كتب يوسف الجوهري لاعب النادى المصرى البورسعيدى، كلمات مؤثرة على صفحته الشخصية على مواقع التواصل الاجتماعى الفيسبوك ، يدعم فيه زميله اللاعب أحمد فتوح فى محنته . قال الجوهري خلال المنشور : قبل أي كلام عن شخصية فتوح سواء كان بالدفاع عنه ، أو كان بالخطأ ، ربنا يرحم المتوفي ، و يسكنه فسيح جناته ، و يصبر أهله . الاعب أحمد فتوح متربي فى ظروف صعبة وتابع: "اللي ميعرفش فتوح كويس فتوح شاب من مدينة السلام متربي في ظروف صعبة جدا زي ما تقدر تقول اتربي يبقي راجل متحمل مسؤولية بيت ، و شايل أهله فوق كتافه من و هو في سن صغير ، و دايما في ظهر أهله، و أصحابه اللي متربين معاه مفيش مره حسس واحد أن هو فتوح لاعب نادي الزمالك ، أو داس علي حد بفلوسه ، أو أتغير علي أي بني آدم ، حتى لما ربنا كرمه كان بياخد العربية بتاعته ، و يدخل بها مدينة السلام ، و يقعد مع الصغير قبل الكبير ،و محبوب من الناس كلها ، و دايما بيكون الخير فيه، و دا اللي كان مخلي ربنا يكرمه ، و يوسعها عليه دايما ، لأنه ولله العظيم بني آدم نظيف من جوه" . إبن الشارع الغلبان مايستهلش شماته و أضاف الجوهري عبر منشوره لكن مش بقول الكلام دا عشان أي حد يتعاطف معاه ، أو يكون في صفه ، موضوع فتوح مش محتاج شماتة من حد أو حد يجي يقول أنا نصحتك كتير ، أو أنا حظرتك من حد معين ، لان باختصار أنت متعرفش تفاصيل لكن بعد كل ده أنت حقك تقول، و تقول عليه بس أنت لو عرفته كويس هتعرف قد أيه هو بني آدم كويس ،و مش معنى اني بقول كده انه متكامل الكمال لله وحدة ، فتوح فرحنا إحنا الشعب كتير سواء أهلاوي ، أو زملكاوي ، أو شعب مصر كله ، و في بطولة ، أو في نادي ، و أدى طموح لكل الشباب اللي في سنه ، إن أي حد ممكن يطلع من شارع، و يلعب في الشارع انه يبقي نجم ، و يصدق في نفسه ان مفيش فرق بينك و بين اللي اتأسس في نادي ، و إبن الشارع الغلبان اللي اتربي ، و لعب في الشارع مايستهلش شماته من أي حد والله. أخطأ وبيتعاقب و أستكمل الجوهري دعمه لزميله ، هو أخطأ ، و بيتعاقب ، و ممكن يكون ربنا عمل كدا عشان يرجع ، و يتوب ، و يفكر كويس، و يعيد حساباته في الدنيا ، ياريت محدش ياخد بس الجزاء اللي يخصه ، و يسيب باقي الأسباب كتير ، و علمها كله عند ربنا ، مش عندي ، ولا عندك فبلاش تجتهد ، و تدوس ، و الأسباب كلها ربنا وحده اللي عارفها. ربنا يخرجك منها على خير و أختتم الجوهري كلماته التى يدعم بها زميله، آخر حاجة ربنا يخرجك منها علي خير ، و ترجع فتوح بنسخة أقوى مع ربنا ، مع موهبتك ، ترجع تشرفنا ، و أنافي أي حال متشرف بيك في أي حال و أى وضع ،و عشمنا في ربنا كبير إنك تخرج منها علي خير ، و ترجع بإذن الله نسخة أقوى، و بني آدم جديد مع ربنا ،و إحنا راضيين باللي ربنا كاتبه في اي حال ،و هنستناك في أي وقت. فتوح ابو قلب ابيض صاحب صحبه، و الرجولة كلها و ربنا يرحم المتوفي ، و يصبر أهله .