أنا بحب واحدة من زمان، وهي بتحبني، ومانقدرش نعيش من غير بعض؛ لكن أمها غصبتها على الخطوبة، وفضلت صابر، وكانت بتكلمني من وقت للتاني عشان نتطمن على بعض وهي مخطوبة؛ ولكن حصل بينّا مشكلة، وقالت لي: يومين وهاكلمك، وفضلت شهرين أو أكتر ماتكلمنيش، وساعتها سمعت إن فرحها قرّب فاتصلت بيها، وكان تليفونها مع خطيبها وهو اللي رد عليّ، وأنا اتسرعت وقلت له على كل حاجة، وقال لي: هاتجوزها عندا فيك، وأنا مش مصدقك. أنا تعبان أوي، ومش قادر أعيش من غيرها، وبرغم إني قلت له إني حتى كنت باكلمها وهو خاطبها؛ فهو بيعند معايا، ومامتها كانت بتضربها عشان تكلمه، وكانت بتخلي أختها الصغيرة تضربها، وهي كانت بتعامله وحش عشان يسيبها.. إلا إن أمها كانت بترجع تقنعه إن هي بتحبه، وهو كان بيصدق. وعلى فكرة هو ماشي بدماغ أمها عشان هي معرفة قديمة لأمه، وأنا مش عارف أعمل إيه. salek