النهارده على "سفرة دايمة" هنقدّم لكم طريقة عمل الكوكيز بالشيكولاتة، والوصفة دي محبّبة جدا للأطفال والكبار؛ جرّبوها وابعتوا لنا رأيكم فيها.. كوكيز بالشيكولاتة المقادير: كوب دقيق بيضة كبيرة 1/ 8 كيلو زبدة 1⁄4 كوب سكر بني 1⁄4 كوب سكر أبيض ملعقة فانيليا صغيرة 1⁄4 ملعقة صغيرة ملح 1⁄2 ملعقة صغيرة كربوناتو 3⁄4 كوب شيكولاتة شرائح
الطريقة: 1- حطّي الزبدة في المضرب الكهربي على سرعة بطيئة لحد ما الزبدة تسيح. 2- بعد كده ضيفي عليها السكر الأبيض والسكر البني، واضربيهم كلهم مع بعض لحد ما تحسّي إن الخليط بقى زي الكريمة.
3- ضيفي البيضة على الخليط ومعاها الفانيليا والملح والكربوناتو، واخلطيهم مع بعض كويس، وبعد كده ضيفي عليهم الدقيق تدريجيا مع الاستمرار في الخلط لغاية ما كل المكونات تتجانس مع بعضها كويس.
4- طلّعي الخليط من المضرب، وحطّي عليه قطع الشيكولاتة وقلّبي المكونات كلها مع بعض.
5- هاتي صينية كبيرة وحطّي عليها ورق زبدة، وقسّمي العجينة على شكل كرات صغيرة ورصّيها على الصينية.
6- دخّلي الصينية في فرن ساخن على درجة حرارة 180، وسيبيها لمدة من 8 : 10 دقائق.. وبالهنا والشفا.
وبكده تكون خلصت وصفتنا النهارده.. نتمنّى إنكم تجرّبوها وتبعتوا تقولوا لنا رأيكم فيها.. وكمان لو عندك أي وصفة عايزة تعرفيها ممكن تبعتي لنا.. وإحنا هنقدّمها لك في أقرب وقت..