وجه إبراهيم سعيد، نجم الأهلي والزمالك ومنتخب مصر السابق، رسائل نارية إلى أحمد فتحي، ظهير أيمن الفريق الأول لكرة القدم بنادي بيراميدز، وذلك بعد اقتراب اللاعب من الانضمام لصفوف الإسماعيلي خلال فترة الانتقالات الصيفية الجارية. وقال إبراهيم سعيد، في تصريحات تلفزيونية عبر فضائية «النهار»: «أحمد فتحي، أخ بالنسبالي وأنا بعزه جدًا، لعبنا فترات كثيرة مع بعض، أنا بقوله كفاية، كفاية تبهدل نفسك، إنت اسم وتاريخ وكبير جدًا مع الإسماعيلي والأهلي ومنتخب مصر، بلاش تخلي اسمك ينزل، إنت اسمك تقيل ومن رموز الكرة المصرية» وأضاف: «إنت اسمك كبير، مش محتاج تقعد تعافر عشان تبقى موجود، إنت نجم وليك وضعك متقعدش تعاند مع نفسك خلاص اعتزل». وتابع: «هتعمل إيه في الإسماعيلي؟ انت في بيراميدز معاك جميع الإمكانيات الفنية مع احترامي إنت هتعمل ايه للإسماعيلي، مش هتعمل حاجة، الإسماعيلي عايز اللي يشيله خصوصًا إن اللاعبين الموجودين صغار في السن معندهمش خبرات». وأكمل: «إنت مش هتضيف حاجة للإسماعيلي، أنا بقولك اعتزل متجيش على آخر الزمن تهين الاسم اللي انت عملته، الاسم اللي إنت عملته مينفعش يروح بسهولة. حافظ على اسمك، إنت ليك نجوميتك بعد الاعتزال ممكن تشتغل في أي منصب». وأتم: «دي نصيحة من أخ ليك، أنا كابتنك وأنا بحبك لأن احنا كنا زمايل في الملعب فأتا بقولك اعتزل وخلي الناس تحترمك وتقدرك.. دي رسالة من أخ كبير لأخ صغير».