لم يكن الاسطى حنفي يتوقع ان يفاتحه ابنه رجب في هذا الموضوع بكل هذه الصراحة ... -الورشة دي يا آبا ما حدش ح يمسكها غيري!! انا خلاص رتبت اموري على كده!! واللي مش عاجبه كلامي ينسا وياخد البنسه!!! -يا ابني وهوه فيه حد غيرك ح يمسكها؟! ما انت فعلا اللي ماسكها دلوقتي !! انا عايزك بس تعقل وكله ح يبقا تمام التمام وآخر حلاوة!!! -انا خلاص يا آبا ما عادش فيا عقل؟؟!! الناس عمالة تتكلم عليا في الرايحة والجاية والموضوع مش باين له بيان!! وانا لازم افهم المخروبة دي ح امسكها امتي !؟؟ -قريب اوي يا ابني!!! عليا الطلاق ح تمسكها قريب أوي!! بس الصبر!! هوه انا عندي يا ضنايا أغلي منك؟! وهنا تدخل في الحوار صبحي الحريف الذراع اليمين للاسطى ... -ما تهدا يا رجب يا ابني وتروق أمال!! انت عارف الاسطى حنفي بيحبك ورايد لك الخير!! بس كمان ماينفعش تلوي دراعه بالشكل ده!! هوه ابوك لا سمح الله حرمك من حاجة؟؟!! -اطلع انت منها يا حريف وهيه تروق وتحلا!!! انا مش فاهم بس ايه اللي حشرك بيني وبين ابويا!! صدق اللي قال الورشة بتاعت ابونا والاغراب بيزاحمونا!! -يا ابني انا قلبي عليك!!! وخايف عليك من الصنايعية القدام اللي في الورشة!!! دول وحوش وقلبهم ميت ولو انت زعلتهم أو قطعت عيشهم ح يمزعوك بايديهم واسنانهم !! -ياعم الحريف خليك في حالك احسن لك!!! انا خلاص روحي بقت في مناخيري!!! وفور عودتهم الى الدار .... -ما تتكلمي يا امه وتقولي حاجة! أنا خلاص شعري شاب ولسه ما مسكتش الورشة !! ولو ابويا ما كتبهاليش النهاردة ما حدش عارف ح يحصل ايه بكرة؟؟!!! -وهوه حد يا ضنايا يستجرى ينازعك فيها؟؟!!! الا باقولك ايه يا حاااااج!! ما تكتبهاله يا اخويا وتريحنا وتريح دماغك!!! -يا أم رجب افهميني !! يا عالم افهموني كلكم !! انا لا يمكن اكتب له الورشة الا بعد ما اطمن على كل حاجة!!! وفي البلكونة أختلى رجب بشقيقه رضا ... -ما تفهمني الفولة يا اخويا!! انا خلاص برج من نافوخي ح يطير!!! هوه ليه ابوك مش عايز يكتب لي الورشة؟!! -يا رجب اهدا وصلي ع النبي!!! الورشة باذن الله ح تكون من نصيبك!!! بس بلاش العصبية دي!!! وبالراحة على ابوك!!الراجل بيحبك وعايز مصلحتك!! -بيحبني والا واحد تاني طمعان فيها وهوه محتار بيناتنا ؟! -تلاتة بالله العظيم ما انا طمعان في حاجة!! يا جدع الورشة دي خازوق !! وأنا كفاية عليا محل المانيفاتورة اللي معيشني سلطان زماني!! -خلاص يبقا تقول لأبوك الكلمتين الحلوين دول خللينا نخلص!!! وفي الصالة كان الاسطى حنفي يشاهد فيلما لاسماعيل ياسين ... -ما تسيبك يا آبا من الفيلم ده وتركز معانا شوية !! احنا عايزينك في موضوع مهم ما ينفعش يتأجل !! -يا ولاد سيبوني اكمل الفيلم !!! دا خلاص اسماعيل ياسين ح يدعك الفانوس السحري ويطلع له العفريت اللي ح يحققه له كل رغباته!!! -معلهش يا آبا سيبك من العفريت دلوقتي !!! رجب عايزك تريحه في موضوع الورشة!! وأنا باقول يا حاج تكتبهاله في الشهر العقاري عشان يرتاح ويظبط اموره!! -وماله يا حبايبي هوه انا عندي اغلي من رجب!! بس الموضوع ده لازم يتعمل على رواقة عشان ولاد الحرام اللي ما سابوش لولاد الحلال حاجة!! وهنا صرخ رجب باعلى صوته -ولاد حرام إيه بس وولاد حلال ايه؟؟!! شوفوا بأه كلكم الورشة دي ح آخدها يعني ح آخدها!!!دي تعبي وشقا عمرى والحاجة الوحيدة اللي ح اطلع بيها من الدنيا!!! -خلاص يا رجب يا ابني اهدا وانا ح اريحك ع الآخر!! بس سيبني اكمل الفيلم والصباح رباح !! وفي صبيحة اليوم التالي... -خد يا رجب يا ابني مفتاح الورشة !! انا عايزك تروح تفتحها وتبخرها وترش قدامها وتاخد وتدي مع الزباين وعينك ع الصنايعية وبلاش تستناني النهاردة!! -ليه بقا انشا الله يا حاج؟؟ هوه انت مش جاي معايا النهاردة عشان نكتب عقد المبايعة ونسجله في الشهر العقاري؟؟؟ -لا يا ضنايا أصل أنا تعبان شوية وبعافية حبتين!! احنا ح نأجل الموضوع ده للاسبوع الجاي والا اقولك خلليه للشهر الجاي احسن!! -براحتك يا آبا!!! بس انا مش عايزك بعد كده تزعل مني !!! وبعد ساعتين دخل الواد بلية على الاسطى حنفي .... -الحق يا حاج!!! الدنيا مقلوبة في الورشة!! سي رجب ورجالته ماسكين في خناق صبحي الحريف ورجالته وبيقطعوا في بعض بالجنازير والمطاوي والدم للركب !!! فالقى الاسطي حنفي الأرجيلة الموجودة امامه .. -خلاص يا مقصوف الرقبة غور من وشي الساعة دي جاتك نصيبة تاخدك!! ما انا اللي قايل للحريف ورجالته يعملوا كده!! هوه فيه حد في الدنيا يقدر يلوي دراعي ويخبط الورشة مني ؟؟!! وفي الورشة كانت الخناقة لرب السما ..... -عليا الطلاق بالتلاتة ما ح تمسك الورشة طول ما الاسطي عايش؟!! ليه.. ؟؟ هوه انت فاكرنا ح نسيبك تخبط كل حاجة لوحدك!! - واش حشرك انت بس في اللي مالكش فيه!!! طيب طلاق تلاتة على طلاقك لأمسكها وأطيركم واحد واحد!!! وابقوا قابلوني لو حد فيكم أكل فيها عيش بعد النهاردة !!!