أنا بجد مخنوقة وما بقيتش عارفة إيه اللي أنا فيه ده.. أنا كنت أعرف واحد من خمس سنين، وكان بيقول لي إنه هيخطبني، بس طلع كدّاب في كل حاجة، ومِن ساعتها وأنا ماعنديش ثقة في حدّ، لحدّ ما عرفت واحد من على النت، كنت باكلمه من فترة وقطعت معاه، ورجعنا تاني نتكلّم، وكان بيكلّمني بكل احترام، وهو مسافر دلوقتي بيشتغل، وعنده 33 سنة وأنا 22 سنة، وقال لي إنه لما ييجي هيشوفني علشان عايز يرتبط بيّ، بس أنا مش مصدّقاه مع إنه قال لي هاشوفك بس مش لوحدك معاكِ أختك أو أي حدّ، وهاجي على طول، بس أنا دايما عاملة مشكلات معاه، ومش مصدقاه أبدا في أي حاجة، وهو دايما يقول لي أنا باراعي ربنا فيكِ، ما تعمليش فيّ كده. لحد من يومين باباه تُوفّي وبعت لي رسالة، وبرضه مش مصدّقاه، واتصل وقلت له إنت بتكدب عليّ، قال لي كتّر خيرك، هاكدب إن أبويا مات!! وساعتها زعلت من نفسي، وتاني يوم اتصلت بيه ما ردش، رحت كتبت رسالة قلت فيها: أنتَ مش عايز تكلّمني؟!! فاتصل بيّ، وقال لي حرام بقى كفاية أنا في إيه ولّا إيه.. أنا مش من الشارع علشان أضحك عليكِ، أنا عمري كلمتك كلمة تجرحك أو كلام خارج؟ قلت له لأ، قال لي طب ليه.. أنا تعبان.. أبويا ميت، وإنتِ عمّالة تعملي كده.. بيني وبينكم ما اعرفتش أردّ، قال لي أنا هاقفل واتصل بالليل، ولحد دلوقتي ما كلمنيش وأنا مش عارفة أعمل إيه.. هو كده بيتهرّب مني ولا مابقاش عايزني؟ ما بقيتش عارفة. g