منذ بدأ رمضان وأنا أجرى يومياً للتخسيس وأبدأ الجرى عادة صباحاً عند «الشاطبى» من أمام «مكتبة الإسكندرية» حتى مديرية «أمن أسيوط» ثم أدخل أسلم نفسى وأستلم المكافأة وأستحم وأعود بالقطار قبل المدفع أفطر وأشكر المحافظ وأنام لأحلم أن أعيش فى بلد حر ونسبة الرطوبة عالية، فقد بدأ سبتمبر وجاءت نسمات الخريف وبعد أسابيع يزور السيد الرئيس قبرى «السادات» و«عبدالناصر» ليقرأ الفاتحة على روح «السادات» ثم يقف أمام قبر «عبدالناصر» ليعود بى الخيال (طبعاً إنت عارف، أنا لا عايز أزورك ولا أشوفك هيه بس تحكُّمات السياسة اللعينة.. إنت منين فى الصعيد؟ صحيح إنت رقَّتنى لكن ده بكفاءتى مش بمزاجك.. حد يا راجل يعادى أمريكا ويحارب المستثمرين؟! إنت منين فى الصعيد؟ على العموم ارتاح، إحنا بعنا كل المصانع اللى أنت عملتها، والعمال اللى صدَّعتنا بيهم أهم متلقحين ع القهاوى.. واللواءات بيمثلوهم فى المجلس.. بقى باسم الأمة! باسم الأمة! خلى بقى الأمة تنفعك.. فاكر عواد باع أرضه، وفدادين خمسة خمس فدادين، والأغانى اللى كنت بتغيظ بيها إخوانا الإقطاعيين؟ أهى الأرض رجعت لهم تانى والفلاحين بتوعك سابوا الترعة وراحوا يغرقوا فى البحر.. فاكر حكاية إسرائيل ومن وراء إسرائيل؟ إنت منين فى الصعيد؟ علم إسرائيل على النيل دلوقتى أعلى من السد العالى بتاعك.. نعم! سميت ابنى على اسمك ليه؟ بسيطة علشان ما اتولدش أيام فاروق.. إنت منين فى الصعيد؟ إنت لسه ح تقول الفقرا والغلابة، تعالى يا أخويا خد الغلابة بتوعك معاك فى حضنك، ما حدش عايزهم ولا طايق يشوفهم.. بقى العمال تدخل مجلس الإدارة؟ ما تجيبهم أحسن يقعدوا مطرحى.. قعدت تقول طريق الثورة وطريق الحرية وطريق الكرامة، تعالى النهاردة شوف طريق المحور.. مش تقول لى التعليم مجاناً والعلاج مجاناً، النهاردة دورات المياه فى الشوارع برسوم، ولو مش عاجبك هنركَّب عدادات للتنفس.. والملك اللى ساب العرش رجع واستلم التليفزيون والإنجليز مشوا ورجال الأعمال احتلوا لندن ومجلس قيادة الثورة اللى كان فيه «محمد نجيب» بقى لجنة سياسات فيها «محمد كمال».. أنا معاك أن «الوطن» غالى لكن أغلى ما فيه «الأنبوبة».. أنا خلاص ماشى.. لأ لأ ما تفرحش قوى، أنا بس ماشى من قدامك ما أنت سيد العارفين هوه فينا حد بيمشى بإرادة الشعب كلنا بنمشى بإرادة الله). [email protected]