أنا مشكلتي إني اتعرفت على واحد عن طريق النت، وحبيته جداً، وحبني جداً، بقالنا سنتين من غير ما نشوف بعض؛ بس أنا كدبت عليه في كل حاجة قلتها له عني، حتى اسمي، وكنت باحط له صور مش صوري؛ بس أنا في الأول كنت واخداها بهزار، ما كُنتش أعرف إني هاحبه أوي كده. المهم طلب يشوفني أكتر من مرة، وأنا كنت باخلق أي حجّة عشان مايشوفنيش؛ لحد ما كدبت عليه وادّعيت إني مريضة وعندي مرض وحش وإنه لازم يسيبني لأني ماستاهلهوش. أنا يمكن في الأول كنت محتاجة أحب واتحب وأتكلم مع حد؛ بس ماكنتش عاوزة أكدب عليه؛ فكرت كتير أصارحه وأقول له واترددت جامد؛ بس هو فاض بيه مني، وقال لي: أنا مش قادر خلاص أستحمل.. وسيبنا بعض؛ بس بيكلمني وبيسأل عني وأنا كمان باكلّمه؛ بس الفترة دي مابقيناش نسأل عن بعض؛ بس أنا لسه بحبه، ومش قادرة أصارحه لأنه هيكرهني ومش هيرضى يعرفني تاني. أنا مش عارفة أنا باعمل إيه، أنا كده عندي انفصام في الشخصية، أكيد اللي باعمله ده مش طبيعي؛ بس غصب عني؛ لشدة احتياجي لشخص يحبني.. محتاجة رأيكم ضروري. butterfly