السبت 23/7/2011 مفيد فوزى : أهلا بحضراتكم أتحدث إليكم من أحد أندية القاهرة صبح من أيام يوليو العدسات فيها تلتقط وجهات النظر الصغار والكبار أيضا كل هذا يتجمع فى أستديو الشارع الذى ينزل إلى الشارع لكى يعرف جيدا كيف يفكر ؟ وكيف يستنبط ؟ وكيف يتأمل يتجمع كل هذا فى حديث المدينة ومعكم مفيد فوزى. فاصل مفيد فوزى: صباح الخير ممدوح طه خليفة :صباح النور يا فندم أهلا وسهلا مفيد فوزى: وشك مش غريب علي ممدوح طه خليفة :أحنا كنا زمايل مع بعض فى المدرسة مفيد فوزى: أنا وحضرتك ؟ ممدوح طه خليفة : أيوه يا أستاذ مفيد كنا تلامذة فى إبتدائى مع بعض مفيد فوزى: اسم حضرتك أيه ؟ ممدوح طه خليفة : ممدوح طه خليفة مفيد فوزى: ممدوح طه خليفة ممدوح طه خليفة : أه مفيد فوزى: أه تمام كان زميلنا عزت المراكشى ممدوح طه خليفة : تمام مفيد فوزى: وحسين على رشدى ممدوح طه خليفة : حسين على رشدى دلوقتى دكتور فى أمريكا مفيد فوزى: وعبد الحليم الدرباشى ممدوح طه خليفة : الله يرحمه عبد الحليم دخل الشرطة وتوفى بعد ما إتخرج بمدة يعنى مفيد فوزى: حضرتك بتشتغل أيه حاليا ؟ ممدوح طه خليفة : أنا دلوقتى لواء متقاعد بدرس فى بعض المعاهد العسكرية وماسك لجان الزكا يعنى مكرر ليها مفيد فوزى: يعنى أنت رجل عسكرى ؟ ممدوح طه خليفة : أنا رجل عسكرى أه 36 سنة مفيد فوزى: 36 سنة فى القوات المسلحة ؟ ممدوح طه خليفة : أيوه مفيد فوزى: أما أيام غريبة جدا على فكرة من أعز الصداقات صداقات مقاعد الدراسة ممدوح طه خليفة : طبعا أحنا كنا جنب بعض فى فصل واحد كمان مفيد فوزى: كمان فى فصل واحد عايز اسألك المجلس العسكرى الأن أحيانا يستجيب للميدان أحيانا يكشر للميدان أحيانا يستجيب للمقتضيات الحال اللى ينبغى انه يحسم بيها الأمور كيف ترى مشهد المجلس العسكرى الأن ؟ وأنا بسألك كرجل عسكرى ممدوح طه خليفة : والله أنا بقول لحضرتك هو معذور أولا المجلس العسكرى النهاردة كقيادة للدولة تحكمه روابط عدة دولية يعنى هو فى ال3 ساعات اللى كانه طوارىء هو ماكنش فيه طوارىء المنظمات الدولية قالت حكم عسكرى مش حكم عسكرى أى إجراء النهاردة بيتعمل حكم عسكرى ولو إنى أنا رجل عسكرى لكن مش عايزين حكم عسكر زى زمان لأ عايزينها دولة مدنية بس الناس تصبر شوية يعنى الشباب يعنى أنا فوجئت انه الشباب رافضين الحكومة اللى ألفها شرف ويقولوا ما أخدش الشرعية تخيل كل رئيس وزارة يجيى يبتدى يلم شباب مصر كذا مليون ويقولهم أيه رأيكم فلان يبقى وزير كذا ؟ يطلوا 100 ألف يقولوا لأ و100 ألف يقولوا طب أيه ده ؟ ما تستنى لما الوزارة تتشكل وتشوف الإقتصاد اللى عمال يوقع ونشتغل دا رأيى أنا إنما المجلس معذور أنا واحد من الناس لا أتمنى أن أكون فى المجلس بالشكل دا وفى الظروف دى مفيد فوزى: ليه أنت حاسس انه فى مازق ؟ ممدوح طه خليفة : طبعا لأونا مطالب داخلية يصعب تحقيقها كل واحد عايز علاوة يقولك أنا معتصم كل واحد عايز يترقى معتصم وبعدين مش عاجبنا ده وعاجبنا ده طب يعمل أيه المجلس العسكرى ؟ مفيد فوزى : عاوز أعرف وجهة نظر حضرتك فى الإتفاق والإختلاف حول الوزارة الجديدة التى ربما لما يطلع البرنامج يوم الجمعة تكون حلفت اليمين تقديرك أيه ؟ د:ميشيل سليم : تقديرى يعنى لسه ما بنش يعنى شباب الثورة هيعترض أو هيوافق وشباب الثورة يعنى دا أهم حاجة أسمحلى أقولك أهم من المجلس العسكرى وأهم من رئيس الوزارة شباب الثورة أنا مقدرش أقول لحضرتك دلوقتى لأن أنا مش عارف أيه هما الوزرا أللى إتفقوا نهائى عليهم يعنى مثلا فى وزرا مشكوك فى أمرهم هيستمروا أو هيتغيروا ؟ فلما تبان المنظومة هنقدر نقول رأينا بس يعنى قبل رأينا رأى شباب الثورة لانه أعتقد انه شباب الثورة واعى جدا وبيدرس كويس مفيد فوزى : أنا شايفك منشغل بأشياء كثيرة جدا على عبد الرحمن : قانون السلطة مفيد فوزى : قانون السلطة فى تقديرك الإبقاء على وزير الداخلية مش مطلب من مطالب شباب الثورة شايف الثورة إزاى ؟ على عبد الرحمن : لو قلت الصورة هبقى متحيز شوية مع أنى أنا ظابط بوليس سابق لازم ندى السيد الوزير فرصة علشان يطبق اللى فى دماغه ولازم نتدرج فى الأمن درجة درجة يبقى فيه منظومة عمل فى الشارع فى منظومة عمل داخل دولاب البحث الجنائى فى منظومة عمل نحو إعادة تأهيل أفراد الشرطة كلها مفيد فوزى : دى الدرجات اللى حضرتك بتتصور لإعادة الأمن فى البلد على عبد الرحمن : هو قادر على انه هو يعملها القرارات المتسرعة سواء أنا هتكلم خارج جهاز الشرطة سواء فى تشكيل الحكومة أو فى أى قرار بيعترض عليه أبنائنا الثوار اللى أحنا بنشكرهم وبنترحم على أرواح الشهداء لأن لولا هما مكناش أنا وأنت قدرنا نتكلم بحرية وبصراحة لابد انه يحطوا أهداف الثورة دى فى كتالوج يقراها كل واحد هيطلب منه إصدار قرار إن القرار يصدر متأنى القرار يصدر محقق لمطالب الثوار لكن مش أنا أشكل وزارة ويطلع إعتراضات ون فئة أو من فئ أو من فئة ومن طيف سياسى ومن طيف سياسى وبعد كده أرجع فى القرار لأ أنا عايز حكومة قوية الحكومة تبقى قوية أمتى ؟ لما تدى قرار متأنى ومدروس مفيد فوزى : يعنى لما حضرتك شايف انه رئيس الوزراء يبقى قوى على عبد الرحمن : متأنى فى قراره وحقق مطالب الثوار مفيد فوزى : هل ينطبق هذا الكلام على عصام شرف ؟ على عبد الرحمن : اللى أنا شايفه ما ينطبقش مفيد فوزى : يعنى أنا بتحضرنى لما كتب أحمد رجب يقول انه شكرا لعصام شرف انه عمل تشكيلة جديدة من الوزراء يكمل جميله بقى ويشوف لنا رئيس وزراء على عبد الرحمن : هى طبعا طريقة تهكمية هو معروف بيها والناس شايفة كده مفيد فوزى:أنا حرصت انه اسألك لأنك كمدير تجارى عايز أعرف الإقتصاد فى مصر ماشى إزاى ؟ أحمد محمد سالم : الإقتصاد فى مصر حاليا ضعيف جدا لأن الإستثمار الخارجى معندوش ثقة دلوقتى فى الإستقرار السياسى فى الجو اللى أحنا فيه الإستثمارات إبتدت تقل وفيه إستثمارات إبتدت تنسحب يعنى الشركات السعودية كانت بتعمل مشروع كبير فى 6 إكتوبر وقفت المشروع نتيجة انه مش عارفة المستقبل فيه أيه ؟ فالبتالى دا ضر بإقتصاد البلد دا الناس اللى مش عايزين يعرفوه أو بيغمضوا عينيهم عنه هو الثورة أه كان فيه فساد وإتشال خلاص لكن بقى نفكر إزاى نبنى البلد ؟ لكن منقعدش نعمل إعتصامات ونعمل مظاهرات ونضر بحال البلد أكتر وأكتر وأكتر كل الناس بيتكلموا طب ما فى الثورة اللى هى التركية الثورة مش عارف فين ؟ الثورات عملت ونجحت وكانت عملت أجندة ليها فبالتالى الدول بتاعتها نجحت تركيا دلوقتى بقت تنافس فى دول الإتحاد الأوروبى وأقوى منهم فالبتالى اللى بيحصل دا كله بيضر بإقتصاد البلد تماما وفى القريب العاجل إذا إستمرينا على الوضع ده الهزل اللى أحنا فيه دلوقتى حاليا مفيد فوزى:أنت بتتكلم طبعا من واقع ملامستك لطبيعة العمل أيه نوع النشاط اللى حضرتك بتشتغل فيه؟ أحمد محمد سالم : مكافحة الحرائق فطبعا مشاريع كتيرة مشروع مدينتى واقف دلوقتى لأن مش عارفين القضايا هتروح بيهم لغاية فين ؟ شوف كام ألف عامل ممكن يقعد فى البيت بسبب المظاهرات والقضايا اللى مرفوعة على مشروع مدينتى معترضين على مشروع زى مدينتى ليه ؟ الراجل خد أرض صحرا وعملها حياة من الألف إلى ال ى مفيد فوزى : أفتكر أنها قيد جهاز الكسب الغير مشروع مش كده؟ أحمد محمد سالم : نعم مفيد فوزى : وبالتالى الضحايا فيه العمال ؟ أحمد محمد سالم : العمال طبعا شوف كام ألف عامل بكم ألف عيلة ؟ عشرات الألاف عمال هيضروا لأن كل عامل أكيد متزوج وعندوا ولد أو ولدين مش أقل من 4000 فرد هيضروا ليه يا جماعة أحنا بنبص للجزء الفاضى ؟ ليه دايما أحنا معترضين ؟ الشعب العربى مش هقول الشعب المصرى أحنا شعب معترض دائما وأبدا وفيه إضافة بقى أحنا شعب مستهلك ما بنفكرش علشان نبنى البلد هما عايزين يبنوا بلد ما بيبنوش بلد مفيد فوزى : شكلك عايش مش فى مصر أحمد عثمان :لا لا لأ أنا بقالى 47 سنة فى لندن من سنة 64 مفيد فوزى : الأنجليز بيشوفونا إزاى ؟ أحمد عثمان : والله مفيد فوزى : الأن أحمد عثمان : الأن 25 يناير ؟ مفيد فوزى : لأ أنا عايز أقول الأن والأن دا على المشهد الحالى أنت واصل أمتى من لندن ؟ أحمد عثمان : أول أمبارح مفيد فوزى : تسمح تقولى الفترة اللى هى قبل ما تيجى مباشرتا كيف يرى الإنجليز مصر الأن ؟ أحمد عثمان : الحقيقة الناس محتارين الثورة بعد ما نجحت والشباب نالوا إعجاب الناس كلها حصل دلوقتى الخوف لما ظهرت جماعات سلفية وإخوان مسلمين وإسلام سياسى وكده وهما كانه منظمين لأن هما عندهم الجوامع فيها لكن الليبرالين دول لسه ماكونوش أحزابهم يعنى لو عملت إنتخابات النهاردة بطبيعة الحال اللى منظم هو اللى هيكسب واللى هيحتل البرلمان الأول دا يعنى الأخوان المسلمين هما اللى هيحكموا البلد وبالتالى يحصل الدولة الإسلامية ما هم متحالفين مع بعضهم إيران وحزب الله وحماس مفيد فوزى : دى رؤية الإنجليز هناك ؟ أحمد عثمان : كل العالم خايف مفيد فوزى : لأ أنا بتكلم عن إنجلتر اللى أنت جاى منها أحمد عثمان : إنجلتر وأمريكا والعرب السعوديين كمان وكل الناس بصراحة يعنى يعنى دلوقتى أى حد يقولك أى حاجة أحسن من ده خايفيين بعد ما كانه متحمسين جدا ثورة الشباب ديمقراطية على النظام الأوروبى حاجة يعنى تفرح القلب بعد الإرهاب وخطف الطيارات بدأ الشعب المصرى الشباب يطلع يطالب بالديمقراطية والحرية فى التكوين البرلمانى فجأة ظهرت الناس اللى ماكنوش فى الثورة فى الأول لكن الثورة كسرت الحواجز قدامهم وأطلقت سراحهم مفيد فوزى :حضرتك طبعا عايش فى لندن ؟ أحمد عثمان :أه مفيد فوزى : ثارت من فترة كلام عن الفنانة سعاد حسنى أحمد عثمان : سمعت كلام إن الجرايد طالبت بفتح التحقيق وإن الجرايد إتهمت شريف مفيد فوزى : وإتقال انه إسكتولاند يارد قفلت التحقيق تماما هل دا حقيقى؟ أحمد عثمان : لأ ما هو طالما مفيش حاجة ظهرت فى التحقيق يعنى مفيش إشتباه فى إرتكاب جريمة لأن إحتمال الإنتحار هو الإحتمال الغالب بيقفل موضوع التحقيق مفيد فوزى : إلا لو ظهر أو دليل يثبت عكس ذلك أنت كمصرى شفتها ؟ أحمد عثمان : لأ مشفتهاش الحقيقة أنا إتصلت بيها فى التليفون لأنها قلتلها تعالى أنتى لوحدك هنا تعالى نساعدك تيجى تاكلى عندنا يعنى أنت لازم محتاجة حاجات طبعا كانت بتاخد حقن الكرتزون وكده وشكلا يعنى مش الشكل اللى هى تحب تظهر فيه فقالت لما أخف وطبعا المرض دا طويل معاها لأ مشفتهاش الناس اللى شافوها الأول معرفوهاش مفيد فوزى : أستاذ أحمد أنا إفتكرت دلوقتى حاجة مهمة جدا هل كنت يوما قد تقدمت لخطبة سعاد حسنى ؟ أحمد عثمان : أه كنا إتفقنا انه أحنا نتخطب وبعدين نتجوز لكن هى فى اللحظة الأخيرة قالتلى أنا محتارة الحقيقة بينك وبين عبد الحليم حافظ إدينى فرصة أخيرة يعنى أفكر ما تكلمينيش خالص وبعدين كلمتى أكون فكرت ففعلا قعدت أسبوع مكلمهاش مفيد فوزى : أحمد عثمان صح أحمد عثمان : أه قعدت أسبوع مكلمهاش وبعدين لما إبتديت أتكلم كانت بترد أمها أو أختها نايمة خارجة بتاع فعرفت أنها يعنى إختارت مفيد فوزى : أستاذ أحمد عثمان هل ماتت سعاد حسنى ميتة طبيعية ؟ أحمد عثمان : ما أعتقدش أعتقد أنها إنتحرت مفيد فوزى : بمعنى أنها ؟ أحمد عثمان : نطت فوق ال مفيد فوزى : بنفسها ؟ أحمد عثمان : بنفسها لأن كانت هتعملها قبل كده هى قالتلى بنفسها إن هى كانت هتعملها يعنى لما قابلتها بعد فترة قالتلى قابلتها بالصدفة قالتلى أنت ما بتكلمينيش ليه ؟ قلتلها خلاص قالت لى أنت متعرفش أيه اللى حصلى ؟ قلت لها أيه اللى حصلك ؟ قالت لى دا أنا رحت مجمع التحرير وطلعت فوق كنت هرمى نفسى لولا راجل مسكنى قلت لها ليه ؟ قالت لى كنت محتارة فإذا كانت وهى عندها حوالى 23 سنة أما دخلت فى مشكلة محيرة كانت هتنتحر يعنى الفكرة موجودة عندها لما السفارة المصرية فى لندن كانت هتجبرها أنها ترجع مصر وهى شكلها قدام الناس السينيورة جاى مسكينة مكسوفة من نفسها فى الحالة دى كان صعب عليها أنها ترجع تانى أفتكر سعاد إنتحرت فاصل مفيد فوزى : تأذنيلى أعرف حضرتك بتشتغلى أيه علشان خاطر أعرف وجهة نظرك ؟ نجوى رضوان : أنا ست بيت مفيد فوزى : ست بيت جميل جدا أيه رأى ست البيت فى الوزارة الجديدة حواليها كلام ؟ نجوى رضوان : والله من ساعة الثورة دى والدنيا باظت يعنى الواحد مبقاش يعرف لا ينزل الشارع ولا يعرف يتعامل مع حد بالذات الأمن مأثر على البلد الحياة بقت صعبة أحنا أيام الرئيس السيد حسنى مبارك كانت الحياة أه غالية وكنا تعبانين بس على الأقل فيه أمان كانه ولادنا بيتزلوا فى أمان وعايشين فى أمان الحاجة كانت غالية بس كنا راضيين مش مهم الحرية الزايدة قوى دى والديمقراطية الزايدة دى بس على الأقل نبقى حاسين انه أحنا راضيين على نفسنا أحنا مش راضيين على نفسنا تعبانين جدا ولادنا تعبانين والدنيا غلت بشكل غير عادى مش عارفين نعيش يعنى صراحتا الواحد بيفكر يهاجر لكن بنحب بلدنا وما نقدرش نسبها مفيد فوزى:أنتى بتقولى هذا الكلام وأنتى تشعرى انه حصل فى مصر سلب ونهب على أرض وعلى فلوس وكنا جميعا عميانا بإقتدار صح ؟ نجوى رضوان : صح مفيد فوزى : كان ممكن جدا أى فلوس قليلة تحل إشكالات كتيرة وكان ممكن اللى عند فلان وعلان يحلوا أزمات فى الصعيد نجوى رضوان : أكيد أكيد بدل ما كنا يعنى بناخد معونات من أمريكا ومن أى دولة مفيد فوزى : إذا كانت الأموال الرهيبة دى اللى النهاردة فى محاولات مستميتة قانونا لإعادتها والله أعلم هترجع ولا مش هترجع وأظن أنها مش هترجع نجوى رضوان : اللى بيروح ما بيرجعش يا أستاذ مفيد مفيد فوزى : طيب فهمينى أين نحن من هذا الذى جرى ؟ نجوى رضوان : أحنا إتحكم علينا بالضياع ومش عارفين الى جاى بكره أيه ؟ أحنا قاعدين كده بنقول يا رب أستر المهم انه الدنيا تبقى ماشية بسلام المهم انه أنا أبقى قاعدة ومرتاحة نفسيا وشايفة الدنيا ماشية صح الناس كلها خايفة الإنفلات الأمنى يا أستاذ مفيد مخلينا مرعوبين بقينا نقفل بيوتنا ونخرج كنا زمان لما ناكل أكلة حلوة نقول تعالوا ننزل الحسين 3 ، 4 الفجر دلوقتى تقدر ؟ ما تقدرش مفيد فوزى : نتعرفك على حضرتك أحمد عاطف الصاوى : أحمد عاطف الصاوى مفيد فوزى : العمل أيه ؟ أحمد عاطف الصاوى : لواء سابق فى القوات المسلحة مفيد فوزى : رجل عسكرى أحمد عاطف الصاوى : أيوه يا فندم مفيد فوزى : قولى تقديرك الشخصى فى الخلاف حول وزراء عصام شرف أحمد عاطف الصاوى : أولا عصام شرف راجل محترم جدا جدا رواجل نزيه جدا وقراراته بتعجبنى ولكن أدائه الأدب الزائد عن الحد هو دا اللى بيشجع الناس يعنى تنتقده ثما إن هو أختاروه رئيس وزرا من ميادن التحرير ورفعوه على الأعناق ثما انه هو بيختار الناس طبقا للكفاءة وليس طبقا للأسم أو لأى حاجة تانية فأنا واثق فى إختياراته ثما لابد انه أحنا نديلهم فرصة على الأقل الفرصة اللى جاية دى لغاية ما يثبتوا كفاءتهم بس مفيد فوزى :شايف المجلس العسكرى بيبص إزاى لحكومة ؟ أحمد عاطف الصاوى : أولا ما حدش بيحب البلد دى وبيضحى فى سبيلها زى القوات المسلحة أفنوا حياتهم أنا قعدت 30 سنة ظابط المشير 50 سنة ظابط فى سبيل هذا البلد تمام أو 55 سنة فى سبيل هذا البلد فهو بيهموا بالذات انه هذا البلد يفضل مستقل فى سعادة فى تقدم إقتصادى فى تقدم سياسى تقدم إجتماعى هو يهمه بالدرجة الأولى هذا المنطق ولكن انه أنا أقف على أيده علشان خاطر يتصرف أسيبه هو يتصرف وهو بيتصرف فى منتهى الحكمة مفيد فوزى : ليه إتفسرت غلط كلمة اللوا الفنجرى أحمد عاطف الصاوى :قالوا الفنجرى لما وجه كلامه هو وجه كلامه للناس فى الأول مفيد فوزى : أنا حريص انه أنا أقولها على شاشات التليفزيون علشان خاطر جموع البشر تعرف أحمد عاطف الصاوى:جموع البشر تعرف انه التهديد لما رفع إيده هو ما بيهددش العامة هو بيهدد الناس اللى هى بتحاول أنها تخرب فى البلد مفيد فوزى : القناة بالذات أحمد عاطف الصاوى : أيوه مش ممكن قناة السويس يقفلوها يعنى أيه ؟ يقفلوا مجمع التحرير يعنى أيه ؟ يقفلوا الميدان والنهاردة سامع إن هما بيقولوا هيجيبوا تريلات ويقفلوا الميدان كلام فارغ وكلام غير معقول من ناس بتحب بلدها اللى بيحب بلدوا يبنيها النهاردة أحنا هدينا حاجة قبل كده كنا عايشين فيها فى ظلم النهاردة عايزين نبنى ننسى اللى فات ونبتدى نحط إيدينا فى إيد بعض ونبنى شفت النهاردة فى مشاريع قومية كتير جدا جدا سواء فى شلاتين أو غرب القناة أو الوادى الجديد كل دى مشاريع عايزة لشباب وحتاجة لى إيد عاملة أنا لغاية دلوقتى بشتغل أنا عندى 75 سنة ولغاية دلوقتى بشتغل أنا خرجت من الجيش لوا وسنى 48 سنة النهاردة عندى 75 شوف قد أيه وبشتغل فاصل مفيد فوزى : أهلا بيكى بتشتغلى أيه ؟ منال السيد حسن : مدرسة إنجليزى مفيد فوزى : متخرجة منين ؟ منال السيد حسن : كلية أداب القاهرة مفيد فوزى : قسم إنجليزى منال السيد حسن : لأ أنا مش قسم إنجلش أنا كنت إنجلش إسكول وأخدت كورسس بعد ما إتخرجت وإشتغلت فى مدرستى أللى أنا إتخرجت منها وبعدين إشتغلت فى مدرسة تانية مفيد فوزى : قوليلى الولاد بيسألولكى بيقوللك أيه ؟ مهم أعرف قوى الولاد فى الفترة دى يعنى اللى فاتت من يناير للنهاردة أيه الأسئلة اللى بيوجهالك ؟ منال السيد حسن : عندهم تساؤلات عن القلق اللى كان حاصل أياميها بس أحنا كنا بنحاول يعنى نمحى الخوف ده من جواهم مفيد فوزى : قلق إزاى فهيمينى ؟ منال السيد حسن : قلقلنين من الأصوات قلقانين من أى صوت عالى يعنى لأ بيخافوا وفى منهم كان قلقان يجيى المدرسة قلقان من النزول من البيت مفيد فوزى : يعنى مش عايز يجيى ولا أهله منعينه منال السيد حسن : خايفين يعنى بنت خايفة تسيب مامتها فى البيت لوحدها لأنها معتقدة انه الحرامية هيدخلوا البيت مفيد فوزى :معنى خطير جدا ومعنى سيىء كان لا ينبغى انه دا كان يسود عند الناس منال السيد حسن : براعم مصر يعنى أمل مصر مفيد فوزى : حضرتك كمدرسة وواعية يعنى حاسة انه البنت المصرية لعبت دور فى الثورة ؟ منال السيد حسن : أنا مع إن هى تلعب دور إيجابى لأن هى أكيد لعبت دور بشكل محترم ولائق لكن إن هى تنزل وتعمل الحاجات الغريبة والهتافات لأ أنا شايفة انه كل واحد بيعمل دور إيجابى بالتعبير بشكل محترم مفيد فوزى : أنتى وجهة نظرك أيه فى الإختلافات حول وزراء رئيس الوزراء عصام شرف؟ منال السيد حسن : والله هما لسه ملحقوش يعملوا حاجة بس أنا خايفة فعلا أنا سمعت رأى صحفى فى التليفزيون عجبنى جدا مفيد فوزى : بيقول أيه ؟ منال السيد حسن : بيقول انه المفروض القوات المسلحة تكلف الحكومة فى الفترة الإنتقالية اللى أحنا فيها بمجموعة مهام المستطاع القيام بها فى الفترة دى مفيد فوزى : بمعنى أيه؟ منال السيد حسن : بصراحة أنا شايفة الناس فى الشارع متبهدلة لسه وأحنا جايين عسكرى غلبان جدا واقف فى الحر يعنى أقل حاجة أقل حاجة يعنى مثلا إديله مثلا إزازة مية ويوقفوا تحت مثلا شلتر أو حاجة تضلله الراجل دا غلبان واقف بينظم على المحور فأنا شايف انه هما يعملوا الحاجات البسيطة يبدأوا بيها مفيد فوزى : أنتى طالبة ؟ نوران سيد : أنا عايشة فى باريس مفيد فوزى : عايشة فى فرنسا ؟ نوران سيد :أيوه مفيد فوزى : بتعملى أيه هناك ؟ نوران سيد : أنا فى تلاتة إعدادى مفيد فوزى : لكن أنتى مصرية ؟ نوران سيد : أه مفيد فوزى : بابكى مصرى ووالدتك مصرية ؟ نوران سيد : أيوه مفيد فوزى : طب ايه اللى وداكى باريس ؟ نوران سيد : أنا مولودة هناك مفيد فوزى : مولودة فى باريس أنتى جاية فى أجازة ؟ نوران سيد : أمممم مفيد فوزى : قوليلى فرنسا بتبص إزاى للثورة اللى حصلت ؟ نوران سيد : يعنى بصراحة هما مفتخرين بالثورة اللى حصلت وبس مفيد فوزى : يعنى أيه ؟ نوران سيد : يعنى مبسوطين من اللى حصل مفيد فوزى : مبسوطين من اللى حصل ؟ نوران سيد : مبسوطين بثورة 25 يناير بس فيه ناس معارضين مفيد فوزى : إزاى ؟ نوران سيد : كانه مع الريس يعنى كانه ضد إهانته ضد إهانة الرئيس ولكن كان فيه معارضين بردوا للثورة كان فيه معارضين وكان فيه مؤيدين بردوا مفيد فوزى : أنتى ضدإهانة الرئيس ؟ نوران سيد : أيوة أنا إهانة الرئيس مفيد فوزى : يعنى ممكن يحصل حكم أه القانون يعنى يحاصروا أه إنما أنتى ضد الإهانة نوران سيد : أه علشان هو عمل إنجازات كتيرة للبلد ويعنى ما ينفعش انه 30 سنة تتمسح من تاريخ البلد مفيد فوزى : أنتى عندك كام سنة ؟ نوران سيد : 13 مفيد فوزى : أنتى جريئة قوى نوران سيد : ما أنا فاهمة بقى تاريخ بلدى مفيد فوزى : يعنى أنتى عارفة تاريخ مصر بالرغم انه أنتى عايشة فى فرنسا ؟ نوران سيد : أه طبعا أنا بتابع على طول أخبار مصر طبعا حتى لو عايشة فى غربة بردوا بتابع الأخبار كل اللى بيحصل فى مصر أنا عرفاه مفيد فوزى : المدرسة اللى أنتى فيها أنتى فى مدرسة مش كده ؟ فى مدرسة أيه ؟ نوران سيد : مدرسة إعدادى مفيد فوزى : بتزورى أيه فى مصر لما بتيجى هنا ؟ نوران سيد : بزور النادى الأهلى أول حاجة مفيد فوزى : ليه أنتى أهلاوية ؟ نوران سيد : أه أهلاوية أه وبحب يعنى أروح أشوف محمد ناجى جدوا علطول مفيد فوزى : مين ؟ نوران سيد : محمد ناجى جدو هداف المنتخب مفيد فوزى : هداف المنتخب أشمعنى يعنى ؟ نوران سيد :يعنى بحب لعبه معجبة بلعبه مفيد فوزى : تعرفى عمرو نور ؟ على أيامى ده زمان نوران سيد : لأ مفيد فوزى : عمرو نور دا كان هداف الزمالك كان شخصية كنا مسمينه المارد الأسمر نوران سيد : لأ معرفهوش مفيد فوزى : أنتى صغيرة 13 سنة فى البيضة فاصل مفيد فوزى : القانونى الكبير بهاء الدين أبو شقة على القاف ضمة صح؟ بهاء الدين أبو شقة : تمام مفيد فوزى : على الناس أحيانا بتقول أبو شقة ودا غلط أنا يمكن بخاطبك لأنك أسمك من أوائل الناس اللى إرتبطوا بالتليفزيون مثلا أنت كنت بتقدم زمان من تأليفك لعبد المنعم مدبولى مسلسل القانون الصريح كنت بطوع فيه القانون للفهم العام وكنت بتنافس فؤلد المهندس فى برنامجه كلمتين ونص كلمتين وبس فضلا على أنك أنت إشتغلت سنوات فى النيابة و109 سنوات كقاضى إذنا جمعت بين القضاء والكلمة المرئية السؤال هو علنية أو سرية الجلسات التى يشاهدها المجتمع المصرى الأن على شاشة التليفزيون لمحاكمات الرموز بهاء الدين أبو شقة : الأصل الإجرائى اللى بيقرروا قانون الإجراءات الجنائية هو علانية الحاكمات وعلانية المحاكمات أن القاضى عندما يصدر حكم يصدر الحكم مسبب وعندما يشترط القانون أن نكون أمام أسباب تخضع للرقابة سواء رقابة محكمة النقد أو حتى الرقابة الجماهيرية دا لأن القاضى عندما يصدر حكم ويسبب هذا الحكم لا ليقنع به نفسه وإنما ليقنع به الكافه يعنى مسألة علانية المحاكمة ليست بدعة جديدة وإنما هى من المبادىء التى تتعلق بضوابط المحاكمات الفريدة سواءا فى مصر أو فى الدول الأخرى التى تلتزم بالشرعية الإجرائية مفيد فوزى : تعلن على شاشات التليفزيون المحاكمات ؟ بهاء الدين أبو شقة : إنما عملية أن ننقل المحاكمات وننقل المحاكمات على شاشات التليفزيون هذه المسألة قد تكون فى هذه المرحلة مرحلة لإرضاء الشارع المصرى أو مفيد فوزى : لأ لما حضرتك كنت بتتكلم على العلانية بهاء الدين أبو شقة : العلانية داخل المحكمة داخل قاعة المحكمة لأن الأدلة الأصل أن الدليل والقاضى الجنائى لا يحكم إلا من واقع ما هو معروضا عليه فى أوراق الدعوة وما يوضح من مناقشات سواء دفاعا المجنى عليه أو المتهم فى الجلسة مفيد فوزى : طيب النقل فى الجلسة عن طريق الشاشة داخل البيوت بهاء الدين أبو شقة : ولذلك قانون العقوبات بيقسم مسألة مناقشة الحكم الجنائى مفيد فوزى : بمعنى ؟ بهاء الدين أبو شقة : رسم القانون الطريق الطبيعى القانونى التى تجرى فيه صحة مناقشة الحكم وعدم صحة إنما ما يحدث الأن أنا بأسميه فوضى لننى بأبتدى أناقش هل هذا الحكم صح أو حكم غلط؟ ومدى صحته ومدى غلط هذا الحكم هذه المسائل مسائل دخيلة وجديدة ولا تتسم بالشرعية الإجرائية أو أو الشرعية القانونية فى هذا الخصوص لأن كون انه أنا أى حكم المفروض انه بيتناول طرف فى طرف بيطلع يقول يحيا العدل وفى طرف أخر محكوم ضده لما بيأخذ عقوبة المدعى المدنى هى الضد وخصوصا إذا كانت العقوبة شديدة إنما إذا قضى بالبراءة يطلع المدعى المدنى ثائر ولذلك كانت العلة فى أن البنيان القانونى سواءا ما تعلق منه بالبنيان الإجرائى أو العقابى يقول أنه تنحصر عند دخول قاعة المحكمة كل حديث مفيد فوزى:هل الشاشات والعدسات والميكرفونات اللى قدام القضاه تشتت القاضى ؟ خلينى أدخل بقى فى جوهر الموضوع ؟ بهاء الدين أبو شقة : هى تشتت القاضى وبتأيده أنا كخبير بالسجون الميكرفون مجردا كحتة حديد له رأيه فمال بال حضرتك لما محكمة تحث أن هناك عيون مسلطة عليها وكل حركة وكل همسة وكل تصرف سواءا أكان كبيرا أو صغيرا بتتناقله الشاشات وبيتناقله الجمهور المسألة اللى أخطر من كده هى تصوير المتهم فى حد ذاته تصوير المتهم لأن حتى العقوبة الجنائية ليست إذلال وليست إنتقاما هناك فلسفة للعقوبة الجنائية وهى الردع وأنما لما أتى بمتهم ولذلك فى أصول المحاكمات الجنائية أن المتهم عندما يمثل أمام القاضى لابد أن تفك الأغلال ما يحضرش وهو مكبل ولابد أن تحول دون أى إجراء يمس من شرفه أو كرامته أو إعتباره مفيد فوزى : لكن عاداتا اللى حاصل دلوقتى هو انه ما يجرى الأن من إذاعة المحاكمات هو بناءا على رغبة الثوار وبناءا على رغبة الرأى العام للتأكد أن هؤلاء الرموز يحاكمون بالفعل بل أن هناك رجلا قاضيا فضيلا جميلا كبيرا قال انه لا مانع من إذاعة الحلقات بهاء الدين أبو شقة : ما أنا هقول لحضرتك حاجة هو العام الماضى مفيد فوزى : أفتكر السيد الغريانى بهاء الدين أبو شقة : الغريانى اللى هو رئيس مجلس القضاء الأعلى الأن مفيد فوزى : أفاد بانه لا مانع من الإذاعة العلنية بهاء الدين أبو شقة : هو الإذاعة شيىء وأن تكون هذه الإشاعة بما من شأنه أن يؤثر على فكر القاضى أو على حرية القاضى وهو يدير الجلسة لأن الناس بره بتحكم على مش عارف أيه حصل بص كده للمتهم بص لمحامى المجنى عليه أبتسملوا إبتسامة غير مقصودة كل هذه المسائل لها أثارها وقد يكون أثر سيىء فيما قد يبنى عليه الجمهور وما يؤثر فى الشارع السياسى فى هذا الخصوص ولذلك العام الماضى مجلس القضاء الأعلى إجتمع وأصدر قرار بمنعهم الأول وهو تصوير المحاكمات الجنائية والثانى بمنع التعليق عبلا الأحكام التى تصدر مفيد فوزى : لكن هذا ظرف إستثنائى بهاء الدين أبو شقة : ما أنا بقول عندما نخضع للقاعدة أن الضرورات تبيح المحظورات لابد أن نأخذ ذلك كما حضرتك أشرت إلى أننا أمام ظرف إستثنائى لا يشكل قاعدة عامة بل الإستثناء هو الخروج عن القاعدة إنما القاعدة عدم التصوير إنما علشان نريح الشارع ويحث أنه أمام محاكمات عادلة ومنصفة وبتتحقق فيها كافة المحاكمات العادلة والمنصفة التى يمكن فيها أولياء الدم فيما يحضر عنهم المدعين بالحق المدنى ومحامين بيحضروا مع الدفاع بيؤدى واجبهم وفقا لما رسمته الدساتير والقانون وقانون الإجراءات فى هذا الخصوص يبقى ما دامت هذه المسألة فيه إراحة لفترة لحظية وموقته بظرفا معين فإذا ما زال هذا الظرف عدنا إلى الأصل العام.
