حوار: رنا حسين أعده للنشر: مها مصطفى كتير منا بيتعب من اتباع الريجيم وبيفضل إنه ياخد أدوية علشان يخس بسرعة وبدون مجهود.. هل ينفع نستغنى عن الريجيم بالدواء؟! ويا ترى إيه هي الأدوية المسموح ناخدها وتكون آمنة وإيه الأدوية اللي نبعد عنها؟! كل الأسئلة دي هيجاوبنا عليها د. محمد أبو الغيط، الأستاذ بكلية طب جامعة القاهرة وسكرتير عام الجمعية الطبية المصرية لدراسة السمنة.. هل الأدوية اللي بتعمل على إنقاص الوزن لها تأثير ضار على الصحة وعلى أداء المخ؟ السمنة ممكن نعرّفها على إنها مرض، وفيه أنواع منها بتكون مزمنة، ودي اللي بعد ما بنعالجها ممكن ترتد مرة أخرى، وكل الأبحاث والدراسات الطبية بتحاول الوصول لعلاج لمرض السمنة؛ إلا أن العلاج الدوائي حتى الآن غير مُرضٍ سواء للمرضى أو الأطباء. وكانوا في الأول بيعالجوا السمنة بنفس الأدوية الخاصة بالغدة الدرقية، ولكنهم وجدوا أن لها آثارا جانبية كتيرة، وفي بعض الأحيان كانت بتؤدي للوفاة. إيه الآثار الجانبية الخطيرة اللي تسبّبت في منع بعض الأدوية من التداول في السوق؟ الأدوية اللي تم منعها مؤخرا كانت بتشتغل على الجهاز الهرموني في الجسم، وبالتالي كنا بنلاحظ إننا لما بنيجي نعالج سيدة ببعض الأدوية، وبنلاقي إن مع الوقت وزنها بينزل، بتظهر آثار جانبية تانية زي نمو شعر الدقن، وأحيانا كانت بتسبب ارتفاع ضغط الدم، وعصبية شديدة وأحيانا بتسبّب إدمان للمريض؛ ده بالإضافة إن فيه بعض الأدوية كانت بتأثّر على الصمامات الداخلية في القلب وبالتالي تم منعها. ومؤخرا تم سحب كل الأدوية اللي بتحتوي على مادة السيبوترامين؛ زي: Regitrim ،Sibotrim ،Slimax ،Diet max على الرغم إن كان لهم نتيجة فعالة جدا في تقليل الوزن؛ لأنهم بيقللوا الشهية، وبيزوّدوا الإحساس بالشبع وفي نفس الوقت بيزوّدوا معدل الحرق، ولكن تم سحبه؛ لأن الدراسات أثبتت إن مادة السيبوترامين لها تأثير ضار على المخ. هل ده معناه إننا نتجنّب كل الأدوية اللي لها علاقة بتقليل الوزن؟ إحنا بنتجنب الأدوية اللي بتلعب على مراكز الشبع في المخ، لكن فيه أدوية تانية بتشتغل على امتصاص الجسم للدهون؛ زي الأدوية اللي بتحتوي على مادة الأورليستات واللي بتعتبر من الأدوية الآمنة جدا؛ لأنها بتشتغل على الوجبة اللي بتتاكل مش على الجسم نفسه، وبالتالي مش بتزوّد الحرق أو تقلل الشهية، ولكن بتقلل امتصاص الجسم للدهون الموجودة في الوجبة بنسبة 30%؛ يعني لو الوجبة فيها 100 سعر حراري الجسم بيمتص 70 سعر حراري فقط، والباقي بيخرج مع فضلات الجسم، ولكن الأدوية دي تأثيرها مش قوي وما ينفعش نعتمد عليها لوحدها من غير ريجيم. فيه بعض الأدوية اللي بيتم تداولها على نطاق واسع واللي بتبقى عبارة عن أعشاب ومواد طبيعية.. إيه مدى نفعها؟ أي دواء علشان يبقى له تأثير فعّال، لازم يمر بمراحل كتيرة من البحث والدراسة علشان نتأكد من فايدته، وإنه مالوش أي أعراض جانبية خطيرة، لكن فيه بعض المنتجات اللي بتستخدم كمكمل غذائي؛ زي الشيتوكال اللي الأبحاث أثبتت إنه مش مضر ولكنه مش بيجيب نتيجة في موضوع إنقاص الوزن. أما المواد الطبيعية؛ زي القرفة والشاي الأخضر والبقدونس فهي مش مضرّة، ولكنها مش مفيدة في التخسيس وده وفقا للأبحاث اللي اتعملت.
