حذر الشيخ أبواليزيد سلامة، من علماء الأزهر الشريف، من المداومة على المعصية، لافتا إلى أن هذا الأمر يجعل رصيد الستر ينفد. وقال أمين الفتوى بدار الإفتاء المصرية، خلال حلقة برنامج «مع الناس»، المذاع على فضائية «الناس»، اليوم الأحد: «عشان رصيدك في الستر لا ينفذ منك، علشان ما ينكشف عنك ستر ربنا سبحانه وتعالى، إياك تداوم على المعصية بشكل يجعلك تبقى مدمنًا عليها، واحذر أن تختبر ربنا سبحانه وتعالى وتقول: إن ربنا سبحانه وتعالى هيسترني». وأضاف: «سيدنا عيسى عليه السلام، لما جاءه إبليس وقال له: مش أنت مؤمن بربنا؟، قال له: آه، أنا مؤمن بربنا.. قال له: طيب، اطلع إلى أعلى مكان في الجبل وارمي نفسك، وبالتأكيد مش هيحصل لك حاجة لأن ربنا سبحانه وتعالى هيحفظك.. فقال سيدنا عيسى: إياك أن تختبر الله، يا لعين! إن الله يختبرنا ونحن لا نختبر الله سبحانه وتعالى، ولا يكون إلا ما قدر الله. واستكمل: «المشكلة إن بعض الشباب دلوقتي بيعمل مصيبة كبيرة جدًا وهو مش واخد باله. وتحسبونه هينا وهو عند الله عظيم. فكرة إن أنت ممكن تكون وقعت في معصية وكلنا بنقع في المعصية. لكن إن أنت تيجي يوم من الأيام، تنشر لنفسك على الفيسبوك إن أنت امبارح عملت كذا وتصور نفسك وأنت بتعمل هذا الأمر وتنشره على الفيسبوك، دي مصيبة كبيرة جدًا».