وجهت أسر المعتقلين دعوة إلى تظاهرة جماعية أمام وزارة الداخلية تبدأ من الثانية عشرة ظهرا، تحت عنوان "دعوة للإفطار" جاء فيها: نتشرف نحن أمهات و زوجات و أبناء المعتقلين المصريين بكافة المعتقلات المصرية بدعوة سيادتكم لحضور حفل إفطار جماعي الثلاثاء القادم، 22 من رمضان، 25 من أكتوبر2005، وذلك أمام مقر وزارة الداخلية، و ندعوكم لمشاركتنا في التحضير للإفطار مع بدء مسيرتنا الاحتجاجية في الثانية عشر ظهر هذا اليوم. و الافطار مكون من: 1- وجبات مضادة للقهر: على أولادنا اللي بالسجون من سنين و راح شبابهم و صحتهم هدر. 2- فواتح للشهية: للحرية والعدل،استوت على نار الطواريء من 24 سنة على ايد الشيف طباخ صاحب الفرن. 3- الباربكيو: مشويات على نار الشوق للعدل والإنصاف. 4- العصير: متحلي بالصبر والأمل في بكرة اللي منتظرينه من سنين. 5- الحلو: كنافة محشية مكسرات لقانون الطواريء، و قطايف محشية بجوز اقلام على وش الظلم والسكوت على البهدلة اللي شايفينها. البرنامج الترفيهي: هذا وللتسلية يعقب الافطار ليلة من ألف ليلة بس المرة دي من غير سياف، وحلقة من مسلسل مواجهتنا لاعتقال أهالينا. ملحوظة: ممنوع اصطحاب اليأس والإحباط، احنا اعتصمنا 4 شهور ولسه ما قطعناش الأمل. تعالوا شاركونا لأن ما فيش خوف من بندق عساكر الداخلية طالما كلنا مع بعض. احنا الاسبوع اللي فات قررنا مد الاعتصام حتى منتصف الليل و وقفنا لوحدنا ستات وبنات، من غير حد من الحركات ما يقف معانا للأسف، و دلوقتي اعتصامنا الثلاثاء القادم مفتوح لحين مقابلة وزير الداخلية، عايزينكم تشاركونا ما تسيبوناش لوحدنا. و كل سنة و انتم أحرار ويارب ما يحرم حد من اعزائه، ولا يشتت لكم شمل زي حالنا كده.