شهدت حلقة برنامج «الماتش»، الذي يقدمه الإعلامي هاني حتحوت، انفعالًا ومشادة كلامية من وليد دعبس، رئيس نادي مودرن سبورت، أثناء الحديث بشأن ملف اللاعب الراحل أحمد رفعت. وقال وليد دعبس في تصريحاته: «الموضوع فيه لبس، ده مفيش ورقة من نادي فيوتشر اللي هو ابني أنا غلط، وأحمد متعملش أي إجراء معاه غير كل خير ليه ولأسرته ولأي حد بيحبه، غير كدة وكدة مفيش برنامج متقالش فيه على أخلاقيات أحمد مني». وتوجه هاني حتحوت بسؤال، قائلًا: «واثق من موقف ابنك (اللي هو مودرن سبورت) في هذه القصية؟»، ليرد وليد دعبس: «واثق من الموقفين، موقف ابني وابني اللي قاله أحمد رفعت». وأضاف وليد دعبس: «لو عمال تاخد في كلام احمد رفعت كله نسيت ليه إنه قال الراجل ده مش رئيس نادي ده أبويا». ليرد هاني حتحوت: «لأني ببساطة واقف عند نقطة واحدة وهي من ضغط على رفعت وأدى بحسب اللاعب إلى وفات أنا ميهمنيش الكويس اللي في القصة اللاعب قال أنا هموت. ميهمنيش لأن اللاعب مات، بس فقدنا اللاعب هيهمني ايه اللاعب قال كلام كويس». ليعلق وليد دعبس: «الظاهر أنت برضو بتحاول تحور الحوار، بقولك الراجل قال ده أبويا مش كلمة حلوة، أبويا دي كلمة كبيرة يا أستاذ». ليقاطعه هاني حتحوت: «لكن موت رفعت أكبر يا دكتور، والمسؤول عن موته لازم يحاسب» ليرد من جهته وليد دعبس قائلًا: «بالفكر دا دمرتوا الإعلام مش عايزين حد يتكلم». وقبيل الختام توجه هاني حتحوت بسؤال: «هل دعيت إلى تحقيق خلال الأيام الماضية؟»، ليرد وليد دعبس: «أنا أروح تحقيق؟ ليه إن شاء الله؟. على أساس إيه مش في لجان قانونية». وأتم وليد دعبس: «إيه الكلام الفارغ ده، أنتم يا جماعة بقيتوا تقولوا كلام فارغ في فارغ، أنتم مش إعلام أنتم مأجورين». قبل أن تنتهي المكالمة بشكل مفاجئ.