أكد الناقد الرياضي أبو المعاطي زكي أنه لم يعتذر لرئيس نادي الزمالك مرتضى منصور بعد الاشتباك الذي حدث بينهما على هامش مؤتمر اتحاد الكورة لدعم الرئيس عبد الفتاح السيسي . وقال "زكي" في لقاء مع برنامج "كورة بلدنا" الذي يقدمه الإعلامي عبد الناصر زيدان : "مرتضى في الأول (تف) علينا أثناء ما كنا واقفين وقولتله الناس بتسلم مش بتتف .. وتف الناحية التانية عشان فيه رجالة محترمة هنا واقفة .. فقالي أنا محترم غصب عنك .. وبعدها حصل تبادل الشتايم اللي الناس شافته في الفيديو". وأضاف: "قالولي نعمل بلاغ فعملنا بلاغ لأن هو بس اللي كان بيصور الواقعة وكسر تليفون لزميل لينا من البوابة كان بيصور فخوفنا يعمل مونتاج ويجيب الحق عليك من خلال الفيديو وهو يبقى بريء ومكناش نعرف إن حد تاني سجل اللي حصل .. الكابتن شعبان والأستاذ هشام صالح دخلوني الأوضة وقفلوا الأوضة من جوة وقفلوا الباب .. وبعدين هو جه وكان واقف قدامي وضهره للحيطه وجه يسترضيني قولتله أنت اللي غلطت وداخل تتف وأنا بمارس عملي الصحفي وهمارسه بكل حرية .. وبعدين اللواء خالد عبد العال مدير أمن القاهرة اتصل بالعميد ثروت سويلم وقاله (بقى أنتوا متعرفوش تعملوا حاجة كويسة أبدًا؟ .. عاملين مؤتمر جميل لدعم سيادة الريس .. الناس دلوقت هتسيب المؤتمر وهتتكلم في خناقة فلان وفلان .. الناس دي متمشيش غير والموضوع خلصان عشان مياخدش أكتر من حجمه ) .. دي تعليمات جت والناس بتاعت الشرطة دعمتني فلازم أكبر لها وأحترمها .. ومرتضى قالي أنا اللي غلطت في الأول وغلطت دلوقت برضو ومتزعلش لأنك كنت صاحبي .. قولتله فيريرا كان عامل نتايج زي الفل وكنا بنتكلم ونعطي للفرقة حقها بس لما الدنيا تبقى راجعة لورا جمهور الزمالك له حق علينا نشاور على الغلط .. وقال أنا مش جاي للمؤتمر بتاع دعم الرئيس .. أنا مرشح رئاسي .. وقتها قمت أنا ضاحك وقولتله بكرة أحمد جلال هيطلع ويعيط ويقول والنبي خليك في الزمالك عشان محتاجك ". وأردف: "قولتله أنت لما تموت مش هتلاقي حد يغسلك وأنا كرامة مني هغسلك .. قالي : هو أنا هموت؟ .. قولتله آه هتموت ومش هتلاقي اللي يغسلك فعلم ولادك يغسلوا". الفيديو: