«عمري ما أتخيل الأهلي يعمل كده».. رد ناري من إبراهيم سعيد بشأن أنباء طرده من حفل الاستاد

رد إبراهيم سعيد، نجم النادي الأهلي السابق، على الأنباء التي ترددت في الساعات الماضية بشأن طرده من حفل النادي الأهلي لتدشين مشروع القرن.
وشهد مجلس إدارة النادي الأهلي، برئاسة محمود الخطيب، الثلاثاء، توقيع الاتفاق الإطاري لمشروع القرن (مدينة النادي الأهلي الرياضية) بين شركة الأهلي للمنشآت الرياضية وشركة القلعة الحمراء لإدارة المنشآت والتي تقود تحالفًا مكونًا من 15 شركة عالمية وعربية، بهدف تمويل وتصميم وإنشاء وتشغيل مدينة الأهلي الرياضية، تضم المدينة الرياضية استاد النادي الأهلي الجديد بالشيخ زايد بسعة 42 ألف مقعد، ومتحف النادي الأهلي، بالإضافة إلى جامعة رياضية ومدرسة وفندق ومستشفى رياضي.
وقال إبراهيم سعيد، في تصريحات تلفزيونية عبر فضائية «النهار»: «النادي الأهلي بيتي وأنا عندي 8 سنين، أنا مش غريب على النادي الأهلي، بشكر مجلس الإدارة وبشكر كل من ينتمي للنادي الأهلي وجمهور النادي الأهلي».
وأضاف؛ «أنا كنت موجود وسط جمهور الأهلي في مباراة الترجي، محدش اتكلم ولا حد زعلان مني، ممكن يكون في عتاب والعتاب ده محبة».
وتابع: «إمبارح كان في صورة منتشرة ليا وإن الإدارة منعتني والأمن منعني، ياجماعة في حاجة اسمها نظام، أنا دخلت من البوابة عادي وفي حاجة اسمها QR code الأمن يشوفه وبعدها بدخل».
وواصل: «دخلت الحفلة زيي زي الناس، حتى في الصورة كان في ناس واقفة قدامي طابور، فطبيعي هقف استنى دوري في حاجة اسمها نظام، مش عشان أنا إبراهيم سعيد ولا عشان محمود الخطيب ولا عشان خالد بيبو، بندخل كده، لأن في شركة هي اللي عاملة السيستم والمسؤولة عن التنظيم»
وأوضح: «أنا جاتلي دعوة رسمية من مجلس إدارة الأهلي على الموبايل، فوافقت عليها وكنت سعيد جدًا وشيء يشرفني، وبعدها بيوم بعتولي لينك الموقع كي احصل على QR code الذي سأدخل به الحفل».
وزاد: «كنت واقف في الطابور زيي زي الناس كان في أعضاء ونجوم كرة سابقين واقفين، فوجئت حد صورني من ضهري وبيقول أن الأمن طردني، يا جماعة النادي الأهلي عمره ما يعمل كده، أنا عشت في النادي الأهلي، عمري ما أتخيل إن النادي الأهلي يعمل كده، النادي الأهلي دايمًا بيقدر رموزه وبيقدر الناس اللي فعلا اخلصوا للمكان».
وأتم: «أنا مهما اتكلمت فخور إن أنا بنتمي للنادي الأهلي وده الطبيعي أنا طول عمري مرتبط باسم النادي الأهلي، عشان كده أنا فعلا مبسوط أن أنا وسط أهلي وأسرتي، النادي الأهلي عمره ما يعمل كده وعارف مين أخلص للنادي ظروف معينة اللي بعدتني والموضوع ده اتقفل، الحمدلله من 2007 كنت أتمنى مصالحة النادي الأهلي وجمهور الأهلي»