كتير في ذهني عن ازاي ده هيتم .. وكلها كانت حلوة .. وأنا بالتحديد كنت بين أم وأب اتجوزوا عن حب والحمد لله عايشين مع بعض باحترام ومودة وطبعا كل ده ما كنتش لقياه مع جوزي .. قلت استحمل يمكن بالمحايلة يتغير أو اقدر اخليه اهدأ شوية لكن مفيش فايدة .. وكل ده برضه كنت اقدر استحمله لكن اللي صعب جداً تحمله لما ألاقي جوزي بيعاملني في علاقتنا الخاصة وكأني من الشارع .. إحساس مؤلم جداً محدش يقدر يحسه إلا اللي مر بنفس التجربة المهينة دي .. اتكلمت معاه كتير جداً لكن بدون فايدة حاولت أنا مع نفسي أني اتقبله بس والله ما قدرت .. سامحوني أنا مش هقدر أتكلم عن خصوصيات غرفة نومي اكتر من كده لكن اقسم بالله أنا بالرغم من أني اتطلقت الحمد لله لكن اثر تجربة زواجي من الشخص ده مأثرة فيه لغاية دلوقتي وحاسة بنفس الألم اكنه أمبارح ، من ساعة طلاقي وأنا مقررة أني ابحث على المستوى العلمي ليه ده بيحصل من الراجل وازاي يبقى كل إحساسه بمراته بالمنظر والكيفية دي ؟! وايه الأسباب اللي ورا المعاملة دي واهتمامي بالبحث مش علشاني قد ما هوه حفاظا على حياة أولادي الأسرية في المستقبل ، أنا رحت بالفعل لطبيبة علاقات زوجية وعرفت منها كتير ورحت لطبيب أمراض نفس وبرضه استفدت كتير وبالمرة علشان يقول لي أعيش ازاي حياتي من غير ما أعاني من اكتئاب مرضي وازاي أتعامل مع أولادي خاصة وان جوزي كان بيتخانق دايما معايا قدامهم وده اثر عليهم للأسف بشكل واضح لكن بعد متابعتي مع الدكتور همة بقوا أحسن والحمد لله .. يا أستاذة نيفين أنا اختصرت حكايتي أو مشكلتي في كلمة مهمة وهي أن جوزي بيعاملني اكني من الشارع ولما سألته ليه تعمل معايا كده يقول لي انتي كذا وكذا طبعا كذا دي إهانة .. ويقفل كلامه بان هي دي المتعة اللي المفروض أنا ما افهمش فيها حسب اتهامه .. أنا باكد على كلامي علشان تتخيلي معايا حجم المشكلة وتفاصيلها .. صدقيني الموضوع فعلا بشع وفعلا مؤلم وفعلا مهين .. أنا اللي اعرفه عن الرجل هو اللي شفته في بيت أهلي من ابويا لامي مش اللي أنا عيشته خالص .. أرجو يا أستاذة نيفين تنشري رسالتي عايزة كل الستات تقرأها والرجالة كمان ونحاول مع بعض كلنا نتبادل الآراء لان بجد اللي لقيته أني مش لوحدي في المشكلة دي .. أنا اكتشفت أن فيه ستات كتير جداً في نفس المصيبة .. شكرًا على اهتمامك وآسفة أني أكون طولت عليكم . معلش أنا مش هكتب اسمي بعتذر .
