وما يعرف مين (بريجيت باردو) ولا سارة بنت الخال برنار دي غناها لذيذ.. ولا يسمع عن بيير كاردان جلابيته كان فصلها عند الاسطي البيز . الأصدقاء الأعزاء اعذروني إذا كنت قد تأخرت في نشر رسائلكم وتكفيرا عن هذا الذنب أترك المساحة كلها اليوم لرسالتين من اثنين من أعز الأصدقاء في الأقصر هما الشاعر الجميل حسن يوسف القاضي والدكتور خالد سيد محمد ونبدأ بقصيدة حسن التي كتبها من وحي زيارتي لباريس حيث كتب تحت عنوان (هشام في باريز) هاتجن إزاي يا اخوانا هذا الشخص يخطي باريز.. لا عيونه خضرا ولا اشقر والرجلين دول زي معيز.. ولا(مينو) يطلع جده ولا في الجرد(كليبر)أو(ماركيز).. ولا عمري سمعته يقول(مون بير)للحاج مبارك ولا بونجور ل(حفيظ).. ولا شفته بيقرا ل(سارتر)او(بودلير) ولا يعرف مين(موليير)عندوش تمييز.. ما قراشي ال(بؤسا) ل( هوجو)وكونت دي مونت كريست ولا(الابريز).. وما يعرف مين (بريجيت باردو) ولا سارة بنت الخال برنار دي غناها لذيذ.. ولا يسمع عن بيير كاردان جلابيته كان فصلها عند الاسطي البيز.. ولا عمره شجع سان جيرمان ولا بوردو وما يعرف مين بلاتيني أو بارتيز.. قال ايه متصور عند القوس فرحان بشبابه عامل تلميذ.. صورة كمان بيطاول إيفل عامل ساخر ومايعرفش غير القلويظ.. والكتابات الساخرة بتاعته تكتب أحسن منها( لقاء)وبدون تحفيز.. وقاعد لي في قهوة (لا دوم) بيقرا (لوموند) وبالمقلوب ياحفيظ وبالمقلوب يا حفيظ.. وكمان متصور بالبرنيطة ماسك له عصاية عامللي لويز.. وبيفطر اومليت(باتيه دجنير وانتر كوت) وكمان بيحلي سيريز.. يرحم أيام الخالة عربية بتاعة الدوم وحلاوة وحب عزيز.. انا خايف بعد زيارتك ديه تتواري فرنسا يكون (فاين) لباريز الرسالة الثانية فصل مسرحي خيالي كتبه الدكتور خالد سيد محمد يتخيل فيه الدواعش اتجننوا وقرروا نزول مصر راكبين عربية نص نقل ومكربسين فيها ورافعين أعلامهم اتزنقوا علي الدائري والريس بتاعهم بص لقي واحدة شايلة قفة علي دماغها بتقوله والنبي يا ابني خدني معاك عبود الداعشي: بس يا ولية انتي مش عارفة احنا مين احنا جايين نحتل مصر الست: طب ماشي وماله خدني معك عبود ياخويا ينوبك ثواب الداعشي: باقولك جايين نحتل مصر الست: ياموكوس ماهو انت لازم تروح عبود اومال ها تحتل المحافظات التانية ازاي؟؟ الداعشي: بس ياولية غوري من هنا الست : ضربة في قلبك يابعيد ( الموبايل بتاع الداعشي رن) الو.. ايوة يا شيخ بغدادي يا أمير المسلمين..لأ لسة احنا مزنوقين ع الدايري زحمة قوي البغدادي: دايري ايه وزحمة ايه يابغل قولهم ان انتم داعش الداعشي: ما انا قلت لهم لقيت واحدة بتقولي خدني معاك موقف عبود البغدادي : خوفهم اضرب كام قنبلة الداعشي: والله عملنا كده في اول الدائري الناس وقفت تتفرج علي القنابل البغدادي: يخرب بيتك ألو الو الداعشي: الحق ده المصريين جايين يتصوروا معانا سيلفي البغدادي : ايه التهريج ده؟ الداعشي: الحقني يا امير..الدواعش اللي معايا في العربية نزلوا كلهم. البغدادي: نزلوا راحوا في انهي نصيبة؟ الداعشي: لقوا المصريين ملمومين حوالين عربية كبدة نزلوا ياكلوا معاهم البغدادي: يخرب بيوتكم والله لاقتلكم كلكم الداعشي: ياعم هو انت مش ها تتشطر الا علينا؟ طب آدي الدقن وآدي العمة !.. يالا ياحاجة عبود..عبود..عبود!
