تغريد حسن: السيدات والسادة اهلا بكم في حلقة خاصة من برنامج اتجاهات على شاشة قطاع الاخبار واليوم بمناسبة اعتلاء البابا تواضروس الثاني فاصبح البابا تواضروس الثاني بابا الاسكندرية وبطريرك الكمرازة المرقسية .. تهنئة خاصة لقداسة البابا من قطاع الاخبار ومن برنامج اتجاهات التقرير التاني ونعود للحوار فاصل" تقرير عن حياة البابا" قداسة البابا تواضروس الثاني بابا الاسكندرية وبطريرك الكرازة المرقسية ولد باسم وجيه صبحي بالمنصورة لاسرة مكونة منه كاخ لشقيقتين ووالده كان يعمل مهندس مساحة وتنقلت الاسرة في المعيشة مابين المنصورةوسوهاجودمنهور التحق بجامعة الاسكندرية بكلية الصيدلة وحصل على بكالوريوس الصيدلة عام 1975 ذهب الانبا تواضروس الى دير الانبا بيشوي بوادي النطرون في اغسطس عام 1986 وترهبن في عام 1988 وتمت رسامته قسا في ديسمبر عام 1989 وتم ترشيحه ليكون خليفة لمثلث الرحمات البابا شنودة الثالث هوواربعة اخرين هما الانبا روفائيل والقمص روفائيل افامينا والقمص باخوميوس السرياني والقمص سرافيم السرياني وفاز بمنصب البابا عن طريق القرعة الهيكلية ليصبح البابا تواضروس الثاني هو البابا رقم 118 وتمت هذه القرعة وتم هذا الاختيار في يوم تاريخي يوم الاحد الرابع من نوفمبر الجاري فاصل تغريد حسن:قداسة البابا تواضروس الثاني بنرحب بقداستك وبنهنيك تهنئة من مصركلها الحقيقة فرحانة بقادستك وبتدعيلك ولوابتدينا انسانيا الحقيقة وسالت البابا من هو البابا تواضروس الثاني البابا تواضروس الثاني: انسان مشى على ارض مصرواتربى زي كل الاف وملايين من المصريين في اسرة ممكن نعتبرها من الطبقة المتوسطة واتعلم في مدارس مصر وفي جامعات مصر وعمل في اعمال على ارض مصر وبعد فترة من تخرجه اتجه للحياة الرهبنة ومشي في سكة الرهبنة والنهاردة هو خادم لكل مصر تغريد حسن:خادم لكل مصرالحقيقة احلى لقب لان مصر محتاجة من قداستكم الكثير لو سالت قداستك عن معنى تواضروس وانا اعلم انها عطية من الله البابا تواضروس الثاني:تواضروس بتنطق باللغة القبطية بيقابله ثيودوروس باللغة اليونانية وهو جاي من سيموس معناها الله باليوناني ودورا او دور ومعناها عطية او هبة فالاسم على بعضه معناه عطية الله ودا اللي احنا بنترجمه في العربية عطية او بنستخدمه في الصيغة المبسطة تادرس او بنستخدمه بلغة قبطية اخرى سيداروس كل دي بتدور في نفس المعاني تغريد حسن:اخترت لقب الثاني ليه ياقداسة البابا البابا تواضروس الثاني:انا ما اخترتش حاجة خالص لا اخترت اسمي ولا لقبي .. في التقليد القبطي ان تكرار الاسم في سلسلة الباباوات بيتقال عليه الاول والتاني التالت يعني لما كنا بنقول البابا شنودة التالت يبقى سبقه في التاريخ اتنين اباء بطاركة حملوا اسم شنودة لما نقول البابا تواضروس التاني يسبقه في التاريخ واحد حمل اسم تواضروس فالبابا رقم 45 ودا كان في القرن السابع الميلادي حمل نفس السم تغريد حسن:لو حبينا نتعرف على وجيه صبحي سليمان الطفولة كانت ازاي قداسة البابا البابا تواضروس الثاني:انا اتولدت في المنصورة ووالدي ووالدتي كانوا من المنصورةالدقهلية بصفة عامة اماكن مختلفة واحنا في المنصورة صار لي اخت بعدي وبعد كده سن 5 سنين اتنقل والدي لسوهاج والدي كان مهندس مساحة والدتي ربة بيت فاتنقلنا سوهاج واديت طفولة لغاية تالتة ابتدائي وبعدين لما اننقلنا دمنهور بقينا في دمنهور وعام 67 والدي اتوفى وانا في اول يوم من امتحان الاعدادية قعدنا بقى في المنصورة بعد كده لما جت الجامعة بقيت في اسكندرية هي اقرب جامعة لينا يعني مراحل الطفولة كلها كانت طفولة عادية واكتر حاجة كنت اشوفها واشعر بيها اهتمام البيت بالكتب والقراية افتكر زمان انه كان فيه مقال محمد حسنين هيكل عمود اسمه بصراحة يوم الجمعة فكان المقال دا اقعد اقراه والمذيع بيذيعه في الاذاعة الساعة 3 بيتذاع وانا اقعد افتح جرنان الاهرام قدامي واقعد اقراه وياه تغريد حسن:استشف من دا حب قداستك للكتابة اعلم ان قداستك الفت 12 كتاب البابا تواضروس الثاني:حضرتك تعرفي ان خطي الدراسي خط علمي شوية خط الصيدلة والكتابة احب اقرا اكتر لكن برضه فيه بعض كتابات لكن القارية والقراية المنفتحة على كل حاجة مش قراية متخصصة في الدين او حاجة .. لا ..دي قراية في كل شئ تغريد حسن:تمام .. دراسة الصيدلة قداسة البابا كانت مرحلة مهمة جدا في حياتك اتعلمت منها ايه البابا تواضروس الثاني:انا ارتبط في ذهني في سن صغير ان الدكتور الصيدلي في الصيدلية بيريح الناس عنده مغص عنده صداع اي نوع من الالم الشخص دا بيريح الناس فارتبطت في ذهني ولذلك للسبب دا كان نفسي ادخل صيدلة والحمد لله دخلت الكلية ودرست فيها وانا بحب الصيدلة خالص تغريد حسن:قداستك لما تكون في وقت الفراغ تحب تعمل ايه عرفت طبعا ان القراة اساس منذ الصغر بالنسبة الى الكتابة هل فيه خواطر معينة البابا تواضروس الثاني:الكتابة مرتبطة بفترات الهدوء لو انا في فترة هدوء ممكن اكتب في وقت من الاوقات في مرحلة ثانوي كنت اهوى المراسة جدا وكنت براسل ناس كتيرة في العالم يعني من اللي راسلتهم اول واحد نزل على سطح القمر ارمسترونج وكان يبعتلي جوابات ويبعتلي صور وانا طالب كده كنت في تانية ثانوي او تالتة ثانوي يعني الخطابات بصفة عامة .. لما يبقى فيه وقت هادي ممكن اكتب ولما يبقى فيه موضوع شاغلني ممكن اكتب فيه مش منتظم في الكتابة يعني لكن القراة دي هواية اساسية الامر التاني كان التصوير التصوير بصفة عامة وكانمن احلامي وانا صغير ازاي يبقى عندي كاميرا وازاي اصور وازاي يقى عندي صورة جميلة .. واحنا في اعدادي وثانوي اتعلمنا في المدرسة النجارة في وقت من الاوقات ابتدت تستهويني يعني بصفة عامة الاعمال الفنية تشدني تغريد حسن:يعني انا ملاحظة قداسة البابا ان قداستك بتعتني بالتفاصيل قوي عني ايضا مهنى بتهتم بالتفاصيل البابا تواضروس الثاني:اهوهي من النقط تكون الصورة اي صورة عبارة عن نقط تغريد حسن:والفوتوغرافيا فيها برضه نفس المكونات البابا تواضروس الثاني: اه .. الفن بصفة عامة حاجة مهمة هو اللي بيجعل الحياة حلوة في عينين الانسان والفن في كل شئ يعني البيت المرتب والكتاب اللي اخراجه جيد الصحيفة المنظمة اللي فيه جاذبية في كل كل شئ الكنيسة المنظمة الشارع الجميل وهكذا تغريد حسن:قداسة البابا ياة الرهبنة تجربة خاصة احكيلنا عليها البابا تواضروس الثاني:الرهبنة زي ماحضرتك تعرفي في التاريخ نشات على ارض مصر والرهبنة بنسميها هي هدية مصر للعالم المسيحي يعني اول دير واول راهب واول سائح في العالم كله نشا من ارض مصر وانتقل الى العالم كله الرهبنة احنا اكتر شعب في العالم بيحب الاديرة ويحب الرهبنة ويمكن حضرتك لاحظتي وانتى بتشرفينا هنا في الدير ان فيه رحلات كثيرة جدا مش يقضي اليوم في اي حاجة لكن ييجي الدير فسحته الدير هو بيشعر ان حضوره وارتباطه بالدير وانا من صغري بحب اروح الدير وافتكر مرات كتيرة كنت اجي خلوة واقعد كده في مناطق الصحرا المفتوحة واقعد اصلي