السلام عليكم .. انا شاب في منتصف التلاتينات حبيت بنت من ستنتين وكنا متفقين جدا في كل حاجة .. لكن قبل ميعاد كتب الكتاب بحوالي 3 شهور لاحظت تغير عليها واضح , بقت بتكدب كتير وتنزل من غير ما توضحلي هية رايحة فين ودايما بيظهر لها مشاوير كتير بحجة انها بتكمل شرا الجهاز بتاعها , .. كلامها يبان عادي لكن مش عارف ليه برضه شكيت .. المهم قررت في يوم أراقب تحركاتها وده كان سهل لأنها أصلا ساكنة جنبي .. وفعلا مشيت وراها مرة لقيتها ركنت عربيتها ونزلت ركبت عربية تانية .. المصيبة اني اتفاجئت مفاجئت عمري وهية ان الهانم ركبت عربية فيها شاب .. انا قلت في الأول يمكن قريبها وانا ماشوفتوش قبل كدة أو زميلها في الشغل وهتاخد منه اوراق مهمة .. من كتر ما انا مش عايز اصدق فضلت أفترض لها حجج لكن اللي اكدلي ان فيه خيانة الآتي .. نزلت من عربيتي واتمشيت على رجلي وقربت المسافة اللي بيني وبينهم واللي ساعدني اسمع الحوار اللي بنهم ان الشارع كان فيه ناس رايحة جاية وان صوتهم عالي فسمعت الهانم بتقوله ( أنا مش عارفة أعمل ايه في الورطة دي ماهو لو انا صارحت اهلي دلوقتي على فسخ خطوبة الموضوع هيبقى غريب وملوش مبرر وفي نفس الوقت هقول لخطيبي ايه أصلا خصوصا ان مفيش بنا مشاكل اقدر اتحجج عموما انا بفكر اضرب كرسي في الكلوب وزي ماتيجي تيجي ) .. انا سمعت كدة وماقدرتش امسك نفسي رحت داخل عليهم ونزلتها وضربتها وشتمته وسبتهم.. بعدها على طول رحت لأهلها أشكيلهم قلت بس اكلم الكبار بتوعها .. لكن المصيبة الأكبر كانت ردالأم وهو : لا يابني ما تهينش بنتي قدامي مش مسموحلك بكدة وبعدين فيها ايه لما تشوفها مع حد .. أقولك .. ايوة انا عارفة ان بنتي على معاد مع الراجل ده ويمكن كمان نفسخ الخطوبة بينكم وبصراحة احنا استحملنا ظروفك بالعافية وبرضه انت ما قدرتش ده وعمال تتأخر في شرا الشقة وانا مش موافقة على ان بنتي تتجوز في شقة مفروشة او ايجار جديد .. من الآخر الراجل ده ابن ناس وعيلة وعنده شغله الخاص بيه وغني وعنده بدل الشقة فيلا وعربية تانية غير اللي انت شفتها .. ايه قولك بقى ؟ ) الصراحة بعد ماسمعت الكلام ده كان هيجيلي انهيار عصبي مش مصدق نفسي ان فيه ناس كدة , المهم فاتت شهور بعد القصة دي وفسخت الخطوبة طبعا واللذيذ في الموضوع انها ضربت على الشبكة وكل الهدايا ورضيت بكدة عشان ابوية قال لي قي داهية إذا همة رضيو على نفسهم ياخدو الشبكة ورضيو اصلا لبنتهم تعرف راجل على راجل يبقى هتاخد منهم ايه ؟ سيبها ده ربنا كبير . وسكت بعدها لكن القهر ماليني بس لما فاتت شهور طويلة على القصة دي جمعتني الصدفة ببنت ناس جدا شفت فيها كل الصفات الحلوة .. بنت ممتازة من كل حاجة لكن المشكلة ان انا نفسي ومن غير ما احس ابتديت اعاملها بحرص شديد بسبب اللي شفته من البنت التانية حتى مشاعري تجاهها بقيت حابسها خايف من خبطة تانية لا قدر الله برغم من البنت الجديدة مختلفة تماما ومع الوقت ابتدت هية كمان تحس بحرصي واللي وصل الى اني بقول لها انا مش هقدم شبكة ولا هشتري شقة مع اني قادر اعمل دة عشان ظروفي بالصدفة اتحسنت الحمد لله وللأسف كنت حاكي ليها قصة البنت الخاينة الأولى وكنت حاكلها بالتفاصيل عن كل اللي عملته عشانها ومن هنا بدأت تحس بفرق المعاملة البعيد جدا عن اللي تستاهله .. المهم بدأت المشاكل بيني وبين البنت الجديدة وللأسف انا اللي غلطان كنت مقصر معاها جدا بسبب اني فعلا اتعقدت من حكايتي القديمة وطبعا النتيجة اننا فسخنا الخطوبة برضه .. وخسرت أجمل بنت ممكن اقابلها في حياتي . دي مشكلتي .. مش قادر اطلع من سلبيات المشكلة القديمة ولا قادر اكون انسان طبيعي وعمال بخسر علاقتي بكل بنت اقابلها بسبب نفس الموضوع .. الله يجازي اللي كانت السبب خربت علية حياتي .. الخيانة وحشة يا جماعة . حاتم فضفضة لقد ظلمت نفسك عندما تركت مشاعرك السلبية وألمك مما حدث لك يسيطران عليك .. و ظلمت الفتاة الثانية عندما عاملتها بحرصك الذي وصل إلى حد الشك في طباعها على الرغم من تأكيدك على حسن أخلاقها .. منتهى الظلم .. الحل الوحيد أن تجلس مع نفسك وتصفيها وتأكد انه لا يوجد إنسان يشبه الآخر في طبائعه ولا يصح أن تعاقب إنسان بسبب فعلة إنسان آخر , ونصيحتي لك إن عجزت من تقويم نفسك أن تستعين بطبيب نفسي وهذا أمرا ليس مخجل بل أرى فيه الحل الوحيد لتعود إنسان سوي وتعيش في حالة من التوازن .