مساء الخير أستاذة نيفين أنا مخطوبة من مدة قصيرة لكن اعرف خطيبي من سنين هوة اصلا جاري .... اكتشفت بالصدفة انه ضايف بنات شكلها غريب جداً على الفيس بوك ولما سالته اتحجج بانه بيحرج يرفض صديق باعتله .. طبعا حجة فارغة .. فضلت اضغط عليه لغاية ما اداني الباس وورد بتاعه وبصراحة أنا انتهزت الفرصة ولما دخلت على الرسايل لقيت بينه وبينهم كلام قبيح قباحة مش معقولة اتصدمت وواضح ان البنات دول شغالين كدة يعني !!!! أنا مش عارفة اعمل ايه ده غير الأفلام الإباحية اللي لقيتها في الداون لود على الكمبيوتر عنده .. أنا مش فاهماه وهل اكلمه ولا التصرف ده هيزيد الموقف تعقيد وماينفعش طبعا اعمل مش واخدة بالي عشان هتنقط واتفرس .... والمصيبة لو طلع كمان بيقابلهم ... طيب بيخطب بنات الناس ليه لما هوة كدة ؟ حاجة غريبة والله .... راي حضرتك ايه ؟؟ وشكرا ليكي س. س
فضفضة
محررة الصفحة .. نيفين حجازي
الصراحة رأيي اكيد هيزعلك لكن قبل ما أقولك رأيي احب أنصحك بمواجهة خطيبك لكن بعد ما تفتحيله صفحة الرسائل وتواجهيه في صمت .. يعني خليه يقرا بعينه المكتوب واسكتي ... شوفي هيقول ايه .. وعلى فكرة سكوتك هيبقى ابلغ من الكلام او الخناق ،، بعد الخطوة دي تابعي تصرفاته لانه اكيد هيقول لك دي غلطة ومش هتتكرر .. المطلوب منك توافقيه مع ابتسامة لطيفة مش صفرا وشوفي . اما عن رأيي للاسف هيزعلك ويزعل السادة الرجال لكنه رأيي وبصراحة .. أنا شايفة ان طبيعة الرجل بتخليه دايما بيميل الى الجنس اللطيف حتى لو كان راجل ممتاز وملتزم وملاك وكل حاجة .. يا صديقتي دي خلقة ربنا يبقى ازاي عايزة تحاولي في منطقة مقفولة ؟! أنا شايفة ان أحسن طريقة للتعامل مع الرجل في الحالات اللي زي دي .. الطنااااااااش والأفضل بقى ... تصدير ملامح الغباء ... مفيدة جداً برضه ... على فكرة أنا مش بهزر ... الراجل بيحتاج كتير انك ما تحسسهوش بانك قفشتيه وهوة لواحده هيعدل من نفسه .. لأنك لما بتواجهيه في كل مرة يغلط فيها بتقللي من فرصتك في معرفة معلومات اكتر عنه وفي الوقت نفسه لو كان ناوي يتعدل هيعند .. عشان كدة بقول لك الطناش وادعاء الغباء ... معلش بعتذر للسادة الرجال لو كلامي ضايقهم لكن والله أنا شايفة انه فيه مصلحة كبيرة برضه ولا ايه ؟ يعني رأيي ده هيخف من عليهم الزن والتقطيم والتجسس والذي منه .