أولاً أنا باشكر كل القائمين على هذا الباب؛ أنا مشكلتي إني بحب واحدة أوي، وهي كمان بتحبني أكتر ما أنا بحبها، أنا عندي 20 سنة وشغال في شرم الشيخ، المهم أنا أعرفها من حوالي سنة ونص، وكنت على طول باكلمها، وهيّ كمان، وكنت باشوفها كتير، رغم إن المسافة بينا بعيدة، المهم عشان ما طوّلش في كلامي عمرها ما كانت بتزعلني منها، بس من يوم ما دخلت الجامعة وهي اتغيّرت تماماً وما بقتش بتسمع الكلام، وقلت ليها أكتر من مرة إنها تبعد عن أصحابها، بس هي اللي رفضت، وقالت ليّ مش هقدر أبعد عنهم، وفي الآخر خيّرتها بيني وبين أصحابها، بس قالت إن عمرها ما هتبعد عن أصحابها، المهم افترقنا من حوالي أسبوع، وهي بتتصل بيّ كتير، وأنا مش عارف أرجع ولا لأ!! بس أنا خايف لما أنا أرجع أنا ترجع هي لعادتها القديمة، أنا بجد بحبها أوي بس قلبي مش عارف يسامحها، أعمل إيه؟!! أرجوكم ردّوا عليّ أنا والله العظيم تعبان أوي وأنا بعيد عنها، وفي النهاية أنا آسف لو كنت طوّلت عليكم. mody