سلام على السريع .. ده نداء عاجل لكل الرجالة اللي على الموقع ده وبالأخص فضفضة .. انا حزينة جدا وفي حالة من الغضب يعلمها الله وحده .. انا متجوزة من خمس سنين وبشهادة جوزي نفسه وشهادة الناس اللي يعرفونا كلهم إني ست على درجة عالية من الجمال بدرجة ملفته على حد وصف الجميع والحمد لله نضيفة جدا يعني عندي وسواس النضافة اللي أحيانا البيه جوزي بيشتكي منه وفوق ده كله للأسف انا بحبه جدا ومش هتكسف اقول ده ايوة انا بموت في جوزي بحب التراب اللي بيمشي عليه وعندنا ولدين زي الفل زينة الحياة الدنيا والحمد لله ميسورين الحال جدا يعني مليش حجة أكون زعلانة من حاجة ربنا إدانا الخير كله لكن للأسف عاقبني بزوج بصباص بدرجة سفيهة بيعشق الستات زي عنيه والمصيبة إنه بجح بيقول قدامي عادي ومفيش واحدة نعدي من قدامه إلا لما يعلق لغاية هنا وقلت ماشي آجي على نفسي واستحمل طالما الموضوع خلص عند الكلام بس وان الكلمة مش هتلزق .. لكن اعرف بالصدفة انه كمان اتجوز عرفي من واحدة ربنا يعلم منظرها عامل ازاي ! ده كتير جدا .. ده غير العلاقات غيلر الشرعية اللي على السريع وكل يوم يرجعلي بحال .. ده مرة نزل من البيت رجعلي بلبس تاني .. يانهر اسود !!!! المفروض اني في المواقف دي اعمل ايه أصقفله ولا أعمل زار يطلع عفاريت الستات اللي عليه ولا ايه ؟ بصراحة هم يبكي وهم يضحك انا مش فاهمة ايه الرجالة دي .. المصيبة ان أصحابه نفسهم نطقوا بيقلوله انت مجنون ده انت مراتك فلة وقمر ومزة انت معندكش دم والغريبة انهم بيقوله الكلام ده قدامه فبتقهر أكتر لما الاقي الغرب مقدرينني وهوة هربانة منه كدة .. والمصيبة بقى لما يرد عليهم ويقول .. مين قال اني مبحبش مراتي انتو عارفين اني كنت هموت واتجوزها وهية قمر فعلا حد قال حاجة ؟ انا بقى بسمع الكلمتين دول وأتشل أكتر .. طيب يابن الناس هوة اللي فيه داق مش هيبطله إلا لما ربنا يبعتله مصيبة ؟ والنبي حد من السادة الرجال عشان همة هيبقوا فاهمين دماغ راجل زيهم يرد علية قبل ما اتجنن وامشي اصرخ في الشارع أو قبل ما اروح دكتور نفسي .. على فكرة انا لولا اني بحبه جدا والله العظيم ما كنت هتنيل واستنى ليلة واحدة .. ده حاجة تجيب عيا .. ارجو الإفادة وكل اللي عنده اقتراح ولا حل ولا كلمة عدلة يكتبها عشان انا خلاص اتفرست . م . ن فضفضة السادة الرجال يتفضلوا كما طلبت صاحبة الرسالة بالرد أو النصيحة أو إيجاد حل منطقي .