لا تزال روح الدعابة تسيطر على المصريين حتى في أحلك اللحظات، فمع دعوات تنظيم الدولة الإسلامية "داعش" بإعلان الخلافة في سيناء، قام نشطاء "فيس بوك" بوضع تصور لحالة الدواعش عند وصولهم على المحور لاحتلال القاهرة، ومشكلة المرور والاتصالات التي حالت دون تقدمهم، فقد قام النشطاء بتصور وصول أرتال داعش العسكرية على المحور. يبدأ الفصل الأول في احتلال "داعش" للقاهرة ب"داعش عالمحور" نهار خارجي المحور متوقف تماما وزحام شديد.. يقف أبو قحافة الداعشي معتليا عربية نص نقل مثبتًا عليها رشاش جرينوف ومعه رتل من المسلحين المتجهين إلى القاهرة لاحتلالها.. تقاطعه سيدة خمسينية سمراء صائحة.. - والنبي يابني لو رايح موقف عبود تاخدني معاك ! = إحنا داعش يا حاجة جايين نحتل مصر - ومالوا يا اخويا طب وانتوا بتحتلوها خدني معاك؛ أمال هتحتلوا باقي المحافظات ازاي.. لازم هتركبوا من هناك.. = يا ولية روحي من هنا بدل ما أضربك بالنار. - ضربة في... أهما كده الإخوان متعرفش تاخد منهم مصلحة أبدا. = إخوان مين يابنت ال... "بينما كان يهم بإطلاق النار عليها.. يرن هاتفه.. ويتفاجأ أنه أمير المؤمنين أبو بكر البغدادي.. = السلام عليكم.. أهلا بأمير المؤمنين - أخبار الزحف نحو القاهرة إيه يا قحافة! = والله المحور واقف والدنيا زحمة وع الحال ده بقالنا أربع ساعات والكتيبة اللي معايا فرهدت. - أنت ه... يا قحافة ؟؟ = عندي اقتراح.. إيه رأيك نحتل مدينة 6 أكتوبر.. فاضية ومش زحمة. - لا يا... أبو حزاقة الشيشاني بعته هناك.. ومزنوق هو ورتل العربيات إللي معاه عند جامع الحصري. =... إحنا اتورطنا. - اتصرف يا... وبعدين صوتك بيقطع ليه. = الشبكة هنا... والباقة بتخلص قبل ما تتفعل أساسا. - ألوو - ألووووو. تيت تيت تيت" "تزداد الأمور تعقيدًا فيما يبدو أن الازدحام سيستمر بضع ساعات أخرى.. يفتح هاتفه ليتصفح تويتر ليفاجأ بتويتة من مصطفى بكري sponsored مدفوعة ( وصول داعش إلى المحور وجسر السويس إنما هو تتويج لكفاح ونضال شيخنا الجليل أسامة بن لادن الذي بدأه قبل 20 عاما ). يمل من بطء الإنترنت... يرتكن إلى مدفعه أعلى السيارة وينظر إلى هذا الطابور من السيارات.. يقاطعة صوت. - برنس ال... مساءك زي العسل. = اسمها السلام عليكم. - أنا عايز أشتغل معاكم يا نجم. = اسمها عايز أجاهد معاكم. - المهم يبقى في مصلحة. = اسمها غنائم ينعم الله بها على جنوده المخلصين. - يا اسطى أنا راشق في الحوار ده معاكم.. المهم تأبجني. = اسمها يرزقك الله.. - طيب سؤال يا نجم.. في ترقيات وكده؟ = طبعا.. لو أثبت كفاءة نبعتك إعارة الخليج تجاهد مع المجاهدين هناك. - أوبا.. أنا عايز من ده يا اسطى.. سجل اسمي معاك " أبانوب ملاك مرتجي ". = أنت مسيحي ياض؟ - طب ما انتوا كفار يا عم.. إيه دخل الأديان دلوقت؟ ينتهي المشهد بأبو قحافة يطارد أبانوب على الدائري.. صائحا ه... يابن ال... وسط صيحات وصفارات من المشاهدين". الحلقة الأولى..داعش في القاهرة.. داعش ع الدائري.