تصدقوا لو واحد من اللي كاحضروا اجتماع مرسي اقترح ان حسن شحاته هو اللي يمسك ملف أثيوبيا وسد النهضة .. بما انه خبرته الأفريقية كبيرة جدا .. وكفاية انه جاب لمصر بطولة أفريقيا 3 سنين ورا بعض .. كنت احترمته .. أهى هرتلة في هرتلة .. لكن كانت أهون عليا من إني اشوف الريس وحواليه كام واحد .. فيهم للأسف الشديد ناس مفروض أنها محترمة .. ويقوموا يتكلموا كلام غبي وعبيط واهبل .. وخطط عسكرية .. وعمليات تمويه .. ونبعت مش عارف إيه .. ونطيّر كام طيارة للترهيب .. وبطريقة عبد الغفورالبرعي .. في لن أعيش في جلباب ابي .. " نعرّق " اريتريا والصومال بقرشين من تحت التربيزة .. ما انت عارف يا ريس الأفارقة .. نظام أبجني تجدني .. واطعم الفم تستحي العين .. وبالطريقة دي حتخاف اثيوبيا و" تعملها " على نفسها ... انا مش مشكلتي ان الاجتماع كان ع الهوا .. وان خطتنا الإستراتيجية اللولبية الفظيعة وصلت لأثيوبيا بدون أى عناء منها .. انا مشكلتي ان العالم كله ضحك علينا وعلى رأس الدولة مرسي ذات نفسه .. والجماعة الوطنية .. - كريمة المجتمع و" خراه " ايضا - تقول الكلام العبيط ده .. كأننا عايزين نتخانق مع كام واحد صايع في الحارة اللي جنبنا .. وبنعمل له خطة متخرش الميه ، عشان نجيب مناخيره الأرض وميعرفش يرفع عنيه فينا تاني .. مش بنناقش قضية حياتية تتعلق بمصير امة .. بقى هما دول بما فيهم مرسي اللي الملف في ايديهم .. يبقى زغردي يا اثيوبيا .. وحلال عليكي سد النهضة .. ولو عايزة السد العالي بتاعنا تعالي وخديه .. مادامت هذه هى العقول التي تفكر .. وهذه هى الهامات العالية والقامات العملاقة اللي بتضع لجناب الرئيس خطة تركيع اثيوبيا .. وهى مش عارفه ان الحوار مذاع ع الهوا.. " خالتي باكينام " .. نسيت تقول لهم .. بس الحمد لله انها نسيت .. عشان مصر كلها " تشخر " لهذه النخبة اللي الكبير فيهم ميجبش حق علبة كليوباترا سوبر!
بس انا عاجبني أيمن نور .. لذيذ وظريف ودمه يلطش مديرية .. مش عارف ازاى قفا زي ده كان ممكن يبقى رئيس جمهورية في 2005 بعد مبارك .. مبارك خلعناه بثورة .. ولو أيمن نور كان مسك .. كنا خلعناه بصباعنا .. ايه يا عم ايمن .. ايه الانشكاح ده وانت في حضرة رئيس الدولة .. وتمويه ايه ونيلة ايه اللي انت بتقول عليه .. خلاص يعني .. اثيوبيا مستنية طيارة مصرية تحلّق في سماها عشان تخاف وتجيب واطي .. ومش عارف انت ولا " بأف " غيرك اللي بيقول وع الهوا ان كام بلد افريقي ممكن نرشيه بكام ألف جنيه .. عشان يسرّب لنا معلومات عن اثيوبيا .. وايضا يروح يقولها على سبيل التخويف ان ليلة أمك زرقا لو ما هدتيش بنفسك سد النهضة .. دي مصر ناوية تعلقك من رجليكي زي الدبيحة .. لمّي نفسك يا اثيوبيا وبطلي شغل التلات ورقات ده .. مش مصر اللي تنضرب على قفاها وتسكت .. دي مصر اللي في عهد مرسي تاخد بالجزمة وتقول كمان !
أجي بقى للأمورة السنيورة اللي اسمها عمرو حمزاوي اللي مخاصم الحلاق بقاله يجي سنة واكتر .. وفرحان اوي بالقطف اللي على خده ، والانسيال الفوشيا اللي لابسه في إيده اليمين .. وهو بيغني لمرسي ويقول له : الحقيقة يا ريس ان ملف الجنود السبعة اللي خطة معاليك الجهنمية حررّتهم من ايد الإرهابيين .. تستحق عليها بوسة ... " تسمح لي اقوم وابوس سعادتك يا ريس ؟ .. بعدين يا عمورة يا حبيبي .. لمّا ينتهي الاجتماع حنبوس بعض كلنا .. ماشي يا سعادة الريس .. بس سامحني مش قادر امسك نفسي .. خد دي ع الهوا" .. بقول يا ريس ان الشفافية اللي الرياسة تعاملت بها معنا في هذه القضية أثلجت صدر كل مواطن مصري حر .. لقد بذلتم الغالي والنفيس حتى تم تحرير جنودنا من قبضة الأعداء .. ضربة كانت من معلم .. خلت الإرهابيين تسلم ... " مش قادر امسك نفسي يا ريس .. نفسي أبوسك .. قلت لك بعدين يا عمورة .. ابو العلا ماضي قاعد جنبك .. خد منه بوسة تصبيرة لحد ما الاجتماع ينتهى وكلنا نبوس بعض .. مرسيه كتير يا ريس " .. بقول لسعادتك ميهمكش من اللي بيسألوا : وهما اللي خطفوهم فين؟ .. واحنا حنعمل بيهم ايه .. المهم عيالنا في سينا رجعوا كاملين لينا ومصر اليوم في عيد.
م الأخر لو عايزيت نتكلم جد .. خدوها مني نصيحة وببلاش .. الملف الاثيوبي كله حتة واحدة سلموه لحسن شحاته وريّحوا نفسكم .. مرسي الان وليس غدا يصدر قرارا رئاسيا بتكليف حسن شحاته بتولي هذا الملف الخطير .. الراجل فاهم شغله كويس وعارف كل حركات الأفارقة .. ومن أبسط قواعد اللؤم " والحيطة اللي انتوا متعرفوهاش .. انه كان بيمنع اى نفر يحضر تدريب الفريق القومي .. احسن يندس واحد من فريق الخصم ويروح يقول للمدرب التاني على الخطة .. مش زيكم .. بتعرضوا خطتكم العسكرية لضرب اثيوبيا على الهواء مباشرة .. وحسن شحاته سمعته زي الفل .. الراجل جاب بطولة افريقيا تلات مرات من غير ما يعلّق " لباس " اى لعيب عنده على سبيل التمويه .. دماغ شغّالة ميت فل وعشرة .. هو حيعرف يلاعب اثيوبيا ازاى .. حتهاجمه بسد النهضة .. حيوقف لها وائل جمعة والواد فتح الله .. وبعدين حيعمل خطة مدروسة جامد اوي عشان يهد السد على دماغ اثيوبيا .. الواد متعب وابو تريكة وزيدان ومعاهم طبعا البلدوزر عمرو زكي .. هجمة واحدة ، بس ملعوبة ومتخطط لها ومدربين عليها صح .. ثرو ابن جنية من زيدان .. لمتعب ناحية الشمال .. يقوم رافع الكورة لابو تريكة يقوم يمررها لعمرو زكي .. وبعزم ما فيه " عمورة " يقوم شايط الكورة في سد النهضة .. يقوم السد ينهار .. ونخلص من الصداع ده!