أنا خاطب بقالي سنة، وخطيبتي أعرفها من 9 سنين، وبنحب بعض جدا، المهم بعد الخطوبة خرجنا مرة مع بعض، وكنت باروح لها كل أسبوع البيت علشان أشوفها، بعديها ب6 شهور بقيت أشوفها كل شهر، وكانت بتتحجج كل أسبوع بحجة شكل، وإنه مش هينفع أروح لها علشان أشوفها. وطبعا أنا كنت باروح لها يوم الجمعة.. المهم قعدنا على كده 3 شهور، والمشكلة بقى إن أنا دلوقتي بقالي شهرين مش عارف أشوفها، والمصيبة الكبيرة بقى إن لمّا كنت باطلب من أهلها أخرّجها بيرفضوا، ولمّا باقول لهم ليه؟ يقولوا لي: "إحنا مابنخرّجش بناتنا". المصيبة الأكبر، إن المفروض يعني لمّا جينا نجهز الشقة وننزل نشتري وناخد رأي بعض كمان رفضوا، وقالوا إنت اللي عليك هاتوا، واللي علينا هنجيبه، شوفتم مصيبة أكبر من كده؟
وأنا بقى دلوقتي خلاص مش قادر أستحمل.. أهلها مش عايزين يخرّجوها.. وهي مش عارف أشوفها، ومش عارف آخد رأيها في أي حاجة أشتريها في الشقة، وأنا بجد مش عارف أعمل إيه؟ أرجوك اديني رأيك؟ tareq