يا سعادة البيه .. نتورث ليه؟ كل ذنبي إني قولت لا للتوريث غيري قالوها .. و قبلي قالها عرابي يا بيه عايز إيه؟ تقوم تسجني بتاع إيه؟ أنا شاب و شايف .. كل قرايبي أتسرحوا من المصانع المتباعة و كل المرضي ماتوا .. لا تأمينكم نافع و علاجي علي نفقة دولتكم ضايع واتعلمت و خدت شهادة .. و أخرتها أنا علي القهوة زيي .. زي أي صايع يا بيه .. قاعدين ليه ؟ هتعملوا فينا تاني إيه؟ العيش موتنا بعض عليه .. و بعديها الأفران إتقفلت و بقي العيش خمس لقم بجنيه !! يا بيه هنعيده ليه .. هنمسك إبنه بعديه ليه؟ هتقولي بطل و حارب و حكيم العرب علي عيني و راسي شبع منها 30 سنة ناقص إيه؟ ما الفساد في حكومته و حزبه الفاشل هيفضل فيه .. هيتغير في إبنه إيه ؟ الكهربة مقطوعة .. و الخضار اتسقي –لا مؤاخذة- بمية البلوعة والغاز أتصدر للأعداء .. و الشرطة علمت علي قفانا وصورتنا فيديو و هي مقلعانا و منتهكانا .. أقولك إيه ؟ الأسعار كل يوم مولعة نار .. والبانجو لحس دماغ الشباب المنهار والجريمة و الإغتصاب و السرقة في عز النهار والثقافة و الفن في إنحدار والمية قاطعة وبنمسحها بمنديل والجو حار والعيشة كلها ماشية بالمندار والمصري برا مذلول و جوا في عار بتجروا ورا اللي يقول رأيه .. زي القط و الفار وتقولي ده مفجر ثورة .. ده فكره جديد يا أخي ده انا أبقي حمار .. لو سمعت ليك .. و سلمتها لك تأكلها من تاني و تأخد مكاني في بلدي و تقولي أستني الأمل أستني النهار ... و أتاري سنينكم سودة مفيهاش غير الفساد و النفاق و السذاجة مفيهاش غير الدمار و الهبل و السعار رجال أعمال بيسرحوا العمال وإعلام و تعليم يجيب تخلف عقلي قال إيه مصر إختارت طعمها .. و ياتري طعمها بالجمري ولا بالجوافة ولا بالجبنة ولا بالكوسة ؟؟ إيه "الجمال" ده؟ طيب مش تختاري يا مصر رئيسك أو أختاري عريسك ... ولا انتي عزبة بيورثها الأبن عن أبوه ؟ معلش يا بيه .. طولت عليك .. انا مفروس صابر عشمان مناضل المصري أحبسني يا بيه .. نفذ أوامر الباشا محدش فينا أد الباشا يا بيه .. أنا اللي قولت لا للتوريث يا بيه وأنا اللي غرقت العبارة .. و اللي حرقت القطر أنا اللي وقعت الجبل علي الدويقة وأنا اللي حشرت لفة بانجو في صدر خالد سعيد وأنا اللي انتهكت عرض عماد الكبير وأنا اللي عزبت الناس في الاقسام و ضربت رجالة و سقطت حمل ستات أنا اللي بعت الاراضي لولاد الوزير وأنا سقيت الفاكهة مية مجاري وأنا اللي جبت صفر في المونديال واللي مقعد الشباب علي القهاوي وبدفع مشاريبهم كمان من المال العام وأنا اللي زورت الانتخابات واتحرشت بالبنات وانا اللي عدلت الدستور و خصخصت البلد وانا اللي سرقت زهرة الخشخاش و لفيتها في سجارة وانا اللي هبيع الهرم لو مأعدمتنيش يا بيه !!!!! بقلم / فارس الرومانسية بهاء الدين محمد