أنا بنت عندي 23 سنة، ماما وبابا توفوا من فترة، واضطريت أسيب بلدي وأروح أعيش عند أختي الكبيرة في بلد تاني، جوزها بيعاملني على أساس إني بنته الكبيرة، وبيهزر ويضحك معايا عادي؛ بس المشكلة إني بدأت أحس إن هزاره زاد شوية؛ يعني ساعات يحضني أو يعضني في ذراعي؛ بس ده ماينفعش.. ساعات بابعد وأقعد في أوضتي لوحدي. وعرفت من أختي إن علاقتهم الحميمية مش تمام، وإنه قال لها اتعلمي من أختك الصغيرة الشياكة.. وفيه مرة لقيت أفلام إباحية هو اللي جايبها على أساس إنها شغل؛ بس مارضيتش أقول لأختي علشان مايحصلش مشكلات. أنا من زمان وأنا رومانسية، كنت باتعلق بأي ولد يدخل حياتي، لحد ما حبيت واحد واتقدم، وبعدها بابا توفي، وهو كان مُصرّ على الارتباط في ظروفنا دي، وسِبنا بعض؛ بس حاسة إني لسه بحبه.. ودلوقتي نفسي أتجوز أي حد مناسب وخلاص بس علشان أبعد عن بيت أختي، وماحسش إني ثقيلة على حد، وكمان عشان أعفّ نفسي. أوقات باحس إن أنا اللي بادور على العريس، وده بيخنقني أوي؛ بس أنا شايفة إن ده الحل الوحيد لكل المشكلات دي؛ خاصة إن اللي كنت بحبه فتّح عيني على الكلام في الجنس والعادة السرية والحاجات دي، وأنا مش عايزة أخون الراجل اللي هاتجوزه. Lovly.mb صديقتي العزيزة.. قلبي عليكِ في اللي إنت فيه، مشكلتك قلقتني عليك، وأتمنى إنها ماتتطورش لمراحل أسوأ.. بالنسبة للجزء الأول وهو علاقتك بأختك وزوجها؛ فأرجوك حاولي تكوني حذرة جدا.. أنا عارفة قد إيه صعب تعيشي مع رجل غريب؛ لكن إنت اتصرفتي صح بالاقتصار عنه، وعدم إخبار أختك في المرحلة دي، ولو هزاره زاد إنت مضطرة توقّفيه عند حده بنظرة أو كلمة سخيفة، وما تقلقيش من فرق السن أو أي حاجة؛ لأنه محتاج حاجة تفوّقه وترجّعه لصوابه، ومش هيقدر يعمل كده غيرك. وخلّي بالك على مشاعر أختك؛ لأن أصعب حاجة على الست إنها تحس إنها بقت مش مكفّية جوزها، وإنه بيبصّ لغيرها، والمشكلة الأكبر إن غيرها دي هي أختها الصغيرة، وهي أكيد بالنسبة لك أُمّ؛ يعني إنت كمان بنتها مش بس أختها. أنا مش عارفة إيه إمكانية إنك تعيشي بعيد عنهم؛ بس إنت مش صغيرة وممكن تشتغلي وتعيشي وتأمّني حياتك؛ حتى لو ماجاش نصيبك دلوقتي، شغلك وخروجك ومعرفتك بالناس هيسهّل إنك تقابلي شخص كويس يستاهلك، وهيقلل كمان من فترة وجودك قدام جوز أختك.. مش عيب تكوني رومانسية، ولا حتى إنك تحسي باحتياجك للزواج وممارسة الحب؛ لأن دي حاجة من حاجات الإنسان الطبيعية، وإنت سنك دلوقتي يعتبر قمة الاحتياج لإشباع الدافع الجنسي عند أي إنسان؛ لكن مش صح إنك تفكري إنك تتجوزي أي شخص بس عشان تعفّي نفسك، وتهربي من مشكلتك، وتبعدي عن بيت أختك؛ لأنك كده بتهددي مستقبلك كله. ماتفكّريش في خيانة زوجك، ولا تتجوزي واحد ممكن يوم من الأيام يخونك.. شيلي من راسك فكرة إنك قليلة الحيلة، وإنك محتاجة منقذ وفارس ييجي يخطفك على حصان أبيض؛ لأن زمن الفوارس راح خلاص، وأنا خايفة عليكي من إن الفكرة دي تضعفك.. يا صديقتي إنت عندك 23 سنة، وأكيد متعلمة، وتقدري تشتغلي وتعيشي وتعتمدي على نفسك حتى لو لوحدك.. فكري إن ما حدش يقدر يهددك أو يضغط عليكي أو يجبرك تعملي أي حاجة أنت مش عاوزاها.. فكري إنك قادرة توقفي أي حد عند حده، وتتحكمي في نفسك ورغباتك لحد ما ربنا يأذن.. ولو فيه حد مناسب فمش عيب أبدا إنك تفكري فيه كعريس على الأقل إنت مش هتخوني نفسك وقتها وتخوني شخص بتحبيه، إنتي شخص قوي وقادر يحمي نفسه ويعفّ نفسه بطرق كتير؛ حتى لو كان بالعادة السرية اللي بانصحك إنك متخليش حد حواليكي في البيت يحس إنك بتعمليها؛ وخصوصا جوز أختك؛ لأنها ممكن تطمّعه أكتر فيكي. وربنا يكتب الخير ويهديكي ويهدي ليكي شخص يستحقك وتعيشوا مع بعض بالخير وفي الخير.. وما دام نيتك إنك تعفّي نفسك؛ فصدقيني ربنا عمره ما هيخذلك.
