بلا سد النهضة بلا سد الحنك ، ده المصرى طول عمره معروف بقوته وجبروته ، وإحنا بقى لامؤاخذة فى الشدة شداد وفى القوة قواي أوي أوي أوي. عاوزة تعطشينا يا أثيوبيا ؟؟؟ ده فى المشمش يا حبيبتى ، مصر لن تركع ولن تعطش وبعون الله طائر النهضة هيقوم ويفقس وهتبقى الكنافة أكتر م الجوافة ، اتكلمي على قد مصروفك يا أثيوبيا ولما تحبي تنهضي انهضي على قدك ده احنا عندنا ناس مبتتفاهمشي وساعة الغلط بنطرطش زلط. ده أمن قومي ياختي مش هزار ، واللي بتعمليه ده اتحط على أولويات برنامج سيادة المهندس الريس محمد مرسي العياط “تحت بند مطلوب إنجازه” ، وقام موجه دعوة حضرها لفيف من أساتذة الفيزياء والرياضيات والهندسة على قيادات مخابرات على قيادات من الجيش وإتعمل اجتماع سري للغاية لبحث الأزمة وإيجاد حلول جذرية عشان لو مجيتيش بالذوق تيجي بالعافية وخرجوا من الاجتماع ده بتوصيات لو عرفتيها هتصرفي لكل مواطن فيكى حصة بامبرز يومية . وعشان نعرفك إننا أكلناكي البالوظة رحنا ذايعنلك على الهوا إجتماع كده وكده وجاب فيه الريس ناس ملهاش أى علاقة بالموضوع على ناس مسمعناش عنهم قبل كده ولا فى مجلة ميكي حتى ، وفضلوا يقولوا أى هري فى أي بتنجان وخلاص عشان نوصلك إننا نايمين فى البطاطا ومتاخديش بالك إننا بنرقدك الترقيدة اللى هتنيمك م المغرب . أوعي كلام أيمن نور عن أهمية إن يبقى رئيس مصر مهندس يعرفك إننا شعب مطبلاتي ، وأوعي تفتكري إن مجدي حسين لما قفش فى الميكرفون وفتح فى الكلام لحد ما كانوا هيبوسوا إيده عشان ينهي ده دليل على إننا شعب لتات وعجان وبق على الفاضي ، وأوعي يغرك كلام السادات عن الملاهي المائية ويحسسك إننا سيد من يخرج عن الموضوع ، أوعي تفتكري إن عشان فى ناس جوه الإجتماع مكانوش عارفين إنه بيتذاع على الهوا ده معناه إننا شعب واقف على منحدر الصعود لامؤاخذة كل ده ترقيد ، كل ده تكتيك وتمويه ، كل ده خطة محبوكة عشان نقولك بصى العصفورة ؟؟؟ وتفتوجئي إننا بنلبك اللبة التمام .. ده إنتى هتشوفي أيام سودا يا اثيوبيا بس اتقلي .. سؤالى لقارئ هذه الكلمات : هو أكيد اللاير بيروح الفاير ؟؟؟ ولا أنا ممكن أعدى ويتحسبلى الكلام ده هجمة مرتدة ؟؟؟
