من يوم ما اتجوزت مقصوفة الرقبة سنيه وانا شايف الويل.. كنت فاكر إنها أهلاويه زيي لكن اتضح العكس!!..ضحكت عليا وكانت كل يوم تلبس أحمر في احمر خاصه الأيام اللي يفوز فيها الأهلي.. طبعا بطيبتي المعهوده شربت المقلب وكان أكبر مقلب في حياتي.. جاسوسة بخطين اتضح إن سنيه جاسوسه زملكاويه دخلت بيتي!!..لا وطبعا ما عرفتش كده إلا بعد ما وقعت الفاس في الراس.. أول ماتش جه في التلفزيون كان بين الزمالك والاسماعيلي.. طبعا مش محتاج احكي لأن الجواب كان باين من عنوانه.. الصوت العالي والصويت كل ما يروح جون من الزمالك، وياريتها جت على قد كده مصيبة المصايب لما ييجي لقاء القمه ، لازم المشهد ده يتكرر بحذافيره كل مره، سنيه جايبه قراطيس اللب والترمس والفول السوداني وقاعده مربعه، وطبعا أنا تحتها عشان تشل حركتي، لكن المصيبه الألعن إنها مكمماني عشان ما فتحش بقي لو الأهلي جاب جون!!.. لكن كله كوم والمباراة الشهيره اللي اتهزم فيها الزمالك من الأهلي سته واحد.. كان يوم اسود عليا وع اللي جابوني.. الهانم قعدت لابسه اسود 6 أيام..لأ والألعن تنزل فيا ضرب كل يوم فيهم صبح وليل زي ما أكون انا للي جبت ال 6 اجوان في الزمالك.. أقولها "يا سنيه حرام عليكي..أنا إيه ذنبي"، ترد: " أسكت خالص انت لسه شفت حاجه؟" وبعدين ترجع تصرخ فيا بصوت جايب لآخر الشارع"..احنا ولاد ناس غصب عنكو.. انتوا فاكرين نفسكو إيه؟ الزمالك نادي ولاد البلد برضه.. مش نادي ولاد البطه السوده ياروح خالتك!!" جيت من كام يوم لقيتها بتقولي.." تروح تجيب لي تذاكر مباراة الزمالك والأفريقي التونسي..الماتش ده مهم أوي".. قلت لها: "حاضر يا سنيه.. بكره هجيب لك تذكره".. راحت قايله: "نعم نعم يا منيل؟ تذكرتين مش تذكره واحده، ماهو انت لازم تيجي عشان تتفرج على مدرسة الفن والهندسه، اتعلموا بقى يابتوع الأهلي حديد ياللي كان محتكركم أحمد عز!!".. طبعاً خدتها من آصيرها وطيران على كشك التذاكر عشان أخلص من زمارة القطر اللي اسمها سنية!! وجينا لليوم الموعود.. طبعا سنيه لابسه أبيض وماسكه صفارة عماله تصفر بيها في الشارع لما فضحتنا وهى بتصرخ "الأهلي حديد.. زمالك سيحه". مش ها سيبك وصلنا الاستاد ودخلنا مدرجات الدرجه التالته والهانم طلعت قراطيس اللب والفول السوداني.. خلص الشوط الأول بعد ما الزمالك جاب هدفين.. وبعد ما سنيه خرمت طبلة ودني من الصويت وهي بتقول " اتعلموا يا بتوع الاهلي.. جاتكم الغم ينزل عليكو ما يتلم".. طبعا أرد في نفسي واقول "وانا مالي يا ام لسان زفر.. هو انا كنت خلفت الأهلي ونسيته؟".. المصيبة جت في الشوط التاني اللي كان المفروض الزمالك يجيب فيه الجون التالت عشان يتأهل للدور ال 16 في بطولة دوري رابطة الأبطال الافريقي.. جه مساعد الحكم راح حاسب تسلل على لاعبي الزمالك ولغى الجون التالت اللي جابه احمد جعفر، مفيش ثوانى ولقيت الجمهور كله نازل أرض الملعب وسنيه بتصرخ وبتجري ورا مساعد الحكم وهي بتقوله: "وديني ماانا سايباك". مش عارف إيه اللي حصل ساعتها.. جريت مع اللي جريو بره الاستاد ورحت ناطط في أول ميكروباص مروح ع البيت، تاني يوم جبت الجرايد الصبح ولقيتهم محولين المشاغبين للمحاكمه، طبعا فرحت وقلت:" أخيرا خلصت من سنية.. ألف حمد وألف شكر ليك يا رب".. مفيش ثواني وسمعت سرينة عربية نجده.. بصيت لقيت سنية نازلة وجنبها 4 عساكر وظابط.. لسه بفتح الباب لقيتها بتقول: " أيوه يا حضرة الظابط.. هو ده المشاغب اللي ضرب فريق تونس"!! بقلم: عمرو عكاشة ------------------------------------------------------------------------ المحروس أهلاكاوي! مش عارفه أعمل إيه في خميرة العكننه اللي عندي..اللي اسمها المحروس جوزي.. دايما غاوي يفقعني وكأن بينه وبيني تار بايت.. من خيبتي القويه اني وقعت بلساني أيام الخطوبة وقلت له إني أهلاوية، ودي كانت غلطة عمري.. وقتها رد عليا وقال: "وماله..مش عيب!!" مش فاهمه لغاية دلوقتي كان قاصده إيه، ومن ساعتها وبيبقى يومي أغبر لما يلعب الأهلي أو الزمالك. الغريبة إني مش عارفه ميته إيه.. افتكرته في الأول زملكاوي صميم.. وبيطلعهم عليا، ييجي الماتش من دول أتسمر أنا قدام التليفزيون وهو لازم يسمم لي الفرجة.. شوية ضحك وتأليس.. ولما الموقف يتأزم ووقت المباره خلاص هيخلص والناس كاتمه أنفاسها مستنية جون معجزه ألاقيه يقف على حيله ويهز وسطه ويقول: "واحد..اتنين..اللاعيبه فين"، "واحد اتنين..الكوره رايحه فين" ، وساعات يندمج مع الماتش والاقيه متزربن ويقول: " المرمى مش الناحيه دي ياحمااااار"، وأوقات تانيه اسمعه يقول: "الله يخرب بيتكم يا بعده.. بقى معرفتوش تدخلوا غير جونين نضاف.. مش اربعه ليه ولا خمسه ليه..إيه.. ناقصين إيد؟ رجل؟..سديتوا نفسي الله يسد نفسكم"! وأيام تانيه أقول لأ ده أكيد أهلاوي.. بس عشان أنا أهلاويه كبيره عليه انه يعترف إنه أهلاوي.. ماهو كل ما الأهلي يخسر في ماتش اقعدلي كام يوم يشمت فيا في الرايحه والجايه ولا كأني السبب في خيبتهم القويه .. واسمع لي موشحات من نوع: "ما قلتلك يا وليه.. بلاش انت بالذات تتفرجي ع الماتش.. مش عايزين ننحسهم"، "هي هي هي.. جت الحزينه تفرح مالقتلهاش مطرح".. واللي هينقطني انه في مناسبه زي دي ألاقيه يكلم مديره في الشغل ويقوله: "ولا يهمك يا باشا.. دي غمه وهتنزاح طول عمري بقول الأهلي محسود، خللي الزملكاويه يفرحوا شويه، أهو نعتبرها صدقة"!!! بلمت وبقيت مش مصدقه اللي بسمعه فقلت له: " انت يا راجل هتجنني.. انت مع مين بالظبط"؟!! يروح ملعب لي حواجبه ويحرك ايده قدامه زي الدجالين ويقول: "موتوا بغيظكم موتوووا"! زملكاوي وسط التوانسة قرر المحروس إنه يروح الماتش الموكوس بتاع الزمالك والأفريقي التونسي، قال يعني من ولائه الكروي لبس شورت وتي شيرت ابيض محزق وحبكت ما يقعدش إلا في وسط الجماهير التوانسه.. وشغال هتاف طول الشوط الأول "يا زمالك يا معلم خللي الأفريقي يتعلم".. وع الشوط الثاني مع كل فرصة تضيع يصرخ ويقول.."ييييييييييييييييييييييي".. والتوانسه كاتمين على أعصابهم وساكتين.. واحد مال ع المحروس وقاله: "ما تروح تقعد مع الجماهير المصرية.. مش عارفين نتفرج يا بارد".. رد المحروس ببرود وقال له: "ما تروح انت؟!!" وقبل المباراة ما تخلص.. مر راجل بيبيع عسليه.. والمحروس روحه في حاجة اسمها عسليه، المحروس سابه من المباراة وقعد ينادي على الراجل بتاع العسليه، وأول ما الراجل أخد منه الفلوس أخد ديله فى سنانه وقال يا فكيك تجاه أرض الملعب. حز في نفس المحروس أوي ان واحد بتاع عسليه يضحك عليه وياخد منه الفلوس، راح جاري وراه وهو بيصرخ ويقول: "يا ابن الحراميه..العسليه يالاااا".. وفرح أوي لما لقى الناس كلها بقت تجري هي كمان وراه.. وقال في عقل باله هي دي شهامة ولاد البلد صحيح. مفيش ساعة ونشرة الأخبار علقت على اللي حصل في المباراة وقالت انه جاري البحث عن بتوع الشغب وظهرت صورة المحروس وهو بيجري ورا راجل بجلابيه والمعلق بيقول: " كشفت مصادر مطلعه إن الراجل اللي في الصورة هو زعيم البلطجيه اللي نزلوا أرض الاستاد ووراه أحد الصبيه بتوعه اللي تعرفت عليه الجماهير التونسية وقالت انه كان بيسخنهم ويغلس عليهم طول المباراة.. وقامت الأجهزة الأمنية بضبط المذكور اللى لابس الجلابية وجارى ضبط الصبى اللى وراه"!! بقلم: رانيا صالح ------------------------------------------------------------------------ روابط ذات صلة سنيه والمحروس في مظاهره!! سنية.. ومحروس.. وكوهين! الست حلالوفا.. والمحروس نيولوك!! حكاية فيشة.. والمحروس كنترول زمارة القطر.. والمحروس طرزان هي موسوسة.. وهو بيخاف من النضافة جوازة الندامة في عصر التحولات "سنية"..زعيمة سياسية!! هو مخنوق. .. وهي مش طايقة
