مساء الخير أولا .. انا معنديش مشكلة في الحياة غير سؤال واحد , ليه الرجالة مضطهدة الستات ؟ هل ده بدافع إحساسهم إنهم ملايكة مثلا ؟! ولا إحنا اللي مافيناش واحدة عدلة ؟! مش معقول طول الوقت أسمع من جوزي وأخويا أو أبوية وقرايبي إن المصيبة لازم يكون وراها ست , أو إنه إتنكب بسبب مراته , طيب إشمعنى ماجبش سيرة أمة هية مش ست برضه ولا عندها إعفاء من إنها تكون نكدية ؟ حاجة بقت مبالغ فيها .. مزعجة .. محبطة .. ليه الرجالة مش عايزة تفهم إننا مش في أرض الأحلام ولا إن الناس مختلفة , مش بيشوفوا أخبار الحوادث اللي عاملينها رجالة .. مش بيسمعوا عن تجاوزات لرجالة منهم العاق والشاذ ومنهم العنيف والقاسي حتى على أولاده .. البخيل وصاحب السمعة السيئة .. انا بشوف نماذج لرجالة عايزة الحرق .. رجالة معندهاش فكرة عن الحنية ولا المسئولية , في رجالة لسة عايشة على رزق ستاتهم , وعلى فكرة الحكاية دي بقت ظاهرة ومش بس في الأوساط الشعبية زي أزواج الخادمات اللي قاعدين متستتين في البيت و زوجاتهم اللي بيصرفه عليهم ده انا إكتشفت إن الموضوع أصبح عادي , مصيبة ايه اللي إحنا فيها دي ؟! كام مرة بنسمع عن راجل رمى أمه أو رفع صوته عليها وكام واحد بيمد ايده عليها والعياذ بالله , بلاش حتى ده .. كام مرة سمعنا وشفنا في الشارع واحد نازل ضرب في مراته أو إبنه في الشارع ؟ نسبة الطلاق اللي زادت أغلبها ايه ؟ إدخلوا على النت وشوفوا آخر النتايج اللي كتبت بالتفصيل عن مشاكل الرجالة النفسية اللي ماشربش قرفها غيرنا و أولادنا .. كام اسرة وكام طفل إتبهدلو بسبب راجل عديم الضمير والإحساس والمسئولية , بلاش كل ده .. قد ايه بنسمع عن راجل متزوج من سيدة فاضلة بشهادة الجميع ومفيش فايدة غاوي يقهرها وماشي مع طوب الأرض على الرغم من إنهم أقل منها جمال وأدب بالتأكيد . حاجات كتير صعب الواحد يحصرها لكن في حاجة أخيرة أحب أقولها .. لما أكون انا زوجة أمينه مع زوجي ومحافظة على مظهري وواخدة بالي من بيتي واولادي ولساني حلو بالبلدي كدة ليه ألاقي رد الفعل مهين وجارح وفيه تقليل من قيمتي وكرامتي ومفيش حاجة بتعجب .. ليه أحس منه إنه مضايق مني ومن أهلي واخواتي .. ليه كل ما أحايله ألاقي وش يجيب إكتئاب ورد فاتر وملوش معنى أو سكوت قاتل وأكني مجنونة بتكلم .. وعلى فكرة انا مش ملاك عشان محدش يفتكر حاجة .. بس بشهاده أهله نفسهم إني شخصية مرحة وحبوبة ونضيفة في نفسي وفي بيتي ده غير إني على قدر من الجمال فوق المتوسط . من الآخر أنا مش محتاجة رد من فضفضة .. أنا محتاجة رد من الرجالة اللي هتقرأ الكلام ده . مدام أميمة فضفضة مدام أميمة قلبي معك على ما تحملينه من مشاعر سيئة , وسأترك كما طلبتي الرد للرجال .